Цэцэрлэгийн тогооч арван сартай хүүхдийг хооллохдоо хэрцгийгээр зодсон хэргийг энэ сарын 24-ны өдөр шүүхээр болжээ.

Тодруулбал өнгөрсөн оны арваннэгдүгээр сард Дундговь аймгийн Мандалговь сумын “Оюуны хөгжил” хувийн цэцэрлэгийн тогооч арван сартай хүүхдийг хооллохдоо хэрцгийгээр зодож, загнаж байсан бичлэг цахим сүлжээгээр тархсан. 

Улмаар тус цэцэрлэгийг үйл ажиллагаа явуулах эрхийг нь бүр мөсөн цуцалж, улсаас хүүхэд тус бүрийн тоогоор өгдөг байсан санхүүжилтийг зогсоосон юм.

Энэхүү хэрэгт Дундговь аймгийн цагдаагийн газар шалгалт хийж Эрүүгийн хуулийн 181.1- р зүйлд заасны дагуу яллах дүгнэлт үйлдүүлэхээр  прокурорт шилжүүлжээ. Харин прокурорын байгууллагаас мөн яллах дүгнэлттэйгээр хэргийг Дундговь аймаг дахь сум дундын эрүүгийн хэргийн анхан шатны шүүхэд шилжүүлсэн бөгөөд тус хэргийг энэ сарын 24-ны өдөр шүүхээр болжээ.

Эрүүгийн хуулийн 181 дүгээр зүйлд  “181.1. Бусдыг илтэд үл хүндэтгэн хүч хэрэглэх буюу хүч хэрэглэхээр заналхийлж, нийгмийн хэв журмыг ноцтой зөрчсөн бол хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл гурван жил хүртэл хугацаагаар хорих ял шийтгэнэ” гэж заажээ.