Төмөр замын асуудлаар “Херо” энтертайменттай хамтарч телевизийн нэвтрүүлэг хийн цацсанаасаа хойш нийгмийн анхаарлыг тэр чигтээ өөр дээрээ татаад байгаа хүн бол УИХ-ын гишүүн Х.Баттулга. Түүний хийсэн нэвтрүүлгээс болж УИХ дахь АН-ын бүлгийн гишүүд дотооддоо багагүй зөрчилдөж Х.Баттулгыг шалгуулах арга хэмжээ авахыг намын удирдлагуудаасаа шаардсан. Төрийн түшээдийн энэ шаардлага ч биеллээ олж Засгийн газраас мэдэгдэл гаргаж, Монгол Улсын Ерөнхийлөгч Х.Баттулгыг албан өрөөндөө дуудан авчирч хатуухан зэмлэл хүртээсэн билээ.

    Олон нийт түүний энэ үйлдлийн талаар сайн, муу янз бүрийн дүгнэлттэй байна. Ямартай ч Х.Баттулга өөрийн үзэл бодол, итгэл үнэмшлийн үүднээс санаа зорилго нэгтэй хүмүүсийн цуглуулан нэлээд сайн судалгаа, үндэслэлтэй нэвтрүүлэг хийснийг үнэлэх нь зүйтэй. Харин нөгөө талаас нарийн төмөр замын царигийг яагаад тавих ёстой вэ? гэсэн асуудлаар ийм хэмжээний уран бүтээл хийж чадахгүй байгаа. Түүгээр ч үл барам эрүүл мэтгэлцээнээр байр сууриа илэрхийлэхээс урьтаж уран бүтээлчдэд эрүүгийн хэрэг үүсгэхээр хүчирхийлсэн өнгө аястайгаар бодлогоо явуулахыг эрмэлзэж байгааг Монгол Улсын Ерөнхийлөгч хүртэл шүүмжлээд авсан билээ.

    Төр засгийн удирдлагууд, олон нийтийн дунд бий болсон янз бүрийн таамаглал, байр сууриас болж УИХ Засгийн газраас өргөн мэдүүлсэн төмөр замын бодлогыг баталж чадалгүй намрын чуулган хүртэл хойшлуулсан. Зөвхөн төмөр зам гэлтгүй, бусад чухал бодлогын асуудлуудаар УИХ дахь эрх баригчид дотооддоо ширүүн зөрчилдөх болж сөрөг хүчин болох МАН-ын зүгээс хүчтэй эсэргүүцэлтэй тулгарсаар  эрх баригчдийн засаглах чадамж суларсаар байгаатай хэн хүнгүй санал нийлэх биз ээ. Энэ бүхэнд үндэслэж энэ удаагий хаврын чуулганыг хамгийн үр бүтээл муутай чуулган байсан гэж дүгнэх хүмүүс олон байна. Төр засгийн нэгдмэл бодлого, намуудын зөвшилцөлгүйгээр эдийн засгаа урагш хөдөлгөх аргагүй болсон гэх байр суурийг ч зарим төрийн түшээд хэлээд амжсан. Тухайлбал УИХ-ын гишүүн С.Баярцогт “С.Бямбацогт “Эдийн засгийн эрчимжүүлэх 100 хоногийн төлөвлөгөө хэрэгжүүлэхийн тулд УИХ-д өндөр хэмжээний концесус үүсэх ёстой. Гэвч ойлголцол, зөвшилцөл бүрэлдэх шинжгүй байна. Өнгөрсөн хугацаанд хэлэлцэж ирсэн асуудлуудыг харахаа дэндүү харамсалтай санагдаж байна. Тиймээс улстөрийн намууд эдийн засгийн идэвхжүүлэх бодлогыг хэрэгжүүлэхийн төлөө яриа хэлэлцээрийг эхлүүлэх ёстой. 2009 онд Монголчууд хямралыг давж гарсан шалтгаан нь АН, МАН-ын хамтарсан Засгийн газар байсанд байгаа юм.  Одоо тийм биш байна. Тиймээс Засгийн газарт бүтцийн өөрчлөлт хийж МАН-ыг Засгийн газар урьж оролцуулаад хямралыг давж гаръя. МАН-тай өндөр хэмжээний яриа хэлэлцэл хийж байж асуудлыг давж гарна. Бидэнд Үндэсний эв нэгдлийн Засгийн газар хэрэгтэй. Энэ хэлэлцээрт орооч ээ гэж АН-ын дарга, Ерөнхий сайд, МАН-ын дарга нарт уриалж байна” гэж хэлсэн. Харин АН-ын удирдлагууд С.Баярцогтын хэлсэн энэхүү үгэнд маш түргэн хариу үйлдэл үзүүлж энэ бол зөвхөн хувь хүний байр суурь гэж тайлбарласан билээ. Ямартай ч буцаад МАНАН байгуулья гэсэн санааг С.Баярцогт намдаа түрүүлж гаргаад авсан. Тэгвэл түүний араас МАНАН байгуулах саналыг Х.Баттулга гишүүн дэвшүүлэх боллоо. Тэрээр цаашид ямар шийдэл олох вэ? гэсэн асуудалд

    2012 оны сонгуулиар энэ хүмүүсийг сонгосон. Хоёр жил болллоо. Өр ширэндээ баригдлаа. Монгол Улсынхаа төлөө нэг удаа нэгдэх цаг болсон. Тиймээс ард түмнээсээ авсан мандатаараа нэгдэх хэрэгтэй.  34 хүнтэй  АН, 26 хүнтэй МАН, арван хэдэн хүнтэй “шударга бус” гээд байгаа эвсэл, хоёр хүнтэй ИЗН, бие даагчид гээд ард түмнээс авсан мандатаар нь жагсааж тавиж байгаад гурван том нам нь засгаа байгуулах хэрэгтэй. Ингэж байж ард түмнээсээ уучлал гуйхгүй бол дараагийн сонгууль хүртэл амьдрал сайжрахгүй. Өнөө маргаашгүй, наадмын дараа энэ гурван нам уулзаж ярилцах хэрэгтэй. УИХ-д 40 хувийн  мандаттай МАН сөрөг хүчин байгаад байдаг, хоёр хүнтэй ИЗН засаг бариад байх юм. Нөгөө эрх ашиг хаана байна? Дөчин хувийн мандаттай МАН яахаараа сөрөг хүчин болдог юм. Ингэж нэг эрх ашиг дээр тогтож эдийн засгийн зөв бодлого руу орох хэрэгтэй.  Уг нь ийм бодлого өнгөрсөн дөрвөн жилд бид хэрэлдэн хэрэлдэн байж гаргасан, эдийн засаг, уул уурхай, арьс шийр, боловсруулах үйлдвэр, дэд бүтэц, хүнс гэх мэт бүгдийг нь гаргасан. Энэ бүхнээ нэг өдөр сууж байгаад яаж хэрэгжүүлэх талаараа ярилцах хэрэгтэй шүү дээ. Ийм үндэсний эвсэл байгуулах хэрэгтэй. Израйль улс ийм жишгээр явж байгаа” гэж байр сууриа илэрхийлжээ.

    Хамгийн хачирхалтай тэднийг эвлэлдэн нэгдэхэд уриалсан хэрнээ “би бол сөрөг хүчин байна, ард түмнийхээ дуу хоолойг” гаргаж ажиллана хэмээн мэдэгдээд авсан юм. Ийнхүү АН-ын нөлөө бүхий улстөрчид буцаад МАНАН байгуулах хэрэгтэй гэсэн байр суурийг ил далдаар хэлэх болж, наадмын дараа ирэх намрын налгар өдрүүдэд МАНАН-гийн тухай яриа газар авах шинжтэй боллоо.