Хөдөлмөрийн үндэсний намын анхан шатны хороодын дарга, удирдлагууд өнөөдөр сэтгүүлчидтэй уулзаж цаг үеийн асуудлаар мэдээлэл өгсөн юм. Энэ үеэр Дархан-Уул аймгийн ХҮН намын дарга Б.Отгонбаатартай уулзаж, цөөн асуултад хариулт авлаа. 

-Сэтгүүлчидтэй уулзалт зохион байгууллаа, ХҮН намын анхан шатны хороодын дарга нар. Цаг үеийн асуудлаар мэдээлэл хийлээ. ХҮН намын дарга ингэхэд хэн юм бэ?

 -2016 оны нэгдүгээр сарын 17-18-нд  Хөдөлмөрийн Үндэсний  нам ээлжит  бус хурлаа хийж намын төлөөллийн төв байгууллага  болох Төв хороогоо 58 төлөөлөгчийн бүрэлдэхүүнтэйгээр байгуулсан. ХҮН өнөөдрийн байдлаар 20.000 гишүүнтэй болсон байна. Байгуулагдаад таван сар л болж байгаа намын хувьд маш том үнэлгээг авч байгаа хэмээн бодож, ойлгож, баярлаж байна. Намын ээлжит бус хуралдаанаар 21 аймаг 9 дүүргийн намын анхан, дунд шатны гишүүд болох 342 төлөөлөгчид хэлэлцэж, УИХ-ын гишүүн С.Ганбаатарыг намын даргаараа сонгосон.  Тиймээс ХҮН намын дарга С.Ганбаатар гэдэг ганцхан хүн л байгаа гэсэн үг.

-Нийгэмд С.Ганбаатарыг намын даргаас огцорсон гэдэг мэдээлэл цацагдсан?

-Намын дэд дарга асан Б.Найдалаа нарын хэсэг бүлэг хүмүүс хуурамчаар хуралдаж, намын даргыг өөрчилж, өөрийгөө сонгогдлоо хэмээн шоудсан. Энэ мэдээллээ үнэмшил төрүүлэх зорилгоор   олон нийтэд цацсан. Гэхдээ энэ мэдээлэл худлаа гэдгийг өнөөдөр хүмүүс ойлгож, ач холбогдол өгөхгүй байгааг анзаарч байна. Худал зүйл хормын дотор үнэнд гүйцэгдэнэ гэж энэ шүү дээ. Дахин хэлэхэд Хөдөлмөрийн Үндэсний намын 20 мянган гишүүд дэмжигчид ээлжит бус хурлаараа ганцхан С.Ганбаатар гэдэг хүнийг л сонгосон. Тийм учраас Б.Найдалаа, Т.Доржханд нарын тавьсан жүжигт ач холбогдол өгөөгүй. Тиймээс иргэд сонгогчид маань ч бас энэ худал жүжигт ач  холбогдол өгөх хэрэггүй гэж хэлмээр байна.

-Намын даргын асуудлаар маргаан гарсан нь орон нутгийн дэмжигч, гишүүдэд хэрхэн хүрсэн бол?

-Иргэд, сонгогчид, дэмжигчид маань ухаантай хүмүүс. Тиймээс өөрсдийгөө намын дарга, удирдлага гэж өргөмжилсөн дүрдээ итгэсэн нөхдүүдэд огтхон ч итгээгүй. Тэгээд ч ХҮН намын генсекээр ажиллаж байсан Т.Доржханд, дэд дарга асан Б.Найдалаа нар хамаатан садан, ах дүү нараа оролцуулан 30 хүнтэй хурал хийснээ намын гишүүдийн төлөөлөл хэмээн шоудсан гэдгийг бүгд мэдсэн. Хөдөө орон нутагт ажиллаж амьдарч байгаа гишүүд дэмжигч маань “Энэ нөхдүүд болих байлгүй” гэж Найдалаа нарын өдүүлсэн хэрэгт хүлээцтэй хандсан. Харамсалтай нь эдгээр нөхдийн явуулга зогсохгүй байгаа учир “Бид Хөдөлмөрийн Үндэсний намын даргаар С.Ганбаатар гэдэг хүнийг сонгосон” гэдгээ төр түмэндээ дуулгахаар ирсэн. Энэ намын цорын ганц дарга бол С.Ганбаатар. Бид их хурлаараа сонгочихсон юм шүү дээ.