Энэ сарын 15-ны орой Малайзад амьдардаг монгол эмэгтэй халдлагад өртөж буудуулсан тухай манай сайт мэдээлсэн. Түүнийг Датук нэртэй залуу аварсан хэмээн хэргийн газар дээр мэдээлэл хийсэн Птелинг Жаяа дүүргийн цагдаа мэдээлж байсан. Тэгвэл аврагч залуу гэмт халдагчдын бай, бүр гэмт хэрэгтэн байж, монгол бүсгүйн хэн болох нь тодорхойлогдсон болон биеийн байдал нь хэр байгаа тухай багц мэдээллийг хэрэг дээр ажиллаж буй цагдаа нараас авснаа “Багц 24” буландаа хүргэж байна.

        Хэрэг явдал болсон Птелинг Жаяа дүүргийн Цагдаагийн газар луу www.24tsag.mn мэйл бичлээ. Цагдаагийн газрын дарга Азми Абу Кассимын ирүүлсэн хариугаар 26 настай монгол эмэгтэй биш 35 настай бизнесмэн залуу халдагчдын бай байжээ.

Азми Абу Кассим (Зураг дээр баруун гар талынх) мэдээлэхдээ “Өнгөрсөн 10 дугаар сард Датукын байшинд гэмт этгээдүүд халдаж, гэр лүү нь буудаж хэрэг гарч байсан. Мөн тэрээр утсаар олон удаа заналхийлсэн мессеж, дуудлага авдаг байсан нь тогтоогдсон. Учир нь 35 настай Датук өмнө нь олон удаа гэмт хэрэг үйлдэж байсан нь тогтоогдсон юм” гэсэн мэдээлэл өглөө.

Тиймээс монгол эмэгтэйн хохирсон халдлагыг Датукаас өшөө авах зорилготой байсан гэдгийг батлан хэлж байна хэмээн Цагдаагийн газрын төлөөлөгч мэдээллээ.

Учир нь Датук гэх залуу өмнө нь гэмт хэргийн бүлэглэлийн нэг залууг ах шигээ үздэг байсан ч бизнесийн улмаас маргалдаж үл ойлголцож байсан хэмээн мэдүүлсэн байна. Датук ч халдагчдыг тэднийг байх хэмээн мэдээлэл өгсөн байна.

        Хүний нутагт олон удаа буудуулсан монгол эмэгтэйг хэн болохыг хараахан тогтоогоогүй байгаа бөгөөд цаг хугацаа шаардагдана хэмээн өчигдөр Гадаад хэргийн яамнаас мэдээлж байсан. Харин Малайзын Цагдаагийн газар түүнийг н.Номин-Эрдэнэ гэдэг хэмээн мэдээллээ.

Цагдаагийн газар н.Номин-Эрдэнийн тухай дэлгэрэнгүй мэдээлэл өгөхийг хүсэхэд татгалзсан юм. Түүнчлэн хохирогч өмнө нь мэдээлж байсанчлан цээж, мөрөндөө 4 биш 5 удаа буудуулсан байсныг хэлээ.

“Номин-Эрдэнийг оносон сумууд азаар дотор эртхнүүдийг оноогүй. Тиймээс биеийн байдал нь тогтвортой байгаа. Гэхдээ монгол эмэгтэй өнөөдөр хагалгаанд орно” хэмээн Азми Абу Кассим бидний бичсэн мэйлд хариулсан юм.

Н.Номин-Эрдэнийг хэзээ Малайзад орсон болохын тодорхойлох үүргийг тус улсын Гаалийн газарт өгсөн байна.

Цагдаагийн газрын мэдээлснээр Датук, н.Номин-Эрдэнэ нар онлайнаар танилцжээ. Тодруулбал, "WeChat"-аар танилцсанаас хойш жил гаруйн хугацаа өнгөрсөн байна. Тэднийг ямар харилцаа холбоотой болохыг мөн мэдээлэхээс татгалзсан юм.

Хэргийг дахин сануулахад: Даваа гарагт хоёр халдагч этгээд мотоцикль дээрээсээ тансаг зэрэглэлийн SUV машин луу олон удаа гал нээгээд зугтсан юм. 17.45 цагийн орчимд болсон хэргийн үеэр халдагчид 8 удаа гал нээсэн болохыг цагдаа нар мэдээлж байгаа. Халдагчид Датук буюу жолоо барьж явсан эрэгтэйг буудахыг хүссэн ч машин дотор явсан монгол эмэгтэйг 9мм-ийн гар буугаар 5 удаа оносон юм. Датук машинаасаа гарч ойролцоо байсан мотоциклиор халдагчдыг мөргөснөөр гэмт хэрэгтнүүд зугтсан юм.

Д.Идэр

www.24tsag.mn