Нийслэлийн Засаг даргын тамгын газар, Улаанбаатар хотын цагдаагийн газар хамтран “Хөршийн хяналт холбоо” хөтөлбөрийг нийслэлийн хэмжээнд эхлүүлээд байна. Хөтөлбөрийн нээлтийг Баянзүрх, Сонгинохайрхан, Баянгол, Чингэлтэй, Сүхбаатар Хан-Уул, Багануур, Налайх дүүргүүдийн 40 хороонд зохион байгуулахаар төлөвлөжээ. Чингэлтэй дүүргийн Цагдаагийн хоёрдугаар хэлтэс энэ сарын 4-ны өдөр уг хөтөлбөрийг хэрэгжүүлж эхлэх гурван хорооныхоо нэг болох 12 дугаар хороонд иргэд олон нийттэй уулзаж, санал солилцох уулзалтыг зохион байгууллаа. Уулзалтанд  ЧД-ийн Засаг даргынтамгын газрын Захиргаа хуулийн хэлтсийн тогтоол шийдвэр хариуцсан мэргэжилтэн Ариунзаяа, Чингэлтэй дүүргийн цагдаагийн хоёрдугаар хэлтсийн Нийгмийн хэв журам хамгаалах хэлтсийн дарга, хошууч Д.Онон, Чингэлтэй дүүргийн 12-р хорооны засаг дарга Ж.Оюунцэцэг нар арга хэмжээнд оролцов.

Иргэдийн хувьд “Хөршийн хяналтын холбоо” хөтөлбөрийг талархан хүлээн авч байгаа бөгөөд дэмжин ажиллахаа ч илэрхийлсэн юм. Дашрамд дуулгахад уг хөтөлбөрийг сурталчилан таниулах ажлыг ЧД-ийн 11, 12, 19 дүгээр хороонд зохион байгуулах бөгөөд ирэх долоо хоногоос 11, 19 дүгээр хороонд иргэд олон нийттэй уулзаж, санал, сэтгэгдлээ хуваалцах ярилцлага, өдөрлөг үргэлжлэх юм.

Ж.Оюунцэцэг: Та бүхнийг нэгэн сэтгэлээр хамтран ажиллахыг уриалж байна

“Хөршийн хяналтын холбоо” хөтөлбөр тус хороон дээр хэрэгжиж эхэлж буйтай холбоотойгоор 12 дугаар хорооны засаг дарга Ж.Оюунцэцэг дараах үгийг хэллээ. Тэрбээр  “Манай хороо хүн ам ихтэй, тархаа бутархай байршилтай, гэмт хэрэг, зөрчил ихээр үйлдэгддэг. Манай хороонд ийм сул тал байгаа боловч хорооны иргэдийн хувьд азтай хүмүүс. Та бүхнээрээ бахархаж явдаг. Аливаа төсөл хөтөлбөрт шалгараад, төсөл хөтөлбөрийг хэрэгжүүлэхэд бидэнд үр шим нь ирдэг юм.

Энэ утгаараа “Хөршийн хяналт” хөтөлбөрийн үр шиммийг хүртэх байх гэдэгт итгэлтэй байна. Хөтөлбөрт хамтран оролцоод хүн бүхэн хөрш болгон бүх нийтийн төлөө хамтарч ажиллана гэдэгтэй бүрэн итгэлтэй байна. Та бүхнийг нэгэн сэтгэлээр хамтран ажиллахыг уриалж байна.

Удахгүй 5 сарын 15-нд Монголын гэр бүлийн өдөр болно.  Манай хороо 152 хонооноос “Хүүхдэд ээлтэй хороо”-гоор шалгарсан. Гэр бүлийн өдрөөр манай дүүргийн 100 иргэн цэцэг барьж парадад оролцох болсон гэдгийг энэ дашрамд дуулгъя. Та бүхэн идэвхтэй оролцоорой” хэмээв.

Д.Онон:  Иргэдийн өмчийг хулгайлах гэмт хэргийг бууруулахад чухал ач холбогдолтой

Энэ үеэр Чингэлтэй дүүргийн цагдаагийн хоёрдугаар хэлтсийн Нийгмийн хэв журам хамгаалах тасгийн дарга Д.Ононгоос тус дүүргийн гэмт хэргийн нөхцөл байдал, “хөршийн хяналтын холбоо” арга хэмжээний нээлтийн талаар тодруулсан юм.

-“Хөршийн хяналтын холбоо” хөтөлбөрийн нээлтийг танай 11, 12, 19 дүгээр хороонд хийхээр сонгожээ. Яагаад заавал энэ хороонуудыг сонгосон юм бол оо?

-Нийслэлийн Засаг даргын 2013-2016 оны үйл ажиллагааны хөтөлбөрийг хэрэгжүүлэх ажлын хүрээнд Нийслэлийн Засаг даргын тамгын газар, Улаанбаатар хотын цагдаагийн газар хамтран “Хөршийн хяналт” хөтөлбөрийг зохион байгуулж байгаа юм. Арга хэмжээ гэр бүлийн хүчирхийлэл, ахуйн хүрээнд үйлдэгдэж байгаа гэмт хэрэг, захиргааны зөрчлийг бууруулах. Мөн гудамж талбай, олон нийтийн газар үйлдэгдэж байгаа гэмт хэрэг зөрчлийг бууруулах, ялангуяа иргэдийн өмчийг хулгайлах гэмт хэргээс урьдчилан сэргийлэх зорилготой. Уг арга хэмжээгээр иргэд олон нийтийг цагдаагийн байгууллагатай хамтарч ажиллах нөхцөл бололцоог бүрдүүлэх зорилготой байгаа юм. Чингэлтэй дүүргийн 11, 12, 19 дүгээр хороог яагаад сонгосон бэ гэдгийг та асууж байх шиг байна. Манай дүүргийн 12 дугаар хороо 16 мянган хүн амтай. Хүчит шонхор, Нарантуул 2 гээд хоёр том зах байрладаг. Дамжин өнгөрөх хүний тоо маш их байдаг. Гэмт хэрэг захиргааны зөрчил үйлдэгдэх нөхцөл бүрдсэн байдаг учраас энэ хороог сонгосон. Мөн 19 дүгээр хороо маань зуслангийн хэсэг байдаг. Алслагдсан хороо гэж ойлгож болно. Төв аймгийн Батсүмбэр сумтай хэллэдэг хороо. Зусланд байнга оршин суудаг иргэдийн тоо жилээс жилд өсч байгаа. Зусланд бусдын өмчийг хулгайлах гэмт хэрэг их бүртгэгддэг учраас хөршийн хяналт арга хэмжээг зохион байгуулахаар төлөвлөөд байгаа юм. Ер нь өөрийн хариуцсан хороодын нутаг дэвсгэрт “Хөршийн хяналт” арга хэмжээг бүрэн хэрэгжүүлнэ гэсэн төлөвлөгөөтэй байгаа.

-Танай дүүрэгт ямар төрлийн гэмт хэрэг их бүртгэгдэж байна вэ?

-ЧД-ийн Цагдаагийн хоёрдугаар хэлтэс нь дүүргийнхээ 10-19 дүгээр хороодыг хариуцаж ажилладаг. Бидний хариуцсан нутаг дэвсгэрт ихэвчлэн хулгайн гэмт хэрэг үйлдэгддэг. Ахуйн хүрээний гэмт хэрэг, захиргааны зөрчил ихээр үйлдэгддэг онцлогтой. Мөн хөдө өорон нутгаас шилжин ирэгсэн их, иргэдийн амьжиргааны түвшин доогуур, ажилгүй иргэд их байдаг учраас бусдын эд хөрөнгийг хулгайлах, ахуйн хүрээнд архидан согтуурч, танхайрах хэрэг ихээр үйлдэгддэг.

Ж.Бат-Эрдэнэ: Бусдын эрх чөлөөнд халдах үзэгдэл нэмэгдэх хандлагатай байна

Чингэлтэй дүүргийн 12-р хорооны хэсгийн байцаагч Ж.Бат-Эрдэнэ “Манай хорооны хүн амын тоо бусад хорооноосоо их, мөн газар нутгийн хувьд том. Хүчит шонхор, Нарантуул 2 гээд хоёр худалдааны төвтэй учраас дамжин өнгөрдөг иргэд их, хөл хөдөлгөөн ихтэй хороо. Хөдөө орон нутгаас шилжин ирэгсэд их, мөн нийтийн байр хөлслөн амьдардаг шилжин ирэгсэд нэмэгдэх болсон. Үүнтэй холбоотойгоор гудамж талбайд архидан согтуурах, танхайрах, бусдын эрх чөлөөнд хөлдөх үзэгдэл нэмэгдэх хандлагатай байгаа” хэмээв.

Ямартай ч уг хороонд дээрх хөтөлбөр хэрэгжилж эхэлснээр хэсгийн байцаагч болон дүүргийн Цагдаагийн хоёрдугаар хэлтсийн Нийгмийн хэв журам хамгаалах тасгийн дарга Д.Ононгийн ярьсан хэрэг зөрчлүүд эрс буурахад нааштай үзүүлэлт болно гэж иргэд болон холбогдох албаныхан үзэж буй аж.