"Ухаа худаг"-ийн анхны эмэгтэй гагнуурчин Ц.Сумъяатай ярилцлаа. Тэрбээр 2024 оны есдүгээр сараас эхлэн "Энержи ресурс" ХХК-ийн Ухаа худагийн Тээвэр ложистикийн албаны засварын төвийн 70 гаруй гагнуурчдын багт анхны эмэгтэй гагнуурчин болж түүх бүтээж буй нэгэн юм. 

-Танд энэ өдрийн мэндийг хүргэе. Уншигчдад өөрийгөө танилцуулахгүй юу? 

-Сайн байна уу. Намайг Ц.Сумъяа гэдэг. Би "Энержи ресурс" ХХК-ийн Ухаа худагийн Тээвэр ложистикийн албанд 2024 оны есдүгээр сараас орсон. Нэг жил болж байна.

-Гагнуурчин болохоор шийдсэн түүхээ бидэнд хуваалцаач?

-Би Өмнөговь аймгийн Ханбогд сумын уугуул. Сумандаа нэг жилийн хугацаанд суралцаж, мэргэжил эзэмшсэн. Гагнуур хийх маш сонирхолтой санагддаг. Гагнахдаа багны цаанаас хардаг болохоор анх сонирхол татаад сонгож байсан. 

Мөн гагнуур хийх маш нарийн мэдрэмж шаарддаг. Тэр нь ч надад таалагддаг. 

-Ихэнх гагнуурчид эрэгтэй хүн байдаг шүү дээ. Харин эмэгтэй гагнуурчин байх давуу талыг юу гэж хардаг вэ? 

-Эмэгтэй хүн гагнуур хийж чадахгүй гэж ихэнх хүмүүс боддог. Гэхдээ чаддаг шүү гэдгийг өөрийн биеэр харуулж байгаадаа баяртай байдаг. Нэг машин руу орж гагнуур хийх гэхэд "өө эмэгтэй хүн юм уу, чи чадах юм уу" гээд л байдаг юм. Гэхдээ эмэгтэй хүн гагнуур хийхдээ илүү нямбай ханддаг юм шиг санагддаг. Дараа нь тэд юу ч хэлэхгүй л машинаа гагнуулдаг болсон. 

-Гагнуур хийгээд нэг жил болсон гэлээ. Энэ хугацаанд хамт олноосоо суралцах зүйл их байв уу? 

-Тэгэлгүй яах вэ. Заримдаа алдаа гаргах тохиолдол гарна. Гэхдээ хамт олныхоо тусламжийг авдаг. Алдаа болгоноосоо суралцаж, өөрийгөө улам сайжруулахын тулд хичээж байгаа. Мөн маш мундаг хүмүүстэй мөр зэрэгцэн ажиллаж байгаадаа баяртай байдаг.

Надад суралцах зүйл маш их бий. Цаашид сайн суралцаад мундаг гануурчин болъё гэж боддог. 

-Ярилцсанд баярлалаа.