Цагдаагийн алба хаагчид хүний аминд хүрсэн талаар дөнгөж сая ЦЕГ-ын хэвлэл мэдээллийн төвийн мэргэжилтэн, цагдаагийн ахмад Ё.Лхагвасүрэн мэдээлэл өглөө.

Тэрбээр "Баянзүрх дүүргийн 7-р хорооны нутаг дэвсгэрт аравдугаар сарын 24-ний өдөр буудалд амь насаа алдсан хүн байна гэсэн мэдээллийн дагуу цагдаагийн байгууллага очиж шалгалтын ажиллагаа хийжээ. Шалгалтын ажиллагаа хийхэд тухайн иргэн гадны нөлөөтэй амь насаа алдсан байх магадлалтай байсан. Уг хэрэгт Баянзүрх дүүргийн цагдаагийн хэлтэс, Мөрдөн байцаах газрын ажлын хэсэг ажлан тухай гэмт хэргийг түргэн шуурхай илрүүлэн гэмт хэрэгт сэжигтэн этгээдүүдийг саатуулан шалгалтын ажиллагаа хийгдэж байна. Сэжигтнээр тооцсон этгээдүүдийн дотор цагдаагийн байгууллагад ажилладаг албан хаагч нар холбогдсон байх магадлалтай учир тухайн хүмүүсийг Хорих 461-р ангид саатуулан мөрдөн байцаалтын ажиллагааг эхлүүлээд байна. Тухайн хэргийн улмаас 22 настай эрэгтэй У гэгч амь насаа алдсан" гэлээ.

Эх сурвалжийн хэлж буйгаар Цагдаагийн ерөнхий газрын Тусгай хэлтсийн гурван ажилтан өнгөрсөн баасан гаригт “VENUS” бааранд нэгэн иргэнийг зодож амь насыг нь хөнөөсөн байна.  Уг хэргийн талаарх мэдээлэл бямба гаригт буюу энэ сарын 24-ний өглөө БЗД-ийн Цагдаагийн хэлтэст ирж, улмаар хэргийн газарт цагдаагийн алба хаагчид очиход  зодуулж гэмтсэний улмаас амиа алдсан байдалтай нэгэн иргэний цогцос олджээ. Хохирогч Элитийн батальон буюу Зэвсэгт хүчний 150 дугаар ангид алба хаадаг байсан бөгөөд түүнийг зодож амь насыг нь хохироосон таван хүний гурав нь ЦЕГ-ын Тусгай хэлтсийн хоёр ахлах дэслэгч, нэг ахлагч цолтой ажилтан байсан аж.

Д.Ундрах /24tsag.mn/