Засгийн газрын ордны баруун хаалганы гадна хэсэг хүмүүс цуглаж эсэргүүцлийн жагсаал хийж байна. Ордны харуул хамгаалалтын ажилчдыг түлхэж унаган төрийн ордон руу орон ерөнхий сайдтай уулзахыг хүссэн эдгээр хүмүүс Эрдэнэт хотод үйл ажиллагаагаа явуулдаг “Зэс эрдэнийн хувь” ХХК-ны хувьцаа эзэмшигчид гэнэ. Жагсагчид засгийн газрын тэргүүн С.Батболдтой уулзахыг хүсч байгаа юм байна. Эдгээр иргэд эрдэнэт үйлдвэрээс хаягдсан ашиглагддаггүй хүдрийн овоолгыг түшиглэн, цэвэр зэсийн үйлдвэр байгуулж ажиллахаар 2010 онд нэгдэж байжээ. Нийт 68 мянган иргэний дэмжлэгтэйгээр байгуулагдсан тус компанийн ажилчдын хүсч буй зүйл нь Эрдэнэтийн овоолгын ¼ -ны хувийг авах. Энэ зорилгынхоо дагуу “Зэс эрдэнийн хувь” төсөл боловсруулж зөвшөөрөл өгч болох шат шатны бүх газруудаар явсан боловч Эрдэнэт үйлдвэрийн удирдлагууд ашиглагддаггүй овоолгыг өгөхийг зөвшөөрөхгүй байгаа  юм байна. “Бид төр засгаас хөрөнгө мөнгө гуйлгүйгээр өөрсдөө санаачлага гарган ажиллая гэхэд дэмжихгүй байгааг нь гайхаж байна” хэмээн жагсагчид ярьж байна. “Зэс эрдэнийн хувь” компанийн хувьцаа эзэмшигчид өмнө нь ерөнхий сайдтай уулзаж санал хүсэлтээ хэлэхэд засгийн газрын тэргүүн эдгээр хүмүүсийн саналыг хүлээн авч асуудлыг шийдвэрлүүлэхээр төрийн өмчийн хороонд үүрэг даалгавар өгсөн байна. Төрийн өмчийн хороо цааш нь “Эрдэнэт” үйлдвэрийн захирал Ч.Ганзоригт үүрэгдсэн ч мань эр даалгаварыг тоосон шинжгүй яваа гэнэ. Өнөөдөр жагсаалд оролцож буй иргэд эцсийн шийдвэрийг засгийн газраар шийдүүлэхээр иржээ. Тэдний хүсэлтийг ерөнхий сайдын нарийн бичиг хүлээж авсан байна. Мөн эдгээр иргэд төрийн өмчийн хороонд хүсэлтээ гаргасан бөгөөд хариугаа 17:00 цагт хүлээн авах гэнэ. Засгийн газрын тэргүүн Индонезид айлчлаад ирээгүй байгаа билээ. Жагсагчид ерөнхий сайдтай уулзаж нааштай хариу сонстолоо тэмцэлээ үргэлжлүүлнэ гэж байна.

Т.Хулан