Ардчилсан нам түүхэндээ зургаан даргын нүүр үзжээ. Тэдгээрээс Н.Алтанхуяг хамгийн олон буюу зургаан жил даргалсан байна. Мөн тэрбээр гарах аргагүй шахаанд орон энэ ажлаа өгөхдөө шинэ дарга З.Энхболдод зургаан зүйл захиас болгон хэлсэн байдаг. Эе эвийг ихээхэн сахих, их ялалтын буухиаг үргэлжлүүлэх гээд. Ялангуяа эвтэй байх тухай олонтаа анхааруулжээ.

  Уг хуралдаан дээр З.Энхболд дарга ч үг хэлсэн л дээ. Тэрбээр, “Н.Алтанхуяг хамгийн хамгийн гэсэн тодорхойлолтой хүн. Тиймээс хамгийн түрүүнд Н.Алтанхуягт зориулж үг хэлмээр байна. Н.Алтанхуяг гэдэг  улстөрч АН-д хамгийн олон жил намын дарга хийсэн. Бас ардчилсан намын түүхэнд хамгийн олон ялалтыг авчирсан. Үүнээс гадна хамгийн сайн эв нэгдлийг сахигч улстөрч гэж би боддог. Тиймдээ ч намынхаа эв нэгдлийг сахиулахын тулд өнөөдөр намын даргын албаа өглөө. Таны хийж хэрэгжүүлж байсан бүхнийг үргэлжлүүлж, эв эеийг сахин, ялалтын тань буухиаг үргэлжлүүлнэ гэдгээ хэлье” хэмээжээ.

  Сайхан бас уярмаар ийм үг хэлэв. Уярсан хүн ч зөндөө байв. Бас мундаг амлалт байлаа. Энэ нь Н.Алтанхуяг гэдэг нөхрийн өмнө бус намынхаа гишүүдийн өмнө өгч байгаа амлалт юм шүү дээ. Товчхондоо ирэх сонгуулиудад дахиад ялуулна гэдгээ бардам хэлж байгаа хэрэг л дээ.

  Гэхдээ ний нуугүй хэлэхэд намынхаа эв нэгдлийг эвдээд байсан З.Энхболдын “шонхорууд”, Женко Баттулгын мөнгөнд дөрлүүлсэн хэдэн сайхан гарууд л намынхаа эв нэгдлийг эвдэх гээд бус бүр эвдээд байсан тул Н.Алтанхуяг намынхаа даргын ажлыг өгсөн гэдгийг ямар ч тэнэг хүн анзаарахаар байв. Үүнийг мэдэхийн тулд хүн амьтнаас асуугаад, ном сонин уншаад, тархи толгойгоо гашилгаад байх хэрэг огт байсангүй. Тэгвэл энэ хуралдааныг хараад сөрөг намынхан нь жинхэнэ эв эеийг сахиулагчаа ёстой эв эеийг эвдрүүлэгчээр солилоо доо гээд л баярлацгааж байв. Аргагүй шүү дээ, улстөрийн том тулаан хаяанд ирчихээд байхад “даваан дээр морио сольж буй” тэнэгүүдийг хараад өрсөлдөгч хэн ч бай баярлана биз дээ.

  Улстөрчдийг худалч л гэдэг юм. Сонгуулийн үеэр ичсэндээ нүүр улайх нь байтугай айсандаа царай цайрмаар юм хүртэл ярьж, амалдаг тал бий. Харин намын дарга нь намынхаа хурал дээр намынхаа гишүүд, төлөөлөгчдийн өмнө худлаа ярьдаг тохиолдлыг огт санахгүй байна. Учир начир нь тодорхой шүү дээ.

  Нар гарахаар намрын өглөөний гол дагасан манан арилдаг шиг эдүгээ АН-ын дарга З.Энхболдын далд санаа улам ил болоод байгааг адгийн мангар ч анзаарахааар байна. Өөрөөр хэлбэл түүний хурал дээрээ намын даргын тамгыг аваад хэлсэн үг үйлдэл дээрээ огт өөрөөр бууж эхэлжээ.

  Хэдийгээр ам алдвал барьж болдоггүй гэсэн нэг үг байдаг ч эрх мэдлээр дамжсан эдийн засгийн шуналтангуудад энэ үг огт хамаардаггүй. Тийм хүмүүс нам байтугай эх орноо ч золиход бэлэн явдаг. Тэдгээрийн нам, эх орон нь ерөөсөө л эд хөрөнгө, төгрөг мөнгө.

З.Энхболд: Таны хийж хэрэгжүүлж байсан бүхнийг үргэлжлүүлж, эв эеийг сахин, ялалтын тань буухиаг үргэлжлүүлнэ гэдгээ хэлье

  З.Энхболд даргын ахалдаг “Шонхор” фракцийн байгуулсан “Ардчилсан хүчний холбоо” Ардчилсан намыг үнэхээр ойлгомжгүй байдалд аваачлаа. Уг нь өдийд намын даргын ирэх сонгуульд хүч үзэх хүмүүсээ тодруулах ажил хаа сайгүй ид оволзож баймаар. Гэтэл намын дарга нь Ардчилсан хүчний холбоо гэх төрийн бус байгууллагын ажлыг хөдөө гадаагүй хийгээд юун намтай мантай. Заримдаа УИХ-ын даргынхаа ажлыг ч ацаглачихаад л харайж явахыг бодоход түүний алсын зорилго юу юунаас хамгийн чухал бололтой. Харин энэ хүн ямар зорилготойг эрхэм та тааж олоорой гэх байна.

  Ерөнхийдөө Ардчилсан намын дотоодод ойлгомжгүй байдал нэгэнт үүслээ. “Шонхорууд” ч үнэхээр махчин шувуу шиг үзэлцэж байна. Мөнгө ч үнэхээр хүчтэй гэдгээ бас харуулж байна. Харин энэ намын гишүүд гэхээсээ илүүтэй түүнийг дэмжигчид нь гайхаад л хараад сууж буй. Энэ бол гамшиг. Ардчилсан нам ирэх сонгуульд ялах эсэх нь бүүдийгээд явчихаж байгаагийн шинж. Яагаад гэхээр энэ дэмжигчид гэдэг лүднүүд чинь тун савалгаатай ард түмэн. Тэднээс сонгуулийн үр дүн нэлээд хэмжээгээр хамаардаг талтай.

  Ерөнхийдөө Н.Алтанхуягийг намын даргын суудлаас нь үдэхдээ шинэ даргын нь амлалт эхнээсээ нурж магадгүй байна. Эв эеийг хичээх явдал л ямар ч байсан нэлээд эвгүй төрхтэй болоод ирлээ. Мөн үүнийг дагаад ялалтын буухиаг үргэлжлүүлнэ гэдэг асуудал ч тэр чигтээ тэмбэржүржиг болж магадгүй болов. Яасан гэхээр хамгийн сүүлийн судалгаагаар АН-ын рейтинг МАН-аас 20 пунктээр илүү байсан бол одоо таван пунктээр өрсөлдөгчөөсөө доор орж, 25 пунктээр унажээ. Уг нь Ерөнхийлөгчийн сонгуульд хоёр удаа ялж, УИХ-ын сонгуульд олуулаа болсон АН-ыг Н.Алтанхуяг түүнд өгч байв. Мөн Улаанбаатар хотын даргын суудлыг анх удаа намдаа авчирч, 21 аймгаас 16-д нь засаглаж азаргалсан АН-ыг түүнд хүлээлгэж өгсөн юмдаг. Тэгвэл өдрийн тоогоор рейтинг нь унаж, хоногийн хэмжээгээр хооронд нь зай гараад байгаа АН-ын даргад өнөөдөр л гишүүд нь түүний амлалтыг сануулахгүй бол маргааш гэхэд оройтно. Яагаад гэхээр бүтэн дөрвөн жил чилийтэл хүлээсэн спортын олимпоос гадна улстөрийн “олимпийн наадам” Монголд хэдхэн сарын дараа эхэлнэ. Ингэхэд энэ наадмыг АН авчихаасай гэсэн түм буман хүн байдаг юм шүү дээ.   

Д.Гал