Сүүлийн хэдэн өдөр сошиал ертөнцөөр "Эрдэнэс Таван Толгой" ХК-ийн 1072 хувьцааг худалдаж авна гэсэн зар нэлээд явсан. Энэ талаар Хөрөнгийн Биржийн гүйцэтгэх захирал асан Д.Ангар өөрийн байр суурийг ийнхүү илэрхийлжээ.

Гадуур хувьцааг 800 мянгаас 1 сая төгрөгөөр бэлэн мөнгөөр худалдан авч байна гэсэн цуу яриа гарсан бололтой. Уг нь техникийн хувьд боломжгүй. Үнэхээр гудамжинд зарагдаад байгаа бол Тагнуул, хүчний байгууллагууд шалгах ёстой

“Гадуур 1072 хувьцааг 800 мянгаас 1 сая төгрөгөөр гудамжинд бэлэн мөнгөөр худалдан авч байна гэсэн яриа гарч буйтай холбогдуулан хөрөнгийн зах зээлийн шинжээчийн зүгээр зарим тодруулга өгье. Цааш нь түгээнэ үү.

ЗГ-с иргэн бүрт "Эрдэнэс Таван Толгой" ХК-ийн 1072 хувьцааг үнэгүй өгсөн. Одоогийн байдлаар 800 мянган иргэн Сангийн Яамны харъяа "Үнэт цаасны төлбөр тооцооны төв" дээр өөрийн нэр дээр үнэт цаасны данс нээлгэж 1072 хувьцааны бичилтийг хийлгэсэн байна. Тиймээс 2 сая гаруй иргэн одоо хүртэл үнэт цаасны дансаа ч нээлгээгүй, 1072 хувьцааны бичилтээ ч хийлгээгүй байна гэсэн үг.

Ер нь бол иргэд Монголын Хөрөнгийн Биржийн гишүүн брокерийн аль нэг пүүст очиж үнэт цаасны дансаа нээлгэж болно. Тэгж байж иргэн нэр дээрээ 1072 хувьцаа эзэмшиж буй гэсэн бичилтийг хийж өгдөг. Гэхдээ саяхан Санхүүгийн зохицуулах хорооноос Эрдэнэс Таван Толгой компанийн хувьцаатай холбоотой бэлтгэл ажил хангагдаагүй тул иргэдийг яарч дансаа нээлгэх шаардлагагүйг мэдэгдсэн. Хувьцаа эзэмшиж буй гэсэн бичилт хийлгэсэн ч энэ нь одоогоор арилжигдаж бэлэн мөнгө болгох боломжгүй. Засгийн газраас холбогдох шийдвэр гарах учиртай.

Харин гадуур хувьцааг 800 мянгаас 1 сая төгрөгөөр бэлэн мөнгөөр худалдан авч байна гэсэн цуу яриа гарсан бололтой. Уг нь техникийн хувьд боломжгүй. Үнэхээр гудамжинд зарагдаад байгаа бол Тагнуул, хүчний байгууллагууд шалгах ёстой” гэсэн байна.