УИХ-ын гишүүн Х.Баттулга, Ц.Нямдорж нарын маргаан үргэлжилсээр байна.

УИХ-ын гишүүн Ц.Нямдоржийг хоёр шатны шүүхээс УИХ-ын гишүүн Х:Баттулгын нэр төрд халдсан хэмээн үзсэн. Тиймээс түүнийг хэвлэл мэдээллийн хэрэгслээр дамжуулан Х.Баттулга гишүүнээс уучлал гуйх ёстой гэсэн шийдвэрийг шүүхээс гаргасан билээ. Гэвч Ц.Нямдорж гишүүн анхан болон давж заалдах шатны шүүхийн шийдвэрийг эсэргүүцэн, Улсын дээд шүүхэд давж заалдсан ч Чингэлтэй дүүргийн шүүхээс гаргасан шийдвэрийг хэвээр үлдээжээ.

  Хэргийг сануулбал, Ц.Нямдорж нь  “2011 оны гуравдугаар сарын 19-нд Х.Баттулга нууцаар Солонгос, Хятадын хамтарсан групптэй байгуулсан “Төмөр зам барих нууц гэрээ”-г мэддэг хүн Монголд бараг байхгүй.  Ямар учиртай юм бэ гээд хууль зүйн талаас нь шалгах гэхээр ийм гэрээ байгуулаагүй гэж худлаа хэлээд материалыг нь өгөхгүй байна. Энэ улсуудтай  уул уурхайн лицензийг барьцаалж гэрээ хийж байх үед Хятад улсын холбогдох яамны хүмүүс ирж санамж бичигт гарын үсэг зурсан. Хятадын салбарын дэд сайд нь Бээжингийн онгоцны буудал дээр буухад өчигдөр зурсан санамж бичиг  чинь хүчингүй шүү гэж Монголын талаас мэдэгдсэн. Энэ мэт хууль бус ажлаас нь болж Таван толгой гацчихаад байна. Гэтэл сүүлд нь төмөр замын ажил Ц.Нямдоржоос болж гацаж байна гэж мэдэгдэж байгаа нь буруу” хэмээн мэдээлж байсан билээ. Харин үүнийг Х.Баттулга гишүүн ор үндэсгүй худал мэдээлэл хэмээн хууль хяналтын байгууллагад хандаад буй нь энэ юм.