Чухал хуулиудыг батлахдаа бөөнддөг, бөөндөхдөө эрх баригч намууд нь наймаа тохиролцоо хийдэг жишиг дахин давтагдах гэж байна. Даваа гарагт эхлэх УИХ-ын ээлжит бус чуулганыг гуравдугаар сарын есөн хүртэл үргэлжлүүлнэ гэж УИХ-ын дарга захирамж гаргасан ч энэ хугацаа наашилжээ. Эрх баригч намуудын хооронд хамгийн их маргаан дэгдээгээд байгаа УИХ болон Орон нутгийн сонгуулийн тухай хуулийг хамт хийх хуулийн төслийн анхны хэлэлцүүлэг ч явагдаагүй байхад эцсийн хэлэлцүүлэгийг лхагва гарагт хийхээр хуваарь гаргажээ. Өөрөөр хэлбэл энэ хууль гурван хоногийн дотор гарна гэсэн үг. УИХ-ын сонгуулийн тухай хуульд мөнгө төгрөг тараахгүй, шоу зохион байгуулахгүй гэсэн сонгуулийг будлиангүй явуулахад чухал хэдэн заалт орсон. Харин тэр нь Орон нутгийн сонгуулийн хуульд байхгүй. Тиймээс энэ хоёр сонгуулийг хамтад нь явуулах хэрэгтэй гэж АН-ын гишүүд үзэж байгаа юм. Харин МАН хоёр сонгуулийг зэрэг явуулбал ачаалал ихсэх тул боломжгүй хэмээн маргаж байсан. Аймаг, дүүргийн засаг дарга нарыг сонгоно гэдэг бол чухал асуудал. Анхаарал, цензур тавихгүй бол ямар хүмүүс  төрийн албанд гарч болохыг өнөөдөр АТГ-т шалгагдаж, хэрэг нь илэрсэн засаг дарга нар харуулж байна. Мөн доод шатандаа хахууль авч, хүнд суртал гаргадаг, “хурган” дарга нарыг ч дахин сонгох болж байна. УИХ-ын гишүүдийг мөнгө тарааж, шоу зохион байгуулж болохгүй гэж хуулинд нь заагаад өгчихсөн болохоор тойрог руугаа сүнгэнэх нь бага байлаа. Харин “хурган” дарга нар Цагаан сарын үеэр харин ч нэг бэлэг тарааж байсан. Авсан, өгсөн нь нэр устай нь дэлгэхгүй байгаа л болохоос тэд өмнөх жилүүдийн жишгээр л сурталчилгаагаа хийгээд эхэлчихсэн байна. Гэтэл үүнийг таслан зогсоох ёстой хуулийг гуравхан хоногт гаргах гэж байгаа нь бас л хуудуутай хууль болохын шинж болов. АН-ынхан МАН-ын хоёр сонгуулийг тусад нь явуулна гэсэн саналыг яасан ч зөвшөөрөхгүй. Эс бөгөөс аймаг, дүүргийн засаг даргын сонгуулийг УИХ-ын сонгуультай хамт хийж, сум, баг, хороодын сонгуулийг тусад нь явуулна гэсэн санал гаргаж байсан. Энэ нь намрын чуулганы үеэр МАН-ын гишүүдийн дэмжлэгийг аваагүй билээ. Ийм олон гацаа, асуудал байхад гуравхан хоногийн дотор шийдэх гэж байгаа нь хоёр нам өнгөн дээрээ жүжиг тавиад, цаанаа ямар заалтыг яаж оруулахаа тохиролцчихсон байгааг харуулж байна. Гурав хоногийн дотор гарсан хууль нь гурван хоногийн настай л биш байгаасай.