Монгол хүний дундаж наслалт 68.3 болж өссөн энэ үед Улаанбаатар хотын хүн амын эрүүл мэндийн салбарын өнөөгийн байдлын талаар ерөнхий сайд С.Батболд өчигдөр УИХ-ын нэгдсэн чуулганд мэдээлэл хийлээ. Эрүүл мэндийн статистик үзүүлэлтээс үзэхэд, буруу дадал зуршил, зан үйлээс хамааралтай гэгдэх амьсгал, хоол боловсруулах, цусны эргэлтийн эрхтэн тогтолцооны болон осол гэмтлийн шалтгаант өвчлөл нийслэлийн хүн амын өвчлөлийн тэргүүлэх шалтгаан болж байгаа гэнэ. Өнгөрсөн оны байдлаар хүн амын нас баралтын зонхилох таван шалтгаанд цусны эргэлтийн тогтолцооны өвчин, хавдар, гадны шалтгаант өвчлөл, хоол шингээх эрхтэн тогтолцооны өвчин, амьсгалын тогтолцооны өвчин оржээ. Жил бүр 100 000 хүн тутамд 134.5 хорт хавдар бүртгэгдсэний дотор шинээр оношлогдсон тохиолдлын 70 гаруй хувь нь 3-4 дүгээр шатанд буюу хожуу үедээ оношлуулж байна. Түргэн тусламжийн дуудлага жил бүр өсч 2010 оны дуудлага 2007 оныхоос 35,2 хувиар нэмэгдсэн. Үүний 76 хувийг гэнэтийн өвчлөл, 13 хувийг төрөхийн, 11 хувийг осол гэмтлийн дуудлага эзэлж буй аж.

   Нийслэл хотод жилд дунджаар 18-22 төрлийн халдварт өвчний 18000-19000 тохиолдол бүртгэгдэж, улсын хэмжээний халдварт өвчний 54 орчим хувийг эзлэх боллоо. Энэхүү өвчлөл дундаа гэдэсний халдварт өвчин, вируст гепатит, салхинцэцэг, сүрьеэ, бэлгийн замаар дамжих халдвар, томуу, томуу төст өвчин зонхилох хувийг эзэлж байгаа юм байна.

   Нийслэлийн эрүүл мэндийн салбарын хөрөнгө оруулалтын хэмжээ 2007 онд 1,8 тэрбум төгрөг байсан бол 2010 онд 8.2 тэрбум төгрөг болж өслөө. Барилгын засвар үйлчилгээнд зарцуулагдах хөрөнгийн хэмжээ 2007 онд 398,8 сая төгрөг байсан бол 2010 онд 2,7 тэрбум төгрөг, эмнэлгийн тоног төхөөрөмжийн хөрөнгө оруулалт 2007 онд 464,7 сая төгрөг байсан бол 2010 онд 2.2 тэрбум төгрөг, автомашины парк шинэчлэлийн хөрөнгө оруулалт 2007 онд дунджаар 38,9 сая төгрөг байсан бол 2010 онд 237.7 сая төгрөг болж өссөн. Харин 2011 оны эхний 10 сарын байдлаар 218,9 сая төгрөгийн 9 автомашин нийлүүлжээ.

   Улаанбаатар хотод одоогийн байдлаар дүүргийн эрүүл мэндийн нэгдэл найм, нэгдсэн эмнэлэг дөрөв, төрөлжсөн мэргэжлийн эмнэлэг тав, амаржих газар гурав, тосгоны эмнэлэг тав, хүүхдийн клиник сувилал дөрөв, бусад эмнэлэг найм , нийт 37 эрүүл мэндийн байгууллага, анхан шатны 124 өрхийн эрүүл мэндийн төв, хувийн хэвшлийн 998 эмнэлэг, сувилал, нийтийн болон эмнэлгийн үйлчилгээтэй 520 эмийн сан үйл ажиллагаа явуулдаг. Эдгээр эрүүл мэндийн байгууллагуудад 18843 эмч, сувилагч, эмнэлгийн ажилтнууд ажиллаж байгаа аж. 

   Нийслэлийн эрүүл мэндийн байгууллагуудын нийт санхүүжилтийн 60 хувийг улсын төсөв, 36 хувийг эрүүл мэндийн даатгалын сан, 3 хувийг төлбөртэй тусламж, үйлчилгээ эзэлж байна. Эдгээр санхүүжилтын зардлын 60 орчим хувийг цалин, нийгмийн даатгалын шимтгэл, 20 гаруй хувийг эмнэлгийн эм, хоолны зардал эзэлдэг байна.

   2008 оноос хойш дараах ажлыг хийж гүйцэтгэсэн гэдгийг ерөнхий сайд онцоллоо. Үүнд:

- Эх, нялхсын эндэгдлийг тууштай бууруулахын тулд Нийслэлийн амаржих газрууд, эх хүүхдийн эрүүл мэндийн төвийн санхүүжилтийг нэмэгдүүллээ. Үр дүнд нь 300 ортой эх хүүхдийн эрүүл мэндийн төв, 150 ортой гуравдугаар амаржих газар, Баянгол дүүргийн эрүүл мэндийн нэгдэл, Бороо гоулд компаний хөрөнгө оруулалтаар нэгдүгээр амаржих газрын 150 ортой өргөтгөлийг барьж эхэлжээ. Кувейтын төрийн сангийн буцалтгүй тусламжаар 150 ортой хүүхдийн төрөлжсөн эмнэлэг барих ажлын зураг төслийг хийж Кувейтын талд хүргүүлжээ.

- Нийслэлийн дүүргүүдэд түргэн тусламжийн салбар байгуулах зорилтын хүрээнд 2010 онд Баянзүрх дүүрэгт түргэн тусламжийн салбарыг ашиглалтад оруулсан. Энэ жил Сонгинохайрхан дүүргийнх ашиглалтад ороход бэлэн боллоо. Энэ хоёр салбар түргэн тусламжийн барилгад нэг тэрбум төгрөг зарцуулжээ.

- Хотын хэмжээнд вакцины хангалт, хадгалалт, тээвэрлэлт, аюулгүй байдлыг хангаж, 0-1 насны хүүхдийн 98 хувийг дархлаажуулалтад хамрууллаа.

- “Азийн хөгжлийн банкны Эрүүл мэндийн салбарын хөгжил хөтөлбөр-3” төслийн хүрээнд Сонгинохайрхан, Чингэлтэй дүүрэгт загвар хоёр өрхийн эмнэлгийн барилгыг ашиглалтад оруулж, эмч, мэргэжилтнийг сургах, дадлагажуулах, эрүүл мэндийн тусламж, үйлчилгээний чанар, хүртээмжийг сайжруулах чиглэлээр ажиллаж байгаа ажээ.

   2012 онд Эрүүлийн мэндийн сайдын төсөв 484.1 тэрбум төгрөгөөр батлагдсан бөгөөд хөрөнгө оруулалтад 116 тэрбум төгрөг үүнээс 25 тэрбум төгрөгийг эмнэлгийн дэвшилтэт технологийн тоног төхөөрөмж шинээр худалдан авахад зарцуулах юм байна.