Бүтээн байгуулалт, хотын хөгжил цэцэглэлт гэх сүржин үгээр төсвийн мөнгийг үр ашиггүй зарцуулж, салхинд хийсгэдэг явдал газар авчээ.

Арслантай гүүрний усан хөшгийг нийслэлийн төсвийн 70 сая төгрөгөөр хийж, сүр дуулиантай нээлтийг нь хийсэн. Гэвч энэ нь иргэдийн талархалыг хүлээх бус, уур бухимдалыг төрүүлж, төрдөө итгэх итгэлгүй болгож орхив.

Уг нь энэхүү усан хөшиг нь иргэдийн амарч зугаалах, ая тухтай орчинг бүрдүүлэх учиртай атал зөвхөн нээлт хийх төдийхөнд л ажиллах хүчин чадалтай усан хөшиг байсанд иргэд гомдоллож, төсвийн мөнгийг хий хоосон хэрэггүй зүйлд зарцуулж байна хэмээн бухимдуулахад хүргэв.

Мэдээж төсвийн мөнгө гэдэг ард түмний мөнгө. Тиймээс ч ард түмэн төсвийн мөнгөөр хийсэн ажилд үнэлэлт дүгнэлт өгөх учиртай. Тэд сохор биш.

“Хан-Урсгал” ХХК энэхүү усан хөшигт гурван жилийн баталгаа өгсөн гэх мэдээлэл байгаа. Харин тохижилт арчилгаааг Нийтийн үйлчилгээний Улаанбаатар нэгтгэл хариуцна хэмээн албаны хүмүүс мэдээлж байсан.

Тавхан хоног ажилласан энэхүү усан хөшиг сүүлийн хэдэн өдөр ажиллахгүй байгааг учир шалтгааныг Усан хөшигний ашиглалтыг хариуцна хэмээгдэж байсан Улаанбаатар нэгтгэл НӨҮГ-ын дарга Д.Энхсайханаас тодруулахад “Усан хөшигний нээлт болоод удаагүй ч эвдэрсэн гэсэн мэдээлэл гараад байгааг ч яг үнэндээ эвдэрсэн нь юү л бол. Хараахан хийж амжаагүй зарим нэг засвар үйлчилгээг хийх гээд түр хаасан байх магадлалтай. Ер нь бол Усан хөшгийг одоогоор манай байгууллага албан ёсоор хүлээж аваагүй  байгаа. Тийм болохоор эвдэрсэн эсэх, эвдэрсэн бол юунаас үүдэлтэй талаар бид хариулахгүй” гэх хариултыг өгөв.

Харин гурван жилийн баталгаа өгсөн гэх уг ажлын гүйцэтгэгч “Хан урсгал” ХХК-ийнхантай холбогдохыг хүссэн боловч тус компанийн албан ёсны мэдээлэл, хаяг, утас лавлах төвүүдэд бүртгэгдээгүй байсан учир холбогдож чадаагүй юм.

Ийнхүү өнөөдөр Арслантай гүүрний усан хөшгийг хариуцах эзэнгүй болж, 70 сая төгрөг салхинд хийсэв.

70 саяар баригдсан энэхүү усан хөшигний тооцоог мэргэжлийн хүмүүс бодож үзжээ. Гэтэл нөгөө сүржин усан хөшгөнд зарцуулсан материалын үнийг зах зээлийн дээд ханшаар бодож үзэхэд 30 сая ч хүрэхгүй мөнгө гарсан байна. Үнэхээр харамсалтай энэ зүйлийг ёстой л эмгэнэл гэлтэй. 

Төсвийн мөнгийг салхинд хийсгэдэг жишээ үүгээр дуусахгүй. 120 мянгатын автобусны буудлын дэргэдэх гүүрэн гарцыг өнгөрсөн жилийн наадмаар ашиглалтад оруулсан. Гэвч энэхүү гүүрэн гарц өнөөдөр ажиллахгүй, бас л жагсаалтаас гарч, 720 сая төгрөг салхинд хийсэв.

Тодруулбал,120 мянгатын гүүрэн гарцыг 720 сая төгрөгийн төсвөөр Авто замын газрын захиалгаар “MBES” компани гүйцэтгэж, ашиглалтад оруулж байсан.

Гэвч энэхүү гүүрэн гарц нь энэ жилийн улсын баяр наадмаар тараа таниулав. Ийнхүү өгүүлэхийн учир нь наадмын эхний өдөр баярлахаар явж байсан 11 хүн тус гүүрэн гарцны цахилгаан шатанд гацаж, наадамчин олныг багагүй сандаргасан юм.

Тиймээс гүүрэн гарцыг НМХГ-аас шалгалт хийн ашиглалтыг яаралтай зогсоосон билээ.
 

Ингээд гүүрэн гарцаас хойш 30 метрийн зайд явган хүний гэрлэн дохиотой гарц гаргаж, гүүрэн гарц хэрэггүй бололоо.

Энэ мэтээр төсвийн мөнгөөр нас богинотой  бүтээн байгуулалт хийдэг явдлыг таслан зогсоож, ард түмний мөнгийг хий хоосон салхинд хийсгэхгүй байх хэрэгтэй гэдгийг ирггэд хүсч байгааг энд дахин өгүүлэх нь зүйтэй болов уу.

www.24tsag.mn