Хоолой хорсож байна, амьсгалахад хүнд байна, толгой өвдөж байна, амьдрах арга алга... Утаат хотын иргэний хэлэх л үг. Идэр есийн жавар тачигнаагүй, ерийн сард утаанд бүчүүлж явсаар хоолой аргаж, эхүүн үнэрт мансуурах үедээ л эрхгүй цэвэр агаарыг хүсэж байгаа биз. Гэвч бид ч зовлондоо дасах юм, ахуйн аар саар ачаанаас эхлээд даван туулах зүйл ч олонтой ард гэдэг нь үнэн л дээ. 

Ерөнхийлөгч нь Засгийн газрын сайд нар гэх мэт хүмүүсийг дуудаж уулзаад л, Ерөнхий сайд байх үед нь цэлмэг тэнгэртэй байсан тухай дурсаад л, шахмал түлшний чанар арай ч ийм байгаагүй гэж халаглаад л. Маргааш нь Тавантолгой түлш компаний Ерөнхий технологич гарч ирж, Ерөнхийлөгчийн хэлснийг үгүйсгээд л...

Эцэст нь утааны гол буруутан иргэд болж, "түүхий нүүрс түлж байж магадгүй" бүр "угаарын хий мэдрэгчийг авдартаа хийгээд түгжчихсэн" ч байж мэдэх хүмүүс болж таарав. Ер нь утаа нь ч иргэдийн буруу, угаартсан нь ч иргэдийн буруу. Угаартаж нас баржээ гэх эмгэнэлийн араас галлагаагаа буруу хийсэн гэх тайлбар байнга шахуу л явж байдаг биз?

Нийслэлийн агаар орчны бохирдолтой тэмцэх газрын дарга Д.Мөнхбаатар “Зарим өвөө, эмээ нар маань угаар мэдрэгчийг хадганд ороож, төрийнхөө өгсөн юмыг нандигнана гээд ашиглахгүй байна” гэж ярьсан юм. Ийм үгийг хүртэл чихнийхээ хажуугаар өнгөрөөж, тоглоом наргиа болгон өнгөрүүлээд сурчихсан байх юм. Угаар мэдрэгчийг хадганд ороож, бурханд залтлаа төрийг хайрлана ч гэж юу байх билээ дээ. 

Сануулахад, өнгөрсөн онд 3184 угаарын хийн цочмог хордлогын тохиолдол бүртгэгджээ. Нас барсан 61 тохиолдол байна. Он гарсаар 2531 тохиолдол бүртгэгдсэнээс нас барсан нь 41 гэсэн мэдээллийг холбогдох газраас өгсөн байх юм. Энэ тоо цаашдаа ч өсөх хандлагатай, үнэн нь үүнээс ч их байж болзошгүйг үгүйсгэхгүй.