Оффшор бүсэд данстай улс төрчид болон бизнесмэнүүдийн мэдээлэл маргааш олон нийтэд ил болох гэж байна. Панамын Моссак Фонсека хуулийн фирмээр дамжуулан оффшор дансанд их хэмжээний хөрөнгө нуусан хүмүүсийн дотор дэлхийн нөлөө бүхий хүмүүс байгаа юм. Мөн манай улсаас 47 хүний мэдээлэл байгаа гэж буй. Тэгвэл дээрх мэдээлэл захаасаа задарч Монгол улсын хоёр иргэн нууц данстай болох нь илрээд байна. Тэдгээр хоёр хүний нэг нь Борхүүгийн Дэлгэрсайхан гэх хүн бөгөөд "Болд Төмөр Ерөө гол" компанийг тэргүүлж, Монголын тэргүүлэх 40 тэрбумтны жагсаалтад багтаж байсан аж. Дараагийн хүн нь Янсанжавын Очирсүх юм байна. Тэрбээр 2000 онд Засгийн газрын Сангийн яамны сайдаар ажиллаж байжээ.

Мөн Монголд бүртгэлтэй хоёр компанийн нэр тодорхой болсон байна. Тодруулбал, "Mongolia Yiluohe Steel and Iron Mining Company Limited" гэх компанийг зарлажээ. Тус компани нь 2007 оноос үйл ажиллагаагаа явуулж эхэлсэн, эзэн нь Ли Шао Мин гэх хятад хүн аж.  Түүнчлэн хоёр дахь компаниар "Mongolia Gobiceke Energy Ltd" гэх компани зарлагдсан бөгөөд мөн л Чин Шен гэх хятад эзэнтэй компани байна. Тус компани нь 2009 оноос манай улсад үйл ажиллагаагаа явуулж эхэлсэн хэмээн бүртгэлд тэмдэглэжээ.

 Монголын цагаар маргааш өглөө үүрээр "Panama papers"-т нууц мэдээллүүд тавигдаж эхлэх товтой байгаа юм.