Олон жил боловсрол болон барилга, хот байгуулалтын салбарын толгойны өвчин болж байсан оюутны хотхоны асуудал шийдэгдэж Налайх дүүргийн Шивээтийн хөндийд байгуулахаар болсон. Энэ сүр дуулиантай, сонгуулийн амлалтын хөшүүрэг болоод байгаа  хотхон ямархуу бүтэцтэй байх, ямар дэвшилтэт санаа тусгасан талаар одоогоор бидэнд мэдсэн зүйл тун цөөн байна. Налайхын 100 мянган оюутны хотхоны техник, эдийн засгийн үзүүлэлтийг солонгосчууд хийхээр болсон. Тиймээс БНСУ-ын, өөрсдийнх нь оюутны хотхон ямар байдаг талаар сонирхлоо.
   Солонгост төдийгүй Азид нэр хүндтэй, томоохон их сургуулиудын тоонд багтдаг Инчоны их сургууль шинэ оюутны хотхонтой болж байгаа нь анхаарал татсан юм. Үнэн хэрэгтээ аль ч талаас нь харсан энэ нь удахгүй хотхон биш, хот болон сүндэрлэх аж. Гурван сая орчим хүнтэй /2,76 сая/ Инчон хотын захад хүн амын төвлөрлийг бууруулахын тулд оюутны хотхон барихаар шийдсэн ч яван явсаар хот барих хэмжээний төлөвлөгөө болжээ.
   Сонгдо хотхон гэх тэр хэсэг газрыг Инчоны эдийн засгийн чөлөөт бүс хэмээн зарлаж гадаадын их дээд сургуулиудад газар, барилгаа харьцангуй хямд үнээр түрээслүүлэхээр болсон нь олон хөрөнгө оруулагчдыг татаж чаджээ. Одоогоор АНУ-ын Хойд Каролинын их сургууль, Өмнөд Калифорнийн их сургууль энд байрлахаар гэрээгээ аль хийчихсэн байгаа юм. Мөн дэлхийд чансаагаараа дээгүүрт бичигддэг Иллинойсын их сургууль ч салбараа нээх магадлалтай байгаа гэнэ. Тиймээс дотоодын их сургуулиуд нь үүнийг дагаад сургалтын чанар, стандарт нь дээшилж солонгосчууд дэлхийд алдартай их сургуулиудад хямд үнээр, нутгаасаа холдолгүй сурах боломж олдож байгаа юм.

   Сөүлээс метрогоор цаг гучин минут, Инчон хотоос машинаар 15 минут яваад хүрэх Сонгдо хотхон нь орчин үеийн дизайн бүхий Инчоны цамхагаас гадна Технологийн парк, зочид буудал, машины хэд хэдэн зогсоол барихаар төлөвлөсөн аж. Мэдээж хичээлийн байр, дотуур байр, номын сан, дэлгүүр, эмнэлэг гээд бусад хотхонд байдаг дэд бүтэц бий. Мөн гэртээ ч, машинд ч ер нь хаанаас ч интернет сүлжээнд нэвтэрч болох технологийг нэвтрүүлж байгаа гэнэ. Барилгын ажил нь 2008 онд эхэлсэн  ч өнөөдөр дотоодын хэд хэдэн их сургуулиуд нь шинэ хотхондоо нүүгээд орчихсон, 34 мянган оршин суугчтай болсон байна. Сонгдо хотхон 2013 он гэхэд бүрэн ашиглалтанд орж, жинхэнэ модерн хот болно гэж солонгосын хэвлэлд бахархан бичжээ.

   Монголчууд АНУ, Европын их сургуульд сурах хүсэлтэй байдаг. Тэгвэл ойрын ирээдүйд Солонгос, Хятадын их сургуулиуд менежмент, чанар, тохилог орчноороо тэднийг хол давах нь.  Харвард, Станфордын их сургуулиудын даруухан, хуучны гэмээр хотхонуудын хажууд Солонгосын Инчон, Хятадын Цинхуа их сургуулиуд боловсролын салбарт шинэ үнэр авчирч байна. Тэнд сурч буй залуусын сэтгэлгээ ч огцом хурдтайгаар өсч байна. Түүхэндээ анх удаа оюутны хотхондоо болох гэж буй бид энэ зэрэгт хүрэхгүй ч гэсэн тусгаж авах шинэ санаа энд олон буй аж.