Шинэ оны өмнө Засгийн газар автомашины онцгой албан татварыг хэд дахин нэмсэнээс болоод олон иргэн гааль дээрээс машинаа авахад хэцүү, авахгүй байхад хэцүү байдал үүсээд байна. Учир нь он гарахаас өмнө оруулж ирэхээр төлөвлөж захиалсан ч хил дээр саатсаны улмаас он гарсаны хойно орж ирсэн хуучин машиныг авахад анх төлөвлөснөөс өндөр татвар төлөх ёстой болсон байна. Хэрвээ ингэвэл өнөөдөр зах дээр буй машинаас илүү өндөр, наад зах нь нэг сая, үүнээс ч илүү төгрөгийн үнийн зөрүү төлж байж машинаа авах болж байгаа юм. Өөрөөр хэлбэл, гааль дээр буй машинаа авалгүй орхиод зах дээрээс авбал алдагдал нь бага тусна гэсэн үг. Энэ талаар тодруулахаар Гаалийн ерөнхий газрын хяналт бүрдүүлэлтийн газрын ажилтнуудад хандсан боловч тэд тайлбар өгөхөөс татгалзав. Харин тус газрын олон нийттэй харилцах албаны мэргэжилтнээс цөөн хэдэн асуултанд хариулт авлаа.
- Яг хэчнээн машин эзэддээ очиж чадалгүй гацчихаад байгаа юм бэ?
- Тэр тоо баримтыг хэлэх боломжгүй.
- Оноос өмнө захиалсан машинууд хил дээр саатаад, оноос хойш орж ирсэн тохиолдолд иргэд тэдгээр хуучин машиныг зах зээлийнхээс өндөр үнээр авахаас аргагүйд хүрч байна. Энэ асуудлыг танайх яаж шийдэх вэ?
- Яг энэ асуудлыг шийдвэрлэхээр хийсэн ажил байхгүй. Оноос өмнө, хойно гэдэг асуудал бол хамаагүй шүү дээ. Тухайн цаг үед ямар шийдвэр гарна, түүнийгээ л дагана. Тянжинаас Замын-Үүд хүртэл 4-5 хонодог. Энэ асуудалд гаалийн байгууллагын буруу байхгүй.
- Тэгээд аль байгууллага буруутай юм?
- Тээврийн байгууллага буруутай. Гаалийн байгууллага бол энэ асуудалд хамаагүй. Манайх бол хэзээ, ямар хууль тогтоомж гарна, түүнийг л хэрэгжүүлдэг байгууллага. Тээвэрлэлтийн байгууллага ямар нэгэн байдлаар хариуцлага хүлээх ёстой.
- Оны өмнө захиалсан боловч он гарсан хойно орж ирсэн машинуудын татварыг хуучнаар нь байлгаж болохгүй юу?
- Энэ асуудлыг гааль мэдэхгүй. Засгийн газар л шийднэ.
- Танайх эдгээр хүмүүсийн санал гомдлыг Засгийн газарт хүргэсэн үү?
- Үүнийг бол хүмүүс өөрсдөө их хэлж ярьж байгаа юм байна лээ. Манайхаар дамжуулж ч хэлж байна. Дамжуулахгүй өөрсдөө ч санал гомдлоо гаргаж байгаа юм байна лээ.
- Эзэд нь машинаа авч чадаагүй тохиолдолд танай байгууллага дуудлага худалдаагаар зардаг юм байна лээ. Хэдий хэр хугацаа өнгөрсөний дараа зардаг юм бэ?
- Үүнийг мэдэхгүй байна. Гаалийн хуулин дээрээс л харна даа.
- Өмнө нь ийм асуудал гарч байсан уу?
- Хоёр жилийн өмнө ийм асуудал гарч байсан. Замын-Үүд дээрээс ачаа хотод ирэхэд их уддаг. Тэр хоёр гурван хоногийн зөрүүнд татвар нь нэмэгдсэн. Үүнээс болоод маш олон хүн машинаа авч чадаагүй хаясан. Бараг 70-аад хүн.
Т.Хулан
Сэтгэгдэл (1)