МАН-ынхан дараагийн УИХ-д олон жил улс төрд хутгалдсан “акул”-уудаа шингээх гэж зүтгэсээр байгаа нь Сонгуулийн тухай хуулийг гацаанд оруулж, энэ асуудлыг зарим гишүүд өөрсдөө ч ойлгохгүй болж байгаа бололтой. Ирэх сонгуулийн системийн 48:28 гэсэн хувилбараас пропорциональ 28 тойрогт гишүүдийг яаж сонгох вэ гэдэг дээр санал нэгдэхгүй байсаар багагүй хугацаа өнгөрсөн. Тэгвэл хэдэн өдөр сэтгүүлчдэд тодорхой мэдээлэл өгөхгүй байсан хоёр намын бүлгүүд өнөөдөр ч бас хаалттай хуралдаж зарим асуудал дээр тохиролцож байгаа бололтой. Пропорциональ 28 тойрогт иргэд гишүүний нэрийг шууд дугуйлахгүй, намаас суудал хуваарилах тул ийнхүү маргаан үүсээд байгаа юм.
АН бусад 48 тойрогт нэр дэвшээд хамгийн их санал авсан гишүүдийг жагсааж сонгоно гэсэн бол МАН нам дотроосоо өөрсдөө сонгоно гэж байгаа. Тэгвэл олон хоног ярилцсаны эцэст МАН-ынхан АН-ын саналыг нааштайгаар хүлээж авахаар болсон ч зарим нэг босго тогтоохыг шаардаж байгаа гэнэ. Тэд улс төрд олон жил ажилласан байх гэх зэрэг өөрсдийн хуучин бууны хугархайнуудыг өөдөө гарахад шууд нөлөөлөх санал тавьж байгаа гэнэ. Хэрэв энэ саналыг АН хүлээж авахгүй гэвэл бас л Сонгуулийн тухай хууль батлагдаж чадахгүй болох тул МАН-ын хувиа бодсон шаардлагыг зөвшөөрч байгаа бололтой. Яаж ч бодсон бусад тойрогт өрсөлдөөд унасан ч бусдыгаа бодвол олон нийтийн дунд рейтинг өндөртэй хүнийг УИХ-д сонгох нь зөв баймаар. Тэр олон жил ажилласан, тэр нэр хүндтэй гээд хуучин “акул”-уудаа энэ суудалд тавиад байвал УИХ хэдхэн хүний л дархлаа тогтох гээд байна. Сонгуульд ялагдсан, дээр нь олон нийт хүлээн зөвшөөрөөгүй байлаа ч намын дарга, хөгшин гишүүн гээд энэ танхимд ороод байх нь утгагүй хэрэг. Үүнийг нь АН хүлээгээд авчихвал хоёр намын дарга нарын нэр шууд л дараагийн парламентын жагсаалтанд автоматаар орох нь тодорхой. Ямартаа ч хоёр эрх баригч нам С.Дэмбэрэл даргаас Сонгуулийн тухай хуулийг хугацаанд нь багтааж батлах үүрэг авсан, үүн дээр санал нэгтэй байгаа гэж АН-ын бүлгийн дарга Ч.Сайханбилэг хэлсэн юм. МАН, АН-ынхан тохиролцоогүй байгаа асуудлуудаа нягтлахаар ажлын хэсэг байгуулах болсон тул өнөөдөр УИХ-ын чуулганаар сонгуулийн хуулийг хэлэлцэхгүй, хойшлуулахаар боллоо.
Б.Баяр
