Өчигдөр үдээс хойш АТГ-ын дөрвөн байцаагч МАХН-ын дарга Н.Энхбаярыг хайж Төрийн ордонд ирэв. Тэд Н.Энхбаяртай уулзсан бөгөөд байцаалт өгөхийг хүссэн албан шаардлагыг гардуулаад буцсан байна. Харин Н.Энхбаяр дахин хэлмэгдүүлэх гэж байна гээд хүлээж аваагүй аж.

Үүнээс өмнө Төрийн ордонд нэгэн үйл явдал болсон бөгөөд АТГ-ынхан ирж буй сургаар Н.Энхбаярын багийнхан буюу МАХН-ынхан Шадар сайд Ц.Оюунбаатарын өрөөнд цуглаж хуралдсан юм. Харин АТГ-ын байцаагчид яг энэ хурал дээр нь орж шаардлагаа өгчихөөд буцжээ.

Бидний харснаар АТГ-ын энэ удаагийн үйлдэл Н.Энхбаярыг ихээхэн сандаргасан нь тодорхой байлаа. Тэрбээр яг л ачигдах гэж буй аятай намынхан болон хүү Э.Батшугартайгаа уулзаж ордны коридороор нааш, цааш хөлхөж харагдсан юм. Мөн намын удирдлагууд түргэн авч Шадар сайдын өрөөнд цугласанаас гадна МАХН-ын жирийн гишүүд, дэмжигчид хүртэл ордны гадна бөөнөөрөө ирж зогссон байв.

Гэтэл АТГ-аас зүгээр л нэг шаардлага өгөөд буцлаа. Гэхдээ тэдний өгсөн шаардлагад Н.Энхбаярыг байцаах, мэдүүлэг авах хэрэгтэй байгааг дурьдсан нь тодорхой байгаа юм.

        Болж өнгөрсөн үйл явдлын талаар Шадар сайд Ц.Оюунбаатар хэлэхдээ "Албан шаардлага Н.Энхбаяр даргад хаяглагдаж ирсэн. Миний нэр дээр ирээгүй учраас би агуулгыг нь сонирхоогүй. Манай намынхан хуралдаж байх үед буюу 13.15 цагийн орчимд гаднаас дөрвөн хүн ямар ч бичиг баримтгүйгээр Шадар сайдын өрөөнд дайрч орж ирсэн. Ингэхдээ “албан шаардлага өгөх гэж байна” гэсэн тайлбар хийсэн. Энэ асуудал нь Монгол Улсын хууль тогтоомж тэр дундаа Төрийн ордны тухай хууль, УИХ-ын гишүүний тухай хууль, Монгол Улсын Засгийн газрын гишүүний тухай хууль тогтоомжийг зөрчсөн үйлдэл. Төрийн тусгай байранд хууль бусаар дайрч орж ирсэн тэднийг АТГ-ын хүмүүс гэж үзэж байна. Иймд АТГ-ын дарга Н.Ганболдоос тайлбар авахыг хүссэн албан шаардлага хүргүүллээ. Мөн Төрийн тусгай байранд бидний зөвшөөрлөөр байнгын буюу түр үнэмлэхтэй хүмүүс нэвтрэх ёстой. Гэтэл бичиг баримтгүй хүмүүс МУ-ын Шадар сайдын өрөөнд дайрч орж ирж байгаа нь Монгол Улсад хууль ёс, хүний эрх, төрийн албаны аюулгүй байдал зөрчигдөж байгаагийн илрэл. Энэ бол маш ноцтой асуудал гэдгийг Шадар сайдын хувьд, УИХ-ын гишүүний хувьд, Хүний эрхийн салбарт ажилладаг хуульч хүний хувьд мэдэгдэж байна. Манай улс дэлхийн 100 гаруй орны зочид төлөөлөгчийг хүлээн авч АСЕМ-ын чуулган зохион байгуулах гэж байна. Гэтэл ийм үед Төрийн ордонд тусгай зөвшөөрөлгүй дайрч орж ирсэн балмад үйлдлийг хуулийн хүрээнд мөрдөн шалгахыг шаардаж Монгол Улсын Тусгай хамгаалалтын газрын даргыг дуудуулж уулзана" гэсэн юм.

Ер нь бол аль эртнээс АТГ Н.Энхбаярыг боргоож эхэлсэн бөгөөд  тэрбээр очихгүй цааргалсаар байжээ. Н.Энхбаяр ер нь л хуулийн байгууллагаас дуудахад очих дургүй хүн. Ямарсайндаа л Ерөнхийлөгч Ц.Элбэгдорж нэгэн цагт Н.Энхбаярт зориулж “Хууль дуудсан бол л зангиагаа засаад гутлаа өмсөөд очиж бай” гэж хэлж байхав дээ. Хуулийн байгууллага дуудсан цагт очоогүй учраас цагдаагийхан түүнийг гэрээс нь бор оймстой хөлийг нь гозолжуулаад авч явсан түүхтэй.

Эх сурвалжийн мэдээлж буйгаар АТГ-аас МАХН-ын дарга Н.Энхбаярыг ЭМС-ын сайд асан Г.Шийлэгдамба болон санхүү хариуцсан нарийн бичгийн дарга П.Цогтбаатар нарын авлигалын хэрэгт холбогдуулан байцаалт авахаар ийнхүү дуудаж байж магадгүй юм. Учир нь Г.Шийлэгдамба намын санхүүжилт болгож авсан мөнгөө намын дарга Н.Энхбаярын гарт атгуулсан гэж хэлсэн. Түүний уг мэдээллээр АТГ-ынхан шалгаж байхад МАХН-ын нарийн бичгийн дарга П.Цогтбаатар “Би Г.Шийлэгдамбаас мөнгийг нь авсан" гэж мэдүүлээд байгаа. Түүнийг Н.Энхбаярыг хамгаалж өмнөөс нь шалгуулж байгаа гэх хардлага ч байгаа юм. Харин Г.Шийлэгдамба “Н.Энхбаярт өөрт нь өгсөн" гэж хэлсэн. Энэ мэт учир нь олдоогүй байгаа нөхцөл байдлыг тогтоохын тулд Н.Энхбаярыг АТГ-ынхан боргоож буй нь энэ аж.

Дээрээс нь Н.Энхбаяртай холбоотой 500 сая төгрөгийн асуудал дахин сөхөгдөж эхэлсэн. Тодруулбал, МАХН-ын гишүүн Д.Сандуйжав гэх эрхэм Н.Энхбаярт намын санхүүжилт нэрээр 500 сая төгрөгийг өгсөн гэдэг. Тэрбээр өгсөн мөнгөө буцаан авах хүсэлт гаргахад Н.Энхбаяр өгөхгүй гэж хэлээд "Уг асуудлаар АТГ-т ханд" /2015.9.23-ны өдөр/ гэж хэлсэн байдаг. Тиймээс иргэн Д.Сандуйжав өнгөрсөн сард Н.Энхбаярыг АТГ-д өгчихсөн билээ.

Энэ мэт Н.Энхбаяртай холбоотой шалгах хэрэг хууль, хяналтын байгууллагад арвин бий.

Т.Хулан