Шинэчлэлийн Засгийн газраас хэрэгжүүлсэн “Нүүрс” хөтөлбөрөөс их хэмжээний мөнгө хувьдаа завшиж шамшигдуулсан гэх хэрэгт буруутгагдаад буй Л.Гансүх нарт холбогдох хэргийг өнөөдөр Дээд шүүх хэлэлцэж байгаа юм. Шүүх хурал өглөөний 9 цагт эхэлсэн бөгөөд хурлын эхэнд шүүгдэгч тал болон бусад талын гаргасан хүсэлтийг хэлэлцсэн.

Л.Гансүх шүүх хуралд онлайнаар оролцох, Ц.Баасандорж өмгөөлөгч шүүх хуралд проектор ашиглах, TV9 телевиз шүүх хурлыг шууд дамжуулах хүсэлт гаргасан юм. Харин шүүгчид эдгээр хүсэлтийг хэлэлцээд, TV9 телевизийг шүүх хурлын эхлэл төгсгөлийг шууд дамжуулах боломжтой харин үлдсэн хүсэлтүүдийг хүлээж авах боломжгүй, гомдол гаргах эрхгүй гэснээр шүүх хурлыг цааш үргэлжлүүлсэн.   

Үүний дараа илтгэгч шүүгч, шүүгдэгч талынханы гаргасан гомдлыг уншиж танилцуулаад шүүгдэгч талын өмгөөлөгч болон хохирогч талын өмгөөлөгч, прокурорын саналыг сонссон юм. 

Л.Гансүх хяналтын шатны шүүхэд гомдол гаргахдаа "Нүүрс хөтөлбөр нь хэрхэн хэрэгжсэн, “Эм Жи Эс Би Ди” ХХК энэ ажилд ямар үүрэгтэй оролцсон, “Багануур” ХК “Нүүрс хөтөлбөр”-өөс болж хохирсон эсэхийг тайлбарласан байна. Мөн АТГ нь улс төрийн зорилготой зохиомол хэрэг үүсгэсэн гэдгийг нотлох баримтуудаар тайлбарлажээ.

Улсын прокурор н.Бурмаа “Нүүрс хөтөлбөр нь Засгийн газрын хэрэгжүүлсэн ажил биш. Харин Л.Гансүх нь гэр хорооллын нэгэн настай эмэгтэйн хэлснээр нүүрсний үнийг буулгах ажлыг хийсэн бөгөөд нэг үгээр хэлэхэд нүүрсний ченж хийсэн юм билээ. Үүнийг ч Хангай захад нүүрс зардаг хүн хэлж байна лээ. Тэгэхээр Л.Гансүх нүүрсний ченж л хийсэн юм билээ” гэв. Харин үүний дүгнэлт гэмээр хачирхалтай зүйл ярьсныг ахлах шүүгч эсэргүүцэн түүнийг зөвхөн саналаа хэлэх ёстой гэдгийг сануулбал тэрбээр мөн л “Л.Гансүх нүүрсний ченж хийсэн. Тэгэхээр анхан болон давж заалдах шатны шүүхийг шийдвэрийг хэвээр үлдээж өгөөч” гэх саналыг хэлэв.

Харин түүний өмгөөлөгч Ц.Баасандорж хяналтын шатны шүүхэд гомдол гаргахдаа таван үндэслэлийг дурдсан байна. Тухайлбал “Багануур” ХК-ийн ТУЗ тогтоосон үнээр нүүрс худалдан авсан  байтал 1.7 тэрбум төгрөгийн хохирол учирсан эсэх, жингийн зөрүүнээс алдагдал үүсэж, хохирол болох боломжгүй талаар болон “Нүүрс хөтөлбөр” нь гэмт хэрэг биш, “Багануур” ХК ч хохирогч бус гэдгийг нотлох баримт үндэслэлээр тайлбарласныг илтгэгч шүүгч уншиж танилцуулсан. Харин тэрбээр санал хэлэх үед дээрх гомдол саналаа хэлээд, хэргийг хэрэгсэхгүй болгон цагаатгаж өгөхийг хүссэн юм.

н.Цэрэнжээ өмгөөлөгч энэ хэрэгт Эрүүгийн хуулийг буруу ашигласан талаар 8 үндэслэлийг дурдсан бол Н.Даваахүү, Б.Мөнгөнтуяа нарын өмгөөлөгч н.Шаравнямбуу үйлчлүүлэгч нараа төрийн албан хаагч бус атал төрийн албан хаагч гэсэн үндэслэлээр зүйлчлэн буруутгаж байгаа, Л.Гансүх нар нь гэрээнд заасан үүргээ биелүүлсэн байхад анхан шатны болон давж заалдах шатны шүүх хуулийн огт байхгүй зүйл заалтаар бусдыг буруутгаж байна гэж үзэж байгаа тул энэ асуудлыг нягтлан судлаж шаардлагатай гэдгийг хяналтын шатны шүүхэд гаргасан гомдолдоо дурдсан байна.  Өмгөөлөгч нар мөн санал хэлэх үед дээрхийг хэлж, анхан шатны болон давж заалдах шатны гаргасан шийдвэр магадлалыг судлан үзэж, үйлчлүүлэгч нарынхаа хэргийг хэрэгсэхгүй болгож, цагаатгаж өгөхийг хүссэн.

Тэгвэл хохирогч талын өмгөөлөгч Анхан болон Давж заалдах шатны шүүхийн шийдвэр магадлалыг хэвээр үлдээж өгөхийг хүссэн юм.

Түүнчлэн санал хэлэх үед улсын прокурор н.Бурмаа “Нүүрс хөтөлбөр нь Засгийн газрын хэрэгжүүлсэн ажил биш. Харин Л.Гансүх нь гэр хорооллын нэгэн настай эмэгтэйн хэлснээр нүүрсний үнийг буулгах ажлыг хийсэн бөгөөд нэг үгээр хэлэхэд нүүрсний ченж хийсэн юм билээ. Үүнийг ч Хангай захад нүүрс зардаг хүн хэлж байна лээ. Тэгэхээр Л.Гансүх нүүрсний ченж л хийсэн юм билээ” гэв. Харин түүнийг ийнхүү хачирхалтай зүйл ярьсныг ахлах шүүгч эсэргүүцэн зөвхөн саналаа хэлэх ёстой гэдгийг сануулбал тэрбээр мөн л “Л.Гансүх нүүрсний ченж хийсэн. Тэгэхээр анхан болон давж заалдах шатны шүүхийг шийдвэрийг хэвээр үлдээж өгөөч” гэх саналыг хэлэв.

Ингэснээр шүүх бүрэлдэхүүн эцсийн шийдвэрээ гаргахаар шүүх хурлыг түр завсарлуулсан. Дашрамд өгүүлэхэд шүүх хуралд Ерөнхий сайд асан, УИХ-ын гишүүн Н.Алтанхуяг, Дархан-Уул аймгийн Засаг дарга болон тус аймгийн иргэдийн төлөөлөл оролцож байгаа юм.   

Улсад их хэмжээний хохирол учруулсан гэх энэ хэрэг тун удахгүй дэнслэгдэнэ. Бид энэ талаар эргэн мэдээлэх болно.   

24tsag.mn   Б.Энхжин