Шинэчлэлийн Засгийн газраас хэрэгжүүлсэн “Нүүрс” хөтөлбөрөөс их хэмжээний мөнгө хувьдаа завшиж шамшигдуулсан гэх хэрэгт сэжиглэгдэж буй Л.Гансүх, "Эж Эл Эс Би Ди” компанийн захирал Н.Даваахүү, тус компанийн нягтлан бодогч Б.Мөнгөнтуяа нарт холбогдох хэргийн хяналтын шатны шүүх хуралдаан Улсын Дээд Шүүхэд үргэлжилж байна. Шүүх хурлын процесс хэрхэн явагдаж буй мэдээллийг багцлан хүргэж байна.

10:42 минут:  Өмгөөлөгч  Ц.Баасандорж уг шүүх хуралдаанд Л.Гансүхийг өөрийн биеэр оролцуулах мөн шүүх хурлын процессыг телевизээр шууд дамжуулах хүсэл гаргасан ч хүлээж авсангүй. Түүнчлэн Л.Гансүхийг онлайнаар ч шүүх хуралд оролцуулах боломжгүй гэсэн шийдвэрийг гаргав.  Хэргийг Улсын дээд Шүүхийн Танхимын тэргүүн Т.Уранцэцэг, шүүгч Б.Бат-Эрдэнэ, Б.Батцэрэн, Ч.Хосбаяр, Б.Цогт нар шүүж байгаа юм. Шүүх хуралд УИХ-ын гишүүн Н.Алтанхуяг, түүний өмгөөлөгч Ц.Баасандорж нарын гурван өмгөөлөгч мөн Б.Мөнгөнтуяа, Н.Даваахүү нар ирсэн байна.

10.02 минут:  Л.Гансүх нарт холбогдох шүү хурал Улсын Дээд Шүүхэд эхлэв. Шүүх хуралдаанд Ерөнхий сайд асан УИХ-ын гишүүн Н.Алтанхуяг хүрэлцэн ирлээ.

Л.Гансүхэд 3,6 тэрбум төгрөг завшсан гэх үндэслэлээр анхан болон давж заалдах шатны шүүхээс 4.6 жилийн хорих ял оноосон билээ.  Харин Н.Даваахүүгийн мэргэжлийн ажил хийх эрхийг хоёр жилээр хасч, хөдөлмөрийн хөлсний доод хэмжээг 100 дахин нэмэгдүүлсэн буюу 19 сая 200 мянган төгрөгөөр торгох, Б.Мөнгөнтуяад мэргэжлийн ажил хийх эрхийг хоёр жилээр хасч, хөдөлмөрийн хөлсний доод хэмжээг 100 дахин нэмэгдүүлсэн буюу 19 сая 200 мянгөн төгрөгөөр торгох ял оногдуулсан. Анхан шатны шүүхээс ял шийтгүүлсэн дээрх гурван иргэнээс нийт 2 тэрбум 539 сая 730 мянга 860 төгрөгийг хувь тэнцүүлэн гаргуулж, “Багануур” ТӨХК-д олгох шийдвэрийг шүүх гаргасан. Татвараас зайлсхийсэн асуудлын тухайд Эдийн засгийн ил тод байдлын тухай хуульд хамруулан, өршөөсөн. Энэ шийдэврийг хүлээн зөвшөөрөөгүй тул шүүгдэгч нар давж заалдах шатны шүүхэд гомдол гаргасан ч анхан шатны шүүхийн шийдвэрт өөрчлөлт оруулалгүйгээр хэвээр үлдээхээр шийдвэрлэсэн байдаг. Тэд уг шийдвэрийг ч хүлээн зөвшөөрөлгүй Улсын дээд шүүхэд хандсан нь энэ юм.

Дээд шүүхэд ажиллаж буй манай сурвалжлагчийн мэдээлж буйгаар шүүх танхимд болон эргэн тойрон дахь обьектод сүлжээ унагагч ашиглаж байгаа гэнэ.

24tsag.mn