Ингэж хэлэхэд учир бий. Энэ сарын 7-ны өдөр Сүхбаатар дүүргийн шүүхээс Б.Тулгыг суллах шийдвэр гаргасан юм. Тиймээс уг хэрэгт хяналт тавьж буй прокурор О.Мөнхбаатар Б.Тулгын цагдан хорих хугацааг сунгахаар Сүхбаатар дүүргийн шүүх явахаар гарчээ. Харин түүний явах гэж байгааг прокурорын газраас хэн нэгэн албан тушаалтан Н.Энхбаярын чихэнд хүргэсэн бололтой. Цагдан хорих хугацааг сунгуулахад тодорхой цагийн хуваарьтай байдаг аж. Иймд жагсагчид О.Мөнхбаатар прокурорыг явуулахгүй, хоргоосоор байгаад цагийг нь дуусгасан байна. Үүнд эгдүүцсэн прокурор Сүхбаатар дүүргийн шүүгч Н.Сүхбаатар хууль бус шийдвэр гаргасан хэмээн гомдол гаргаад байсан. Мөн нийслэлийн прокурорын газраас “Шударга ёс хуульчдын холбоо”-ны гишүүд удаа дараагийн үйлдлээр эсэргүүцэл үзүүлж, прокурорын үйл ажиллагаанд хөндлөнгөөс нөлөөлөх оролдлогыг хийсэн. Тиймээс манай байгууллагын зүгээс хууль зөрчсөн үйлдэл гаргаж буй “Шударга ёс хуульчдын холбоотой хатуу хариуцлага тооцно. Мөн Сүхбаатар дүүргийн шүүгч Н.Сүхбаатар нь шударга бус шийдвэр гаргаж Б.Тулгыг хугацаанаас нь өмнө суллах шийдвэрийг гаргасан. Тиймээс шийдвэр гаргасан шүүгчтэй хариуцлага тооцох өргөдлийг холбогдох албан тушаалтанд хүргүүлж, Б.Тулгыг дахин баривчилж шалгах болно” гэдгээ мэдэгдсэн юм. Гэвч уг мэдэгдлийн дараа Сүхбаатар дүүргийн шүүх асуудлыг хэлэлцээд Б.Тулгыг үргэлжлүүлэн хорих шаардлагагүй гэх шийдвэрээ хэвээр үлдээсэн юм.
Б.Чимэг
