Шударга өрсөлдөөн хэрэглэгчийн төлөөх газраас үнээ хууль бус замаар нэмсэн шатахуун импортлогч компаниудтай хуулийн хариуцлага тооцох шаардлагыг гаргажээ.
Уг шаардлагад “Газрын тосны бүтээгдэхүүний худалдаа эрхлэгч НИК ХХК, МАГНАЙ ТРЕЙД ХХК, СОДМОНГОЛ ГРУПП ХХК, ЖАСТ-ОЙЛ ХХК, ШУНХЛАЙ ГРУПП ХХК, ОЙН БИРЖ ХХК, М-ОЙЛ ГРУПП ХХК, ПЕТРОВИС ХХК-ууд 2012 оны нэгдүгээр сарын 06-ны өдөр эрдэс баялаг эрчим хүчний яаманд хуралдаж, зах зээлд борлуулж байгаа бүтээгдэхүүнийхээ үнийг нэмэхээр хэлэлцэж, улмаар нэмэгдүүлсэн нь өрсөлдөөний тухай хуулийн 11.1.1-д заасан “Бараа бүтээгдэхүүний үнийг хэлэлцэн тогтоохыг хориглоно” гэсэн заалтыг зөрчсөн нь тогтоогдсон байх тул гэм буруутай дээрх аж ахуй нэгжүүдэд өрсөлдөөний тухай хуулийн 27.1.1-д заасан захиргааны шийтгэлийг оногдуулах шийдвэрлэсэн байна. Иймд хууль тогтоомж зөрчиж бараа бүтээгдэхүүнийхээ үнийг хэлэлцэн тогтоосон байдлаа таслан зогсоож, өөрийн өртөг зардалдаа үндэслэн өөрийн бүтээгдэхүүний үнээ нэмсэн үнийг тогтоосон бие даасан шийдвэрээ танилцуулж, 2012 оны 01 сарын 18-ны дотор хариу мэдэгдэхийг шаардаж байна. Шаардлагыг эс биелүүлвэл өрсөлдөөний тухай хуулийн 27.1.8-д заасан захиргааны шийтгэлийг ноогдуулна.
Улсын ахлах байцаагч У.Батсуурь
Улсын ахлах байцаагч С.Цогтгэрэл
Улсын байцаагч М.Мөнхбаяр
Улсын байцаагч У.Дэлгэрмаа” гэжээ.
Б.Чимэг
