Өнгөрсөн долоо хоногт УИХ-ын гишүүн Л.Цог, Г.Уянга нар  Ашигт малтмалын тухай хуулийг яаран батлах гэж буйг эсэргүүцэн сүр дуулиантай мэдээлэл хийсэн.

Тэд Ашигт малтмалын тухай хуулийн зарим заалтыг эсэргүүцэн мэдэгдэл хийхдээ “Уг хуулийг батлуулахаар АН-ынхан хүч түрэн зүтгэж байна. Эрх баригчид бусад намын бүлгүүдийнхээ байр суурийг уг хуулийн төсөлд тусгаагүй. Стратегийн чухал ордуудад төр хувиа эзэмшээд түүнээсээ ард иргэдэд хувь хүртээх нь зөв. Мөн байгалийн баялагтай ордоо төр үнэлэх ёстой. Үнэлсэн үнэлгээнийхээ дагуу хамтарч эзэмшдэг болох хэрэгтэй. Газар дээрх болон доорх баялаг нь ард түмний өмч гэж Үндсэн хуулинд заасан байдаг. Гэтэл тэр их баялагийг цөөн хэдэн мөнгөтэй хүмүүст хувиарлаж өгөх заалтыг Ашигт малтмалын тухай хуулинд тусгасан нь хууль зөрчсөн үйлдэл.   Ашигт малтмалын тухай хуулийн зарим заалтад нөөцийн хэмжээ нь тодорхой болсон стратегийн чухал орд, газруудыг хувийханы мэдэлд шилжүүлэх тухай заалт тусгагдсан. Түүнээс төр огт хувь эзэмшихгүй бөгөөд ард түмний эзэмших ёстой ордуудыг хувийнханы мэдэлд 100 хувь аваачих нь буруу" гэж хэлсэн билээ.  

Мөн хайгуулын лицензийг сэргээх талаар уг хуулийн төсөлд тусгасаныг эсэргүүцэн замбараагүй тараагдсан өмнөх хайгуулын лицензээ цэгцлэхийг шаардаж байсан юм.

Энэ мэт засч залруулах шаардлагатай маш олон заалт байхад АН-ынхан хүч түрэн уг хуулийн төслийг батлах гэж зүтгэж буй нь өөрсдийнх нь эрх ашиг, лоббитой холбоотой. Тиймээс энэ бүгд шударга бус зүйлийг “Шударга ёс” эвслийн бүлэг зогсоох ёстой. Хэрэв тэгэж чадахгүй бол “Шударга ёс” эвслийн бүлгээс гарна. Харин "Шударга ёс" эвслийн бүлэг тууштай байж чадаад уг хуулийг буцаан татуулж чадвал бүлэгтээ байж болох юм зэргээр тэд ярьсан. Мөн тэдэнтэй хамт бүлгээсээ гарах хэд, хэдэн гишүүн байгаа гэдгийг ч энэ үеэр дуулгасан билээ. Бүр тус хуулийг хүч түрэн баталбал олныг хамарсан жагсаал, цуглаан ч зохион байгуулахад бэлэн гэдгээ мэдэгдсэн.

Тэгвэл хоёрхон хоногийн өмнө буюу хаврын чуулганыг хаах өдөр дээрх хуулийг гишүүдийн олонхоор дэмжиж баталсан. Батлагдах үеэр “Шударга ёс” эвслийн бүлэг  юу ч хийж чадаагүй. Хамтарч засаг барьж байгаа гэдэг үүднээсээ дэмжээд явахаас өөр арга тэдэнд байсангүй. Тиймээс тус бүлэг Ашигт малтмалын тухай хуулийг байгаа чигээр нь дэмжсэн. Тус бүлэг Г.Уянга, Л.Цог гишүүдийн эсэргүүцээд байсан заалтууд ч өөрчлөлт оруулж чадаагүй юм. Нэгэнт нь бүлэг нь зоригтой хатуу байр суурьтай байж Ашигт малтмалын тухай хуулийг буцаан татуулж чадаагүй юм чинь одоо Л.Цог, Г.Уянга нарыг бүлгээсээ гарах байх гэсэн олон нийтийн таамаглал байна.

Хүмүүс та хоёрыг хэзээ бүлгээсээ гарах вэ гэдгийг харж байна. Учир нь ард түмний эрх ашигт нийцээгүй Ашигт малтмалын тухай хуулийг танай бүлэг дэмжээд баталчихлаа шүү дээ. Ийм байхад нь та бүхэн мэдэгдэл хийгээд бүлгээсээ гарчихвал “Шударга бус” эвслийг орхисон шударга гишүүд болно.

Хэрвээ гарахгүй бол шантаажны улс төрийг “Шударга ёс” эвслийн бүлгийн гишүүд хийлээ гэдэг онигооны нэрийг зүүнэ. Мөн “Шударга ёс” нэртэй ч  шударга бусаар ажилладаг гэх бүлгийнхээ нэрийг улам тодотгохоор байна. Ер нь “Шударга ёс” эвслийн бүлэг яагаад тус хуулийг эсэргүүцэж нэг ч үг дуугарлгүй баталчихав гэдэг үнэхээр сонин байна. Уг нь тус бүлгийн сонгуулийн үеэр амалж байсан амлалтыг зөрчсөн заалтууд ч тус хуулинд байсан шүү дээ. Энэ ч үүднээс хатуу байр сууринаас хандаж тус хуулиар завсарлага аван ирэх намар уужуу тайван хуулийг хэлэлцээд баталж болох байлаа. Гэтэл хамтарч засаг барьж байгаа гэдэг уяанд дөрлөгдөж нэрнийхээ эсрэг шударга бус шийдвэр гаргасанд нь олон нийт бухимдалтай байна.