Хятадын иргэн өнгөрсөн сарын 30-нд их хэмжээний соёо хилээр гаргахыг завдсан билээ. Соёо ямар амьтных болохыг тогтоосон эсэхийг  ГЕГ-ын Хууль эрх зүйн хэлтсийн гаалын улсын байцаагч Ч.Тамираас тодрууллаа. Тэрээр "Замын-Үүдийн Гаалийн газрын байцаагч нар Хятад улсын иргэн Х-гийн ачаа эд зүйлд нарийвчилсан үзлэг шалгалт хийснээр энэ хэргийг илрүүлсэн. Хятад залуу соёонуудыг ямар амьтных гэдгийг мэдэхгүй гэж хэлсэн. Урт нь 12-15 см, өргөн нь 6-8 см хэмжээтэй 275 ширхэг соёо шүдийг хурааж авсан байгаа. Дээжийг нь лабортарийн шинжилгээнд өгсөн бөгөөд хариу нь хараахан гараагүй байна. 12-15 см хэмжээтэй соёо гэхээр нэлээд том амьтных болж таарна. Төв лабораторын дүгнэлтийг үндэслэж хэргийг цагдаагийн байгууллагад шилжүүлэх эсэхээ шийднэ" гэсэн юм. 275 ширхэг соёо шүдийг хоёрт хуваахаар 137 орчим амьтан алсан болж таарч байгаа. Үүнийг албаны хүмүүс баавгай хэмээн таамаглаж байгаа аж. Мөн одоогоор Хятад иргэдийг хил гаргаагүй бөгөөд хаанаас авснаа хэлэхийг шаардаж байгаа талаар эх сурвалж мэдээллээ.