-
2016 оны 6 сарын 02
ОХУ-д 2 жил хоригдож байгаад В.Путины өршөөлөөр суллагдсан Украйны нисгэгч Надежда Савченко мягмар гаригт парламентын гишүүний тангаргаа өргөлөө. Надежда Савченко ОХУ-д хоригдож байхдаа буюу 2014 онд парламентын гишүүнээр сонгогдож байсан юм. Тэрээр тангараг өргөх үеэрээ парламентын гишүүний хувьд ОХУ-д улс төрийн хэргээр хоригдож байгаа Украйны иргэдийг суллах тал дээр гол анхаарлаа хандуулж ажиллах болно хэмээн хэлсэн байна. Тэрээр 2014 оны 6 дугаар сард зүүн Украйнаас баривчлагдсан бөгөөд В.Путины өршөөлөөр өнгөрсөн долоо хоногт суллагдан, эх орондоо хүрэлцэн ирсэн билээ.
-
2016 оны 6 сарын 02
Өчигдөр Олон Улсын Хүүхдийн Эрхийг Хамгаалах Өдөр тохиосон. 1950 оноос эхлэн тэмдэглэж ирсэн энэхүү олон улсын өдрийг дэлхийн 50 орчим улс оронд тэмдэглэдэг уламжлал тогтоод даруй 60 гаруй жил өнгөрч байна. Ялангуяа хуучин социалист лагерийн гэгддэг улс орнуудад уг баярыг өргөн хэмжээнд тэмдэглэдэг бөгөөд үзэгч та бүхэндээ энэ жил манай 2 хөршид хүүхдийн баярыг угтаж ямар ямар арга хэмжээнүүд явагдсан талаарх мэдээллийг бэлтгээд байна.
БНХАУ - Бээжин
БНХАУ-ын дарга Ши Жиньпин Олон улсын хүүхдийн баярын өдрийг тохиолдуулан Зүүн Хятадын Тэнгисийн арлууд дээр ажиллаж байгаа албан хаагчдын хүүхэд, багачуудад баярын захидлыг даваа гаригт илгээсэн байна. Тэрээр мэндчилгээндээ ”10 жилийн өмнө Дачений арлуудад зочилж, арлын ахмадуудтай буюу хүүхэд багачууд та бүхний өвөө, эмээ нартай уулзаж байсан бөгөөд тэд үнэхээр сайхан хүмүүс байсан” хэмээн бичсэн байна. Захидлын хариуд арлын хүүхдүүд өвөө эмээгийнхээ нэр алдрыг мөнхлөхийн төлөө сайн суралцаж, улс эх орныхоо хөгжилд хувь нэмэр оруулах болно хэмээн хэлсэн байна. Дачений арлууд нь Зежиань мужийн Тайжоу эргийн дагуу байрладаг бөгөөд 1956 онд 467 сайн дурын албан хаагчид тус арал дээр очиж суурьшсан түүхтэй юм байна.
БНХАУ-ын нийслэл Бээжин хотноо мягмар гаригт Олон улсын хүүхдийн эрхийг хамгаалах өдрийг угтсан олон арга хэмжээнүүд зохиогдсон байна. Эдгээрийн нэг нь ерөнхий боловсролын сургуулийн бага ангийн сурагчдын замын хөдөлгөөний дүрмийн үзүүлэх тоглолт байлаа. Энэ өдөр мөн Хятадын баруун өмнөд хэсгийн Чонгкин хотын хүүхэд багачуудын дунд хүрээлэн буй орчныг хайрлаж, хамгаалах сэдвээр зургийн уралдаан явагдсан байна. Хүүхдүүд байгальд хоргүй хөвөн даавуун уутан дээр хүрээлэн буй орчныг хамгаалах сэдвийн дагуу зураг зурж, уралдсан байна. Энэ үеэр сурагчид замын цагдаагийн зохицуулалт, дохио зангааг үзүүлж сонирхуулсан байна. Харин тус улсын Ганьсу мужийн Ланжоу хотын хүүхэд, багачууд мягмар гаригт зохион байгуулагдсан Вейчи буюу го даамны тэмцээнд оролцсон байна.
ОХУ - Москва
Олон улсын хүүхдийн эрхийг хамгаалах өдрийн хүрээнд манай хойд хөрш ОХУ-ын нийслэл Москва хотод өчигдөр хүүхэд багачуудад зориулсан маш олон арга хэмжээнүүд явагдсан байна. Хөтөлбөрийн дагуу Сокольники цэцэрлэгт хүрээлэнд зайрмагны баяр, Красная Пресня цэцэрлэгт хүрээлэнд хүүхдийн хөгжмийн наадам, Бауманы нэрэмжит цэцэрлэгт хүрээлэнд Москва хотын урлагийн сургуулиудын нэгдсэн тоглолт, Эрмитажийн цэцэрлэгт хүрээлэнд балетийн тоглолт явагдана гэсэн бол мөн хотын амьтны хүрээлэнд хүүхдийн баярт зориулсан томоохон хэмжээний тоглолт зохион байгуулагдана гэсэн байна. Өчигдөр мөн Москва хотын метронд бүтэн өдрийн турш хүүхдийн дуунуудыг эгшиглүүлж байгаа бөгөөд буудал, зогсоол бүрт хүүхэд багачуудад баярын мэндчилгээ дэвшүүлжээ.
Швед - Стокгольм
Америкийн зохиолч Мег Рософф энэ долоо хоногт Шведийн хүүхдийн зохиолч Астрид Лингдрений нэрэмжит шагналыг хүртлээ. Мег Рософф анхныхаа бүтээлийг 2004 онд гаргаж байсан бөгөөд тэр үеэс хойш өнөөдрийг хүртэл нилээд хэдэн ном, зохиол бичиж гаргасны дотор хүүхэд багачуудад зориулсан 6 зохиол, зурагт номуудыг гаргасан байна. Мег Рософф Стокгольм хотноо шагналыг гардан авах үеэрээ Швед улсын дотоод бүтэц, зохион байгуулалтыг магтсанаас гадна мөн Их Британий засгийн газрыг шүүмжилсэн байна. Тэрээр Швед улсыг хүүхдийн ном, зохиол болон хүүхэд багачуудын хүсэл мөрөөдөлд онцгой анхаарал хандуулдаг явдлыг сайшаан магтсан бол эсрэгээрээ чөлөөт цаг олгодоггүй, зөвхөн хичээл, шалгалтыг хүүхдүүдэд чухалчилж, ойлгуулдаг Их Британий бодлогыг буруушаасан байна. Астрид Лингдрений нэрэмжит шагналыг Шведын засгийн газрын санаачилгаар 2002 оноос эхлэн олгож хэлсэн юм. Дэлхийн хүүхдийн зохиолчдод гардуулдаг уг нэр хүндтэй, томоохон шагналыг 5 сая шведын крон дагалддаг байна.
-
2016 оны 5 сарын 30
Украйны нийслэл Киев хотоос 42 км-ийн зайд орших Литочки тосгоны өндөр настнуудын асрамжийн байранд гал гарсны улмаас 17 хүн амь үрэгдэж, 5 хүн бэртэж гэмтсэн талаар тус улсын онцгой байдлын албанаас мэдээллээ. Галын улмаас эвдэрч сүйдсэн уг хоёр давхар барилгын гэрэл зургуудыг тус албанаас нийтэлсэн бөгөөд одоогоор галын шалтгааныг олж тогтоогоогүй байгаа гэжээ. Галыг унтрааж, ахмадуудыг аврах ажиллагаанд мэргэжлийн болон мэргэжлийн бус 150 гаруй хүн оролцсон талаар тус албанаас гаргасан мэдэгдэлд дурьдсан байна. Украйн улсын засгийн газраас галын шалтгааныг олж тогтоох тусгай хороог байгуулах шийдвэрийг гаргасан байна.
-
2016 оны 5 сарын 30
Дэлхийн хамгийн хүнд жинтэй охин Энэтхэгийн Карнатака мужид энэ долоо хоногин даваа гаригт мэндэлсэн байна. 6.8 кг жинтэй төрсөн уг бяцхан охины ээж 19 настай Нандини Карнатака мужийн Хассан хотын эмнэлэгт кесарево хагалгаа хийлгэн охиноо төрүүлсэн байна. ”25 жил эрүүл мэндийн салбарт ажиллахдаа ийм хэмжээтэй хүүхэд төрөхийг огт хөрж байсангүй ээ, үнэхээр гайхалтай, миний энэ охин зөвхөн Энэтхэг улсад төдийгүй дэлхийн түүхэн дэх хамгийн их жинтэй мэндэлсэн хүүхэд болж байгаа байх” хэмээн хотын эрүүл мэндийн албаны дарга, доктор Венкатеш Ражу сэтгэгдлээ хуваалцсан байна. Охиныг эмч нар эрчимт эмчилгээний тасагт байрлуулан, түүний биеийн байдлыг ажиглаж байгаа бөгөөд ойрын өдрүүдэд гэрт нь гаргана гэсэн байна. Эх, охин хочрын биеийн байдал сайн байгаа бөгөөд охинд одоогоор нэр өгч амжаагүй байгаа гэсэн байна.
-
2016 оны 5 сарын 29
Антарктидэд байрладаг судалгааны баазуудын хог хаягдал нь далайг бохирдуулж ургамал, амьтны аймагт нөлөөлж байгааг Австралийн шинжээчид тогтоожээ.
-
2016 оны 5 сарын 29
Хятадад Apple корпорацид iPhone, Samsung-т ухаалаг утас үйлдвэрлэж өгдөг Foxconn компани үйлдвэрлэлдээ роботыг нэвтрүүлсний ачаар 110 мянган ажилтнаа 50 мянга болтол нь цөөлж чаджээ. иЭнэ жишээг бусад компаниуд дагажэхлэххэрэгтэй’’хэмээн Куньшань хотын захиргааны төлөөлөгч Сю Юлянь ярилаа. Хятад улс роботыг үйлдвэрлэлд нэвтрүүлэхтал дээр ихээхэн ахиц гаргаж байна.
-
2016 оны 5 сарын 27
Хүйтэн дайны үеийн зөвлөлтийн арга барил бүхий хэв маягтай оросын тагнуулын сүлжээний гишүүний шүүх хурал лхагва гаригт явагдлаа. АНУ-ын банкны системийн талаар тагнуулын үйл ажиллагаа явуулж байсан хэрэгт Оросын банкны мэргэжилтэн, 41 настай Евгений Буряковыг буруутай хэмээн шүүхээс шийдвэр гаргаж, түүнийг 2.5 жил шоронд хорих ялыг шүхээс оноосон байна. АНУ-ын холбооны бүсийн шүүгч Ричард Берман мөн 10000 ам.долларын торгуулийг түүнд ногдуулсан байна. Яллагчид түүнийг дипломатуудтай холбоо үүсгэн, тэдэнтэй хамтран ОХУ-ын банкнуудын эсрэг АНУ-ын зүгээс тавьж болзошгүй хоригийн талаар эдийн засгийн тагнуулын мэдээллүүдийг цуглуулж байсан болон АНУ-ын эрчим хүчний өөр эх үүсвэр, хувилбар, нөөц бололцоог хайж эрэлхийлж байгаа талаарх мэдээллүүдийг цуглуулж байсан хэрэгт буруутгасан байна. Түүнийг эдгээр мэдээллүүдийг 2012 оноос 2015 оны 1 дүгээр сар хүртэл идэвхтэй цуглуулсаныг баталсан байна. Түүний харьяалагддаг нууц тагнуулын бүлгийг ”Хууль зөрчигчид” гэж нэрийддэг бөгөөд уг бүлгийн гишүүд нь АНУ-д өөр нэр, бичиг баримт ашиглан олон жилийн турш энгийн хүмүүс шиг амьдарч байдаг талаар АП агентлаг мэдээллээ.
-
2016 оны 5 сарын 26
Тулгууртай харайлтын Олимпийн хошой аварга Елена Исинбаева хэрвээ ОХУ-ын хөнгөн атлетикчдыг ”Рио 2016” Олимпийн наадамд оролцуулахгүй байх шийдвэр гарвал Олон Улсын Хүний Эрхийн шүүхэд хандахаа мэдэгдлээ. Оросын тамирчдын допингийн асуудал газар авч ОХУ-ын Хөнгөн Атлетикийн Холбоог IAAF-ын гишүүнчлэлээс хасах тухай асуудал яригдах болоод байгаа юм. Эцсийн шийдвэрийг Олон Улсын Хөнгөн Атлетикийн Холбоо IAAF-ын хурлаас 6-р сарын 17-ны өдөр гаргах билээ.
”Энэ бол ялгаварлан гадуурхалт. Хүний эрхийн ноцтой зөрчил. Хэрвээ бидний Олимпийн наадамд оролцох эрхийг хязгаарлавал Олон Улсын Хүний Эрхийн шүүхэд хандах болно. Би шүүх дээр ялалт байгуулна гэдэгтээ ч итгэлтэй байна. Би энэ бүхний эсрэг ямар нэг зүй хийж чадахгүй байгаадаа галзуурах шахаж байна. Учир нь одоогоор миний чадах зүйл бол бэлтгэл сургуулиа л хийх” хэмээн Елена Исинбаева мэдэгдлээ.
-
2016 оны 5 сарын 25
Францын засгийн газраас мягмар гаригт энэ жилийн Тур де Франс дугуйн уралдааны үеэрх аюулгүй байдлын хараа хяналтыг чангатгах талаар зарлалаа. Энэ жилийн олон улсын дугуйн уралдаанд оролцогчдын аюулгүй байдлыг францын 23000 цагдаагийн албан хаагч болон тусгай хүчнийхэн хамгаалж, ажиллахаар болсон байна. Энэхүү арга хэмжээг өнгөрсөн долоо хоногт парламентын зүгээс дахин 2 сарын хугацаатайгаар сунгасан улс орон даяарх онцгой байдлын хүрээнд авч хэрэгжүүлэхээр болоод байна. Францын Дотоод хэргийн сайд Бернар Казенёв Тур де Франс дугуйн уралдааныг зохион байгуулагч Кристиан Прудхоммтой уулзсаны дараагаар уг шийдвэрийг гарган зарласан байна.
-
2016 оны 5 сарын 25
Вьетнам улсад айлчилж байгаа АНУ-ын Ерөнхийлөгч Б.Обама тус улсын Ерөнхийлөгч Тран Дай Квангтай уулзсаны дараагаар хоёр улсын төрийн тэргүүн нар АНУ болон Вьетнамын компаниудын хооронд байгуулагдаж байгаа худалдааны шинэ гэрээг үзэглэх ёслолыг тэргүүлэн оролцсон байна. Цагаан Ордны зүгээс уг гэрээний дагуу хоёр улсын хооронд 16 тэрбум ам.долларын худалдаа явагдах болно хэмээн мэдэгдсэн байна. Эдгээр бүлэг гэрээнд Вьетнамын агаарын тээвэр үйлдвэрлэгч Вьетжет компанид АНУ-ын Пратт, Уитнис компаниуд 135 ширхэг онгоцны хөдөлгүүр нийлүүлэх болон Бойнг компаний зүгээс 100 ширхэг онгоцыг Вьетнам улсад нийлүүлэх тухай тусгагдсан байна. Мөн АНУ-ын Жи-И Винд компани болон Вьетнамын Засгийн газрын хооронд 1000 мегаваттын чадалтай салхин генераторыг хөгжүүлэх гэрээг байгуулсан байна. Хагас зуун жилийн хугацаанд үргэлжилсэн, Вьетнам улсад зэвсэг худалдаалахыг хориглосон хоригийг албан ёсоор цуцалсаныг Б.Обама Вьетнамын төрийн тэргүүнтэй хамт мөн өдөр зарлалаа. Тэрээр өнгөрсөн дайны үеийн ярвигтай түүхийг ардаа орхиж, өсөлттэй хөгжлийн түүчээ болсон тэргүүлэгч улстай хамтран ажиллах шинэ эрин үе эхэлж байгааг онцлон тэмдэглэсэн байна.
АНУ-ын Төрийн нарийн бичгийн дарга Жон Керри болон Вьетнамын Гадаад хэргийн сайд Фам Бин Миний нар Вьетнам улсад АНУ-ын Peace Corps байгууллагын хөтөлбөрийг анх удаагаа хэрэгжүүлж эхлэх хамтын ажиллагааны гэрээнд гарын үсэг зурах ёслолыг тэргүүлсэн байна. Гэрээний дагуу Вьетнамын Ханой болон Хо Ши Мин хотуудад Peace Corps-ийн зүгээс англи хэлний сургалтын хөтөлбөрийг явуулахаар болж байна. Жон Керри энэхүү хөтөлбөр нь хоёр орны харилцаа, хамтын ажиллагааны шинэ алхам болох болно хэмээн онцолсон байна. Хөтөлбөрийн дагуу 2017 онд Вьетнам улсад 20 сайн дурын ажилтан хүрэлцэн ирж англи хэл заах бөгөөд цаашдаа үйл ажиллагаагаа улам өргөжүүлэн тэлэх ээр төлөвлөж байгаа юм байна.
-
2016 оны 5 сарын 25
Энэтхэг улс анхны жолоочгүй сансрын хөлгийг хөөргөх туршилтыг амжилттай явуулаад байна. RLV-TD буюу дахин ашиглах сансрын хөлгийг хөөргөх технологийг ашигласан уг туршилтыг тус улсын зүүн хэсгийн Андра Прадеш мужийн Срихарикота хотноо амжилттай явуулсан байна. Жолоочгүй хөлөг Бенгалийн булан дахь газардлагын бүсэд амжилттай газардсан талаар Энтэхэгийн Сансрын Судалгааны Байгууллагын албаныхан мэдээлсэн байна. Жолоочгүй сансрын хөлгийн хөөрснөөс газардах хүртэлх нислэг нийт 770 секунд үргэлжилсэн байна.
-
2016 оны 5 сарын 24
Даваа гаригт Ираны нийслэл Тегеран хотноо Иран, Афганистан улсын Ерөнхийлөгч болон мөн Энэтхэгийн Ерөнхий Сайд нар уулзсан байна. Гурван орны удирдагчид уулзалтын үеэр олон сэдвээр хэлэлцсэний дотор мөн Энэтхэг улсын 500 сая ам.долларын хөрөнгө оруулалтаар босох Ираны стратегийн ач холбогдол бүхий боомтын төслийн талаар ярилцсан байна. Ираны Чабахар боомтын төслийг хэрэгжүүлснээр Төв Азийн далайд гарцгүй улс орнуудад худалдааны шинэ зам нээгдэж, уг боомтыг ашиглан гадаад худалдаагаа өргөн хэмжээнд явуулах боломж нээгдэх юм. Өнгөрсөн жил Иран улс цөмийн хөтөлбөрөө хязгаарласнаар тус улсын эсрэг их гүрнүүдийн тавьсан хоригууд цуцлагдсаны дараагаар Тегераны зүгээс дэлхийн эдийн засгийн системд эргэн нэгдэх бүхий л арга замыг эрэлхийлж эхлээд байгаагийн нэг жишээ нь энэхүү боомтын төсөл болж байна.
-
2016 оны 5 сарын 24
Иракийн Ерөнхий сайд Хайдер Аль Абади Исламын Улс бүлэглэлийн хяналтанд байгаа Фаллужа хотыг чөлөөлөх цэргийн ажиллагааг эхлүүлж байгааг өчигдөр тус улсын төв телевизийн сувгаар албан ёсоор зарлан мэдэгдлээ. Энэхүү мэдэгдэлийг хийх үеэр түүнтэй хамт мөн Иракийн Батлан хамгаалах яамны цэргийн коммандлагчид болон тус улсын терроризмын эсрэг тусгай хүчнийхэн байлцсан байна. Иракийн зэвсэгт хүчнийхэн Исламын Улс бүлэглэлийг ялахад тун ойрхон байгаа талаар Ерөнхий сайд яриандаа дурьдсан байна. Фаллужа хот нь нийслэл Багдад хотоос баруун зүгт 65 км-т оршдог бөгөөд сүүлийн 2 гаруй жилийн турш Исламын Улс бүлэглэлийн хяналтанд оршсоор байгаа юм.
-
2016 оны 5 сарын 24
Тайландад охидын сургуулийн дотуур байранд гал гарч, 18 охин амь үрэгджээ
-
2016 оны 5 сарын 24
Тажикистан улсын ард түмэн ням гаригт тус улсын төр засгийг 1992 оноос хойш удирдсан Ерөнхийлөгч Эмомали Рамоныг бүх насаар нь төр барих асуудлыг үндсэн хуулинд тусгаж, өөрчлөх тухай бүх нийтийн санал асуулгад оролцож, саналаа өглөө. Ням гаригийн өглөө эхэлсэн бүх нийтийн санал асуулгын дүн тухайн өдрийн үдээс хойш гарч, нийт ард түмний 80 орчим хувь нь дэмжсэнээр Ерөнхийлөгч Эмамоли Рамон бүх насаараа тар барихаар болсон байна. Үндсэн хуулинд оруулж байгаа бас нэгэн өөрчлөлт нь тус улсын Ерөнхийлөгчийн сонгуульд өрсөлдөх нэр дэвшигчийн насны доод хэмжээг 35 байсныг 30 болгосон явдал юм. Ингэснээр энэ жил 29 настай Рамоны хүү 2020 онд явагдах дараагийн Ерөнхийлөгчийн сонгуульд өрсөлдөх боломж, нөхцлийг бүрдүүлж өгөөд байгаа юм байна.
-
2016 оны 5 сарын 23
Сербийн нийслэл Белград хотноо ням гаригт 50 хос нэгэн зэрэг хуримаа хийсэн гайхалтай үйл явдал болж өнгөрлөө. Хотын удирдлагын төв байрны өмнөх талбайд зохион байгуулагдсан уг арга хэмжээнд мөн найрал хөгжмийн хамтлаг оролцсон байна. Белград хотын удирдлагаас жил бүр уламжлал болгон зохион байгуулдаг уг арга хэмжээ 18 дахь жилдээ ийнхүү амжилттай зохион байгуулагдсан бөгөөд бүх хосуудын гэрлэх ёслол явагдаж дууссаны дараагаар хуримын үдэшлэгийн арга хэмжээ зохион байгуулагдсан байна.
-
2016 оны 5 сарын 23
EgyptAir компаний осолдсон онгоцны эд зүйлс олдсон Газар дундын тэнгисийн зүүн хэсэг рүү шумбагч онгоцыг илгээсэн талаар Египетийн Ерөнхийлөгч Абдел Фатах Эл Сисси ням гаригт мэдэгдлээ. Тус улсын Газрын тосны асуудал эрхлэх яамны уг шумбагч онгоц нь 3000 метрийн гүнд хүрч ажиллах хүчин чадалтай талаар хэлсэн байна. Өнгөрөгч долоо хоногийн пүрэв гаригт тохиосон Эйрбус А320 онгоцны ослын дараагаар Ерөнхийлөгч Эл Сисси ням гаригт ийнхүү анх удаагаа олон нийтэд мэдэгдэл хийсэн бөгөөд онгоцны ослын талаарх цорын ганц магадлал, тааварт итгэж найдахгүй байх хэрэгтэйг онцлон хэлсэн байна.
-
2016 оны 5 сарын 23
АНУ-ын Ерөнхийлөгч Барак Обама энэ долоо хоногт Азийн улс орнуудаар хийх айлчлалаа Вьетнам улсаар эхлүүлж байна. Тэрээр ням гаригийн шөнө Ханой хотноо хүрэлцэн ирээд байна. Б.Обама Вьетнам улсад 3 хоног саатах бөгөөд энэ хугацаанд хоёр улсын хоорондох худалдаа болон аюулгүй байдлын хамтын ажиллагааг бэхжүүлэх асуудлаар ярилцахаас гадна мөн АНУ-ын Конгрессийн зүгээс баталсан 12 улс орныг хамарч байгаа Транс-Номхон Далайн Худалдааны Гэрээний талаар Вьетнам улстай тохиролцоонд хүрэх талаар хэлэлцэх юм. Вьетнамын зүгээс тус улсад зэвсэг худалдаалах явдлын эсрэг тавьсан АНУ-ын хэсэгчилсэн хоригийг Ерөнхийлөгч Б.Обама айлчлалынхаа үеэрээ цуцлана хэмээн найдаж байгаа юм. Уг асуудлыг Америкийн тал ерөнхийдөө авч үзэж байгаа ч Вьетнамын хүний эрхийн байгууллагуудын зүгээс энэхүү санаачилгыг эсэргүүцэж магадгүй байгаа юм. Б.Обамагийн хувьд Вьетнамын дайны дараагаар тус улсад айлчилж байгаа АНУ-ын гурав дахь Ерөнхийлөгч болж байна. Вьетнам дахь айлчлалаа өндөрлүүлсний дараа тэрээр Япон улсыг зорих болно.
-
2016 оны 5 сарын 23
Италийн Неаполь хотноо дэлхийн хамгийн урт пиццаны дээд амжилтыг тогтоох арга хэмжээ болж өнгөрлөө. Энэхүү арга хэмжээнд дэлхийн өнцөг булан бүрээс 400 гаруй пиццаны тогооч нар хүрэлцэн ирж оролцсон бөгөөд тэд хамтдаа 1853 метр урт маргерита пиццаг хийснээр дэлхийн дээд амжилтыг тогтоосон байна. Хамгийн урт пиццаг бүтээхийн тулд 2 тонн моцарелла бяслаг, 2 тонн гурил, 1497 кг улаан лоолийн сүмс, 201 литр ургамлын тос болон 20 кг базилик ашиглагдсан бөгөөд пиццаг нийт 11 цагийн хугацаанд хийж дуусгасан байна. 2015 оны Миланы үзэсгэлэн яармагийн үеэр хийж байсан 1.5 км-ийн урттай пиццаны амжилтыг Неаполь хотноо ийнхүү эвдэж, шинэ дээд амжилтыг тогтоолоо.
-
2016 оны 5 сарын 23
Швейцарийн нийслэл Берн хотын ойролцоох Интерлакен хотод хурдан галт тэрэг автобустай мөргөлдөж, осолдсоны улмаас 16 хүн бэртэж гэмтээд байгаа талаар тус улсын цагдаагийн албанаас мэдээлсэн байна. Уг мэдэгдэлд осол орон нутгийн цагаар баасан гаригийн шөнө төмөр замын уулзвар дээр гарсан гэжээ. Бэртэж гэмтсэн 16 хүнийг тэр даруй ойрын эмнэлэгт хүргэсэн бөгөөд тэдгээр хохирогчид хэр хүнд, ноцтой гэмтэл авсан нь одоогоор тодорхойгүй байгаа юм байна. Цагдаагийн албаныхан ослын шалтгааныг тодруулахаар ажиллаж эхлэсэн байна.
