Улсын их баяр наадмын босгон дээр манай сайтын сурвалжлах баг Сүүж уулын амралтад наадмын бэлтгэлээ хангаж буй Завхан аймгийн бөхчүүдийг зорьсон юм. Ийнхүү наадмын бэлтгэл сургуулилтынх нь талаар Аймгийн арслан П.Өсөхбаатартай ярилцлаа.

-Сайхан зусаж байна уу? Баяр наадмын бэлтгэлээ хэзээнээс хангаж байна вэ? 

-Сайхаан, сайхан зусаж байна уу. Наадмын бэлтгэлийн оргил үед 60 гаруй бөх галд гарсан. Аймаг сумд барилдах бөхчүүд бэлтгэлээсээ буусан. Одоо улсын наадамд барилдах 20 орчим бөхчүүд бэлтгэлээ хангаад Сүүж уулынхаа амралтад байна. 

-Наадам болоход хэдхэн хоног үлджээ. Ер нь бэлтгэл жигдэрч байна уу? 

-Бэлтгэл сайхан жигдэрч байна. Энэ жил хоёр дэвжээ маань нэгдээд, бөхчүүд их өнгөтэй байна. Сүүлийн араваад жил нийлж бэлтгэлд гараагүй байсан.

Шинэ цолтон төрч, цолоо ахиулах байх гэж бодож байна. Мөн манай галаас төрийн наадмын үзүүр түрүүнд үлдэх бөхчүүд бий гэдэгт итгэл дүүрэн байна. 

-Тухайлбал, цолоо ахиулах бөхийг хэн, хэн гэж харж байна вэ? 

-Аймгийн арслан Батбаатар, Нармандах, Мөнхтогтох Болдбаатар нарыг улсын цолонд хүрнэ гэж харж байна даа. 

-Завхан Даян дэвжээний галыг хэн ахалж байгаа вэ? 

-Галыг Монгол Улсын гарьд Б.Гончигдамба ахалж байна. 

-Сүүж уулын амралтад хэдэн жил галд гарч байна вэ?

-Хамгийн сүүлд 2017 онд гарч байсан. Тав, зургаан удаа Сүүж уулын амралтад бэлтгэлээ базаасан. Сүүж уулын амралтад бэлтгэлээ хийж олон сайхан аварга арслангууд төрсөн буянтай газар л даа. Газар зүйн байрлалын хувьд ч бэлтгэл сургуулилтаа хийхэд тохирсон газар гэж боддог. 

-Та наадамчин олондоо мэндчилгээ дэвшүүлэхгүй юу? 

-Наадмын өдөр аз од нь гийсэн бөхчүүд аавын хүүхдүүдийг ногоон дэвжээ маань ивээж, хүссэн цолондоо хүрч барилдах байх. Тэнгэр заяат Монголчууд маань сайхан наадаарай. 

-Ярилцсанд баярлалаа. 

Д.Батчулуун