Монголын хүүхдийн спортын 8-р их наадам Улаанбаатар хотын Хандгайт дахь мөсөн талбай дээр зохион байгуулагдаж буй. Бид хоёрдугаар сарын 18-ны өдөр очиж нээлтийн үйл ажиллагааг сурвалжиллаа.
2025 оны хоёрдугаар сарын 18. Монголын хүүхдийн спортын өвлийн 8-р их наадам Орхон, Улаанбаатар хотноо зэрэг нээлтээ хийлээ. Улаанбаатар хотод зохион байгуулагдаж буй газрын хувьд Хандгайт дахь мөсөн талбайд нээлтийн үйл ажиллагаа явагдав. Наадмын үндсэн төрөлд гүйлтийн тэшүүр, шорт трейк, снөүбоард, гүйлтийн цана, уулын цана, шайбтай хоккей, тусгай олимпын цасны гуталтай гүйлт зэрэг багтаж байгаа бол үзүүлэх төрөлд тусгай олимпын гүйлтийн цанын төрөл багтсан байв. Тэгвэл Улаанбаатар хот дахь нээлтийн үйл ажиллагаа 13:20 цагт эхэлж нээлтийн фанфар эгшиглэн үзэгчид болон оролцож буй тамирчдын ар гэрийнхэн зассан тайзны өмнө анхаарал хандуулан зогсоцгоолоо.
Өвлийн спортын наадмыг нээж хөтлөгч тус наадмын анх зохион байгуулагдаж байсан түүхээс эхлэн ярина. Гадаа -11 градусийн хүйтэн байгаа ч салхи ихтэй байсан учраас үзэгчид, эцэг эхчүүд бүгд дагжин чичирцгээх авч тамирчдын хувьд аль хэдийнээ хүйтэнд дассан уу гэлтэй салхийг, хүйтнийг үл ажрана. Хөтлөгч нээлтийн үгээ хэлж дууссаны араас баг тамирчдыг аймаг дүүрэг, байгууллагаар нь цагаан толгойн үсгийн дарааллаар дуудаж эхэллээ.
Нийт 15 аймаг , 8 дүүргийн тамирчдыг дуудан зарлаж тамирчид эгнээ байраа эзлэн зогсоход Монгол улсын төрийн далбааг залах үйл ажиллагаа эхэллээ.
Далбааг тайзнаа Орхон аймгийн 4-р сургуулийн 8а ангийн сурагч, шайбтай хоккейн тамирчин Э.Тэнүүн залан авчирлаа. Тугийг өргөн явах тамирчин бусад тамирчидын голоор явах ба энэ үед тамирчдын нүдэнд гал цог тэмцээндээ амжилттай оролцох итгэл тэдний нүднээс харагдаж байлаа.
Далбааг тайзан дээр залсны араас хөтлөгч наадмын зохион байгуулагчдыг үг хэлнэ үү хэмээн тайзан дээр урив. Зохион байгуулагчид наадмын нээлтэд зориулж тамирчдад амжилт хүсэн нэг нэгээрээ үг хэлсээр хамгийн сүүлд Монголын хүүхдийн спортын өвлийн 8-р их наадмыг нээж Засгийн газрын хэрэгжүүлэгч агентлаг Биеийн тамир, спортын улсын хорооны даргын үүргийг түр орлон гүйцэтгэгч О.Баттулга үг хэлж, Монголын хүүхдийн спортын өвлийн 8-р их наадам нээснийг мэдэгдэв.
Үүний араас монгол улсын төрийн дуулал эгшиглэж тамирчин Б.Энгүүн, Б.Батцагаан, М.Мөнхжин, Д.Хонгорзул нар далбааг мандууллаа. Удалгүй хөтлөгч Монголын хүүхдийн спортын өвлийн 8-р их наадмын тугийг тайзнаа зална уу хэмээн Хан-уул дүүргийн 130-р сургуулийн сурагч, шорт трейкийн тамирчин Т.Тэмүүлэнг урьлаа.
Наадмын туг нь тамирчдын амжилтыг НАР, САР, ГАЛ-тай зүйрлүүлэн өөдөө асч бадамлан, дүрэлзсэн байдлыг илтгэжээ. Цаг агаарын хүйтнийг үл тоон тамирчид, үзэгчид бүгд нээлтийн үйл ажиллагаанд анхаарлаа хандуулсан байв.
Наадмын тугийг залсны араас шүүгч тамирчдын тангараг өргөх ёслолын ажиллагаа эхлэлээ. Тамирчдын тангарагийг М.Сувд-Эрдэнэ, А.Дагвадорж нар төлөөлж өргөлөө. Тангарагаа өргөсөн тамирчид хоёр эгнээгээр жагсаж, наадмын жижиг галт бамбарыг залж ирж буй тамирчин Н.Баасанжаргалыг алга ташилтан дор угтаж авлаа. Галт бамбарыг тайзан дээр Засгийн газрын хэрэгжүүлэгч агентлаг Биеийн тамир, спортын улсын хорооны даргын үүргийг түр орлон гүйцэтгэгч О.Баттулга-д дамжуулан өгч тэрбээр тамирчдад амжилт хүсэн үг хэлээд галт бамбарыг тамирчин М.Борхүүд шилжүүлэн өгөв. Тамирчин М.Борхүү галт бамбарыг бариад буухиалан гүйж, Монголын хүүхдийн спортын өвлийн 8-р наадмын их бамбарыг бадраав.
Үүний араас олон өнгийн утаат салюутууд буудаж тамирчид баяр хөөртэйгээр наадмын сүлд дуу “Би монгол тамирчин” дуугаа Уухай хамтлагийн хамт дуулж, үүний араас залуу тамирчдад зориулж Вандебо хамтлагийн Ванде өөрийн хоёр дуугаа дуулж нээлтийн үйл ажиллагааг хаав. Ийнхүү тэмцээн шорт трейкийн тэмцээнээр үргэлжилж Монголын хүүхдийн спортын өвлийн наадмын нэгэн өдөр өндөрлөлөө.
Г.Хоролмаа
