Шинэчлэлийн Засгийн газраас хэрэгжүүлсэн “Нүүрс” хөтөлбөрөөс их хэмжээний мөнгө хувьдаа завшиж шамшигдуулсан гэх хэрэгт сэжиглэгдэж буй Л.Гансүх, "Эж Жи Эл Эс Би Ди” компанийн захирал Н.Даваахүү, тус компанийн нягтлан бодогч Б.Мөнгөнтуяа нарт холбогдох хэргийн хяналтын шатны шүүх хуралдаан Улсын Дээд Шүүхэд өнөөдөр болж дөнгөж сая эцсийн шийдвэрээ гаргалаа. 

Шүүгчид Л.Гансүхэд анхан болон давж заалдах шатны шүүхээс оноосон 4.6 жилийг 3.6 жил болгон бууруулж жирийн дэглэмтэй хорих ангид ял эдлүүлэх шийдвэрийг гаргасан. Харин Б.Мөнгөнтуяад холбогдох хэргийг хэрэгсэхгүй болгож цагаатгав. 

Харин шүүгдэгч нарт ногдуулсан 2.5 тэрбум төгрөгийн хохирлыг 1.1 тэрбум төгрөг болгон бууруулж, Л.Гансүх, Н.Даваахүү нарыг хувь тэнцүүлэн "Багануур" ХК-д төлүүлэхээр шийдвэрлэсэн юм.

Үдээс өмнө хуралдсан шүүх хурал таван цаг орчим завсарласны дараа ийнхүү шийдвэрээ гаргалаа.

Дашрамд өгүүлэхэд шүүгдэгч Л.Гансүх шүүх хуралд оролцоогүй. Харин Ерөнхий сайд асан, УИХ-ын гишүүн Н.Алтанхуяг, түүний өмгөөлөгч Ц.Баасандорж нарын гурван өмгөөлөгч мөн Б.Мөнгөнтуяа, Н.Даваахүү нар ирж оролцсон юм.  Хэргийг Улсын дээд Шүүхийн Танхимын тэргүүн Т.Уранцэцэг, шүүгч Б.Бат-Эрдэнэ, Б.Батцэрэн, Ч.Хосбаяр, Б.Цогт нар хянан хэлэлцлээ. 

Дэлгэрэнгүй мэдээллийг эргэн хүргэх болно.

24tsag.mn  Б.Энхжин