Батлан хамгаалахын сайд Ж.Энхбаярыг огцруулах хүсэлт гаргасан тогтоолын төслийг УИХ-ын гишүүн Э.Бат-Үүл, Р.Гончигдорж нар УИХ-ын дэд дарга Г.Батхүүд өглөө. Батлан хамгаалах яамны өөрөөс нь бусад ажилчид цэргийн хүн байх ёстой гэж хэвлэлээр мэдэгдсэн нь иргэдэд айдас түрүүлж, 1996 оноос хойш явагдсан тус яамны шинэтгэлийг гуйвуулж байна гэж АН-ын гишүүд үзжээ.

- Ж.Энхбаяр сайдын асуудлыг шалгасан ажлын хэсгийн гишүүд ямар дүгнэлтэд хүрээд огцруулах саналаа гаргаж байна вэ?
- Ажлын хэсэг Батлан хамгаалах яаманд болж байгаа үйл явдлын талаар албан тушаалтнуудаас нь мэдээлэл авч ажилласан. Бид энэ асуудлыг судлаад Ж.Энхбаяр сайдыг огцруулахаас өөр аргагүй байдалд хүрсэн. Монгол улсын зэвсэгт хүчин иргэдийнхээ эсрэг үйл ажиллагаа явуулах, тодорхой байршлуудыг зэвсгээр хангах гэх зэрэг байр суурийг Ж.Энхбаяр сайд хэвлэл мэдээллийн хэрэгслээр илэрхийлсэн байсан. Долоон сарын нэгний үйл явдал шиг зүйл болвол зэвсэгт хүчин байлдааны бэлэн байдалд байх ёстой гэсэн цочирдмоор зүйл ярьж байна. Сайд мэдэхгүйдээ тэгэж байгаа юм биш. Монгол улсын зэвсэгт хүчин бол Үндсэн хуулиар улс орноо гадны халдлагаас хамгаалах үндсэн чиг үүрэгтэй. 1990 онд өлсгөлөн зарлаад байх үед байлдааны бэлэн байдал зарлагдсан байдаг. Биднийг жагсаж байхад хэзээ ч буудчихаж мэдэхээр байсан тэр цаг үетэй адил сэтгэж байна. Бидэнд тийм болзошгүй бууны амны доор ардчилсан хувьсгалыг хийж байсны хувьд ямар аюултай үр дагавар гарахыг мэдсээр байж зүгээр суух эрх байхгүй.

- АН-ын тавьж байгаа энэ саналыг улс төрийн халаа сэлгээтэй холбоотой гэж Ж.Энхбаяр сайд хэлсэн байсан?
- Халаа сэлгээ бол жижигхэн асуудал. Батлан хамгаалах  яам бол Монгол улсын төрийн захиргааны төв байгууллага. Ажилчид нь төрийн албан хаагчийн статустай үйл ажиллагаагаа явуулдаг. 1996 онд АН анх олонхи болоод зэвсэгт хүчнийг иргэний удирлагатай болгохын тулд Батлан хамгаалахын сайд нь энгийн хүн байна гэж зааж өгсөн. Гэтэл сайд нь би ганцаараа энгийн, бусад нь цэргийн хүн байх ёстой гэсэн цэрэгжсэн байгууллагаар төрийн албан хаагчдыг ойлгоод байна. Энэ ойлголтоороо боловсон хүчний бодлого явуулж байна. Тиймээс 1990 оны өмнөх шиг эрсдэлтэй байр суурийг баримталж, Монгол улсын хуулийн эсрэг, хуулийг зөрчих сэдэл гаргаж байгаа нь аюултай гэж үзсэн учир энэ төслийг өргөн барилаа.

-  Намрын чуулган завсарласан болохоор хэзээ энэ саналын хариуг авах вэ?
- Хуулийн дагуу долоо хоногийн дотор холбогдох байнгын хороогоор хэлэлцээд дараа нь долоо хоногийн дотор УИХ-ын чуулган хэлэлцэн шийдвэрлэнэ. 7-р сарын нэгэн бол монголчуудад их эмзэглэл төрүүлсэн. Өнөөдөр тэр үетэй адил зэвсэгт хүчнийг бэлдэнэ гэдэг гэж байгаа нь монголын ард түмнийг зэвсэгт хүчиндээ итгэх итгэлийг алдагдуулж, Цагаан сарын баяраар айдас хүйдэстэй байхад хүргэж байна. Тиймээс монголчууд маань Цагаан сарын баяраа айдас хүйдэсгүй тэмдэглээсэй гэж хүссэн.