“Ирвэс хамгаалах сан”-гийн биологич мэргэжилтэй залуу учир битүүлгээр амиа алдсан хэрэг өнгөрсөн оны сүүлчээр гарсан. Түүний үхлийн шалтгаан өнөөдөр ч таавар хэвээр байгаа.

Цагдаагийн байгууллагаас "Т.Лхагвасүмэрэл агсан нь бага зэргийн согтолттой үедээ живж амиа алдсан" гэх шинжээчийн дүгнэлт гарсан талаарх мэдээллийг олон нийтэд хүргэж байсан. Тэгвэл энэхүү дүгнэлтийг түүний ар гэрийнхэн болоод хамт олон, найз нөхөд нь хүлээн зөвшөөрөхгүй байгаа бөгөөд хэргийн үнэн мөнийг олж өгөхийг хүссээр байгаа юм. 

Тэгвэл өнгөрсөн долоо хоногоос эхлэн Т.Лхагвасүмбэрэл агсны нас барсантай холбоотой мэдээллийг албан ёсоор иргэдээс авч эхэлжээ. Тодруулбал, хэрэг гарахаас өмнө биологич Т.Лхагвасүмбэрэл агсан Улаанбаатар хотоос Хөвсгөлийн чиглэлд “УБМ-13-39” улсын дугаартай саарал өнгийн “Prado” автомашинтай явах үеийн болон Мөрөн сумын долоодугаар хорооны нутаг дэвсгэрт байрлах “Ник-Петровис” шатахуун түгээх станцаас шатахуун авч буй бичлэг камерт үлдсэн нь олдсон байна.

Тиймээс Хөвсгөл аймгийн цагдаагийн 7038102 дугаарын утсанд үнэн зөв мэдээлэл өгөхийг хүсч байна. Тухайн цаг хугацаанд талийгаач Т.Лхагвасүмбэрэлтэй тааралдсан, түүнийг харсан, уулзсан иргэд болон цайны газраар үйлчлүүлж байсан хүмүүсээс мэдээлэл хүлээн авахаар болжээ.

Түүнчлэн эл хэрэг дээр ажиллаж буй Ажлын хэсгийнхэн Хөвсгөл аймагт шалгалт хийгээд ирсэн байна. Өмнөх шалгалтыг дутуу хийсэн тул зарим нэгэн зүйлийг тодруулах шаардлагатай хэмээн үзсэн учир ийнхүү тус аймагт ажиллаад ирсэн гэдгийг эх сурвалж мэдээлэв.