Бараг сарын өмнө буюу тавдугаар сарын 17-ны өдөр БНЭУ-ын Ерөнхий сайд Нарендра Моди Монгол Улсад айлчилсан. Манай улсад айлчилсан Энэтхэгийн анхны Ерөнхий сайдын айлчлалыг урьд урьдын удирдагчдынхаас хамгийн дотно байлаа хэмээн дүгнэсэн билээ.

Нарендра Моди манай улсад нэг тэрбум ам.долларын зээлийн шугам нээнэ хэмээн амласан нь түүний айлчлалын хамгийн том дуулиан байсан.

Харин энэхүү амлалтыг энэтхэгчүүд эсэргүүцэх болсон тухай мэдээлж байсан билээ. Тэгвэл зээлийн шугамын амлалтыг эсэргүүцсэн тэмцэл Нарендра Модигийн Монголд хийсэн айлчлалыг бүхэлд нь буруутгах хүртлээ хурцадсан тухай “Багц 24” булан мэдээлж байна.

2015 оны 5 сарын 19. www.indiantimes.com

Баруун жигүүрийн улс төрийн нам болох “Шив Сена” Нарендра Модигийн Монгол улсад олгох зээлийн амлалтыг буруутгаж, “Энэтхэгийн ерөнхий сайдын Монголд олгох зээл Энэтхэгийн хөдөө аж ахуйг дампуурахад хүргэлээ. Монгол улс Махараштрагийн тариалангийн салбараас хавьгүй азтай юм” хэмээн хэлжээ.

Сүүлийн үед Энэтхэгийн газар тариалан эрхлэгчид санхүүгийн хомсдолтой байгаа буюу өрийн барьцаанд амьдарч байна. Тиймээс төр засгаас санхүүгийн тусламж, хөрөнгө хүлээж байсан юм. Гэсэн ч Энэтхэгийн Ерөнхий сайд тэдэнд өгөх ёстой мөнгийг Монгол Улсад өгөхөөр болжээ.

2015 оны 5 сарын 20. www.hindu.com

Энэтхэгийн Бихар мужийн сайд Нитиш Кумар “Энэтхэг улсын иргэд санхүүгийн хямралаас үүдэж амиа хорлохоос наагуур нөхцөл байдалд амьдарч байхад Ерөнхий сайд хаа холын Монголд их хэмжээний мөнгөний зээл олгоно гэдэг утгагүй хэрэг. Энэтхэгийн аль ч эрх баригчид хамгийн түрүүнд Энэтхэг хүнийг тавих ёстой”.

2015 оны 6 сарын 09. www.firstpost.com

Дели хотын цэвэрлэгээ, тохижилтын компанийн ажилчид сүүлийн гурван сар цалингаа авч чадаагүй тул цалингаа авахаар эсэргүүцэн жагсчээ. Ажилчид эдийн засгийн хүндрэлтэй тулгарсны дараа Бхарати Жаната намын удирдлагуудыг буруутгаж эхэлсэн бөгөөд “Монгол улсад 1 тэрбум ам.доллар өгөх шаардлагагүй. Тэр мөнгөө бидэнд өг. Бид цалингаа авах хүсэлтэй байна” гэжээ.

2015 оны 6 сарын 13. www.indianexpress.com

Ерөнхий сайд Нарендра Моди Mangolpuri-г биш Монголыг илүүд үзэж байна хэмээн гарчигтай нийтлэл бичигджээ. Үүнд мөн л сөрөг хүчнийхэн Нарендра Модигийн нэг тэрбумын зээлийн шугамын амлалтыг шүүмчилсэн байна.

Дели хотын ядуухан тосгон болох Магнолпурид эмнэлэг, сургууль барихаас эхлээд дэд бүтэц шинэчлэх гээд хөрөнгө мөнгө шаардсан олон асуудал байхад үрэлгэн амлалтыг Монголд өглөө хэмээн бичжээ.

2015 оны 6 сарын 14. www.hindustantimes.com

21 фото: Ерөнхий сайд Нарендра Моди Монголд юу хийв” хэмээх гарчигтай нийтлэлд түүнийг улс орноо бодолгүй буруу шийдвэр гаргасан, зугаа цэнгээн хөөсөн, ноён нуруугүй байдал гаргасан хэмээн шүүмжилжээ. Үүнийг дараах 21 зураг батална хэмээн нийтэлснээс ццөн хэдийг нь хүргэе.

Наррендра Модигийн сарын өмнө гаргасан шийдвэрийг энэтхэгчүүд, сөрөг хүчнийхэн одоо хүртэл хүчтэй шүүмжилж байна. Магадгүй энэ эсэргүүцэл олон мянган хүнийг хамарсан томоохон жагсаал болохыг ч үгүйсгэхгүй.

Д.Идэр

www.24tsag.mn