2008 оны долдугаар сарын 1-ний үймээний үеэр галт зэвсэг хэрэглэсний улмаас дөрвөн хүний амь нас хохирч, зургаан хүний биед хүнд, хүндэвтэр, хөнгөн гэмтэл учруулсан хэрэгт буруутгагдсан цагдаагийн экс дарга нарт холбогдох шүүх хурал энэ сарын 14-нд болно. Хэдийгээр өнгөрсөн сарын 27-нд болох байсан ч шүүгдэгч Ч.Амарболдын өмгөөлөгч О.Алтангэрэл тухайн үед Ерөнхийлөгчөөр ажиллаж байсан Н.Энхбаяр, Ерөнхий сайд асан С.Баяр, Үндэсний аюулгүй байдлын зөвлөлийн гишүүн асан Д.Лүндээжанцан, Хууль зүй, дотоод хэргийн сайд асан Ц.Мөнх-Оргил нарыг гэрчээр оролцуулах хүсэлт тавьснаар хойшилсан юм.
Тиймээс Сүхбаатар дүүргийн шүүхээс өнгөрсөн баасан гаригт тус эрхмүүдэд шүүхийн зарлан дуудах хуудсыг нь хүргүүлсэн байна. Харин Ерөнхийлөгч асан Н.Энхбаярт шүүхийн зарлан дуудах хуудсыг хүргүүлээгүй гэнэ.
Өмгөөлөгчийн хүсэлтийн дагуу дуудагдсан тус албан тушаалтнууд шүүх хуралд заавал биечлэн оролцох албагүй. Гэрчийн мэдүүлгээ бичгээр ч уламжилж болох гэнэ. Мөн хэрэгт хяналт тавьж буй прокурор тэднийг нарыг шүүх хуралд оролцуулах шаардлага байхгүй, хавтаст хэргийн хүрээнд хянан хэлэлцүүлнэ гэж үзэж байгаа бол шүүх бүрэлдэхүүнд энэхүү хүсэлтээ уламжлах эрхтэй.
Шүүх бүрэлдэхүүн гэрчээр оролцож буй хүмүүсийг зайлшгүй шүүх хуралдаанд оролцуулах ёстой гэсэн шийдвэрт хүрвэл тэднийг хуулийн хүрээнд дуудах, хүрэлцэн ирэхгүй бол албадан ирүүлэх арга хэмжээ авна гэжээ.
Б.Чимэг
