“Урт нэртэй телевиз” 25 цагийн мэдээллийн хөтөлбөрөө хүргэхэд бэлэн боллоо.
Дотор мэдээнд анхаарлаа хандуулна уу.
   УИХ-ын дарга Дэмбэрэл 76 нас хүртлээ алх цохиж тушаал гаргана гэж мэдэгдлээ. Тиймээс энэ зангаргаа харуулж “угаар” биш ээ, уучлаарай үзэгчдээ, эрх баригч “МАНАН”-гийханыг айлгаж сонгуулийн системийг өөрчлөх гээд байгаа юм бол бушуухан нэг тоо гаргаад ирээч, тэгэхгүй бол “үлээж” орхино шүү гэв. Тэд мэдлээ гүйцэтгэе гээд 48:28 гэсэн хольсон системийн тоог гаргаж ирсэн ч одоо хүртэл батлаагүй байна. Энэ талаар ордон дахь сэтгүүлч Махатма.Г-тай холбогдоё.
   -Сайн байна уу? “Урт нэртэй телевиз”-ийн үнэнч үзэгчдээ. Яг одоо манай 75 сонгуулийн системийг өөрчлөх талаар жижиг хуралдай хийж байна. Гэтэл “МАН”-ын залгаас “АН” тогоон дотроо биш хальж хагарлаа. Тэдний зарим нь хуучин системээр сонгууль явуулна хэмээв. Яагаад гэсэн асуултанд бүлгийн дарга Муухайбуу нь “I don’t know, sorry” гэсэн хариултыг өглөө.
   Дараагийн мэдээ. Авилгатай тэмцэх газрын “босс”-уудыг сонголоо. Даргаар нь уучлаарай үзэгчдээ, яанаа нэр самбар дээр харагддаггүй ээ, ямар ч гэсэн төмөр холилдсон нэр санагдаж байна харин дэд даргаар нь саяхан эх орондоо ирсэн Хурцыг тавьлаа.
   Ажилч хичээнгүй дарга нар маань тэр өдөртөө ажилдаа орж 10-аад хүнийг ажлаас нь халж, хоолноос нь салгасан байна. Авилга авдаг гээд халсан уу, аваагүй гээд халсан уу тодорхойгүй байна.  
   Багш нар цалигаа нэмүүлэхийг шаардаж, Боловсролын ҮЭ-ийн дарга том мэнгэт Батзоригоор ахлуулан жагсаал зохион байгууллаа. Дараагаар нь ҮЭ-ийн нэртэй хошин шог гардаг газарт салбарын сайд Ууганзовлон, манай сэтгүүлч Махатма.Г, санхүүгийн сайд /god father/ Зовлон-Үнс нарыг өлзийтэй сайн цагт уулзъя хэмээн урьсан ч мурисан байна. Ирээгүйд нь гомдож, бухимдалд буудуулсан багш нар хугацаагүй ажил хаялт хийхээ амлан, гараа зүсч, цусаа гарган тангараг өргөлөө.
   МАН-ын шинэ байр нээлтээ хийхээс өмнө дахин шатаж, угаар дээр утаа нэмлээ. Баталгаатай эх сурвалж болох “Central tower”-ын цонхыг угааж байсан “дөрвөн нүд”-тэй залуугийн мэдээлснээр дээвэр дээр нь намхан, нүдний шилтэй, богино хүзүүтэй, “change” гэсэн фудболк өмссөн нэгэн эр шүдэнз зураад зогсож байсан гэнэ. Юутай ч МАН-ыхан тогтсон өдрөө, товлосон цагтаа улаан тууз хайчилж чадсан. Нээлтэнд Титэм үг, Кран, олон Скай-ын эзэн, ялдам Үүрийн “цолмон”, үдшийн гялаан гэх мэтчилэн хүмүүс оролцлоо.
   Сумоч, бөх, наймаачин, барилгачин, барималчин, баллетчин гэх мэтчилэн хүмүүсээс бүрдсэн УИХ-ын 76-д өнгөрсөн дөрвөн жил цаасан дээр баригдсан цэцэрлэг, сургууль, эмнэлгээ гүйцээгээрэй гээд дахин 3, гурван тэрбумыг гаргаж өглөө. Манайхан чадах байх аа гэж алх барьсан дарга нь итгэж байгаагаа мөн илэрхийлсэн байна.
Гадар мэдээ.
   Кабулын “Шитийн бунханд” амиа золиослогч бөмбөг тэсэлсэн ч хэн ч үрэгдсэнгүй. Шинжээчид бөмбөгийг нь задалтал гаднаа “Made in Mongolia” гэсэн ч дотроо “sorry China” гэсэн байжээ.
   Германы канцлер “Ройтерс”-д өгсөн ярилцлагадаа ийн хэлжээ: “Монголын их хурлын танхимд үг хэлээд гарах гэтэл нэг залуу ирээд үнсдэг байгаа, ёоо шал сонин. Хамгийн муухай нь түүний амнаас загас үнэртээд байсан шүү дээ, за байз нэрийг нь Гүнбалай гэл үү дээ” гэсэн байна.
   АНУ-ын ерөнхийлөгч Б.Обама “Аль Жазера”-д өгсөн ярилцлагадаа “Одоо үед том жижгээ биш хурдан нь удаанаа барьж иддэг гэж Монголын ерөнхийлөгч надад онгирсон. Түүнийх нь хариуд урт гартай нь богино гартайгийнхаа нүүрийг хаадгийг үзүүлсэн. Санаандгүй бөгөөд санамсаргүй үйлдэл” гэжээ.
   Алдарт шог найрагч Цэнддоо манай телевизэд дараахь мэдээг ирүүллээ. Хурцыг Англиас гараад Германаар дайраад ирсний дараа Англи, Герман 2 дахин хүн амын тооллого хийсэн гэнэ.
Спортын мэдээ.
   Манай спортын сэтгүүлчдийг бүгдийг нь “Score” студийнхэн худалдаад авчихсан тул мэдээ алга.
   “Урт нэртэй телевиз”-ийн 25 цагийн мэдээллийн хөтөлбөрт анхаарлаа хандуулсан та бүхэндээ баярлалаа. Хэдхэн хормын зар сурталчилгааны дараа цаг агаарын мэдээнд анхаарлаа хандуулна уу.
30 минутын дараа цаг агаарын мэдээ танилцуулахаар хөтлөгч нь гарч ирлээ.