УИХ-ын гишүүн Ж.Батзандангийн төрийн өндөр албан тушаалтнууд оффшор данстай байх өөрчлөлтийг Нийтийн ашиг сонирхлын зөрчлийн тухай хуульд оруулах санал гаргасан ч байнгын хорооны хурал дээр дэмжлэг авалгүй унасан. Үүнийг УИХ-ын гишүүдийн олонхи нь гадаадад оффшор данстай тул дэмжсэнгүй хэмээн тэрбээр тайлбарласан.
   Харин үүнээс илүүтэйгээр Ж.Батзандан гишүүний төрийн өндөр албан тушаалтнууд гадаад, эхнэр нөхөртэй байвал илүү “хатуу” хандах тухай санаачлага олонхид таалагдсангүй. Тэрбээр УИХ-ын гишүүн, сайд нар гадаад эхнэр, нөхөртэй бол ҮАБЗ-д мэдэгдэж, Монгол улсын иргэн иргэн болгох ёстой гэсэн юм. Хэрэв төрийн өндөр албан тушаалтан л бол ийм хэмжээний золиос гаргаж хэрэгтэй хэмээн тодотгосон. Тэрбээр “Өнөөдөр УИХ-ын гишүүд нь хятад эхнэр, америк нөхөртэй байх нь нээлттэй байна. Монголын төрийн бодлого гэж байх хэрэгтэй. Өнөөдөр Соёлын сайдаар гадаад нөхөртэй хүнийг томилчихоод юун соёл, уламжлалаа хадгалж, хамгаалах тухай яриад байгаа юм бэ? Хүний эрх  гэдэг замбараагүй байх тухай ойлголт биш. Үндэсний эрх ашиг гэдэг ойлголт, үндэстнээ хамгаалах бодлого давхар явах хэрэгтэй” гэж нэг эмэгтэй сайдыг чимхээд авсан юм.