Дэлхий нийтийн анхаарал Монгол руу чиглэсэн өдрүүд үргэлжилж байна. Олон улсын хэвлэлүүд энэ өдрүүдэд Монголыг онцолж байна. Тив, дэлхийн удирдагчид Монголд чуулж асуудлаа ярьж буй нь манай улсад чухал ач холбогдолтойг судлаачид онцолж байна.  АСЕМ-ын 51 гишүүн орон байдгаас энэ удаагийн уулзалтад төрийн тэргүүний түвшинд 10 орон оролцож байна. Тухайлбал Болгар, Кипр, Латви, Мьянмар, Өмнөд Солонгос, Хорват, Чех, Швейцарь Улсын Төрийн тэргүүн, Индонези, Энэтхэг Улсын Дэд Ерөнхийлөгч нар хүрэлцэн ирээд байгаа юм.

Япон, Хятад, Финланд, Бельги, ОХУ, Нидерланд зэрэг 23 орон Засгийн газрын тэргүүний түвшинд, Австрали, Франц, Швед зэрэг 16 орон Гадаад хэргийн сайдын түвшинд тус, тус оролцож байна. Мөн Европын холбоог төлөөлөн Европын Зөвлөлийн Ерөнхийлөгч эрхэмсэг ноён Дональд Туск, АСЕАН-ыг төлөөлж АСЕАН-ы Ерөнхий нарийн бичгийн дарга эрхэмсэг ноён Лэ Лоунг Минь тэргүүтэй төлөөлөгчид оролцож байгаа юм.

Өнөөдөр өглөө эхэлсэн АСЕМ-ын уулзалтыг нээж БНСУ-ын Ерөнхийлөгч Пак Гын Хэ, Япон улсын Ерөнхий Сайд Шинзо Абэ, БНХАУ-ын Төрийн Зөвлөлийн Ерөнхий сайд Ли Көцян нар үг хэллээ. Мөн Европын холбооны төлөөлөгчид, Европын холбооны Ерөнхийлөгч, Европын Зөвлөлийн дарга, Францын Ерөнхий сайд нар үг хэлсэн юм. Мөн уулзалтын үеэр төлөөлөгчид Францад болсон террорист халдлагад эмгэнэл илэрхийлэв.

Өнөөдрийн уулзалт хоёр үндсэн хэсгээс бүрдэнэ. Нэгдсэн хуралдаан I нь  “Түншлэлийн 20 жил: Өнгөрснөө дүгнэж, ирээдүйгээ тодорхойлох нь” сэдвээр явагдах бол Нэгдсэн хуралдаан II-аар “АСЕМ-ын түншлэлийг хөгжүүлэх өргөн уялдаа холбоо” сэдвээр явагдах аж. 

АСЕМ-ын дээд хэмжээний уулзалтаар ямар асуудал хэлэлцэх талаар судлаач шинжээчид таамаг дэвшүүлсээр байсан. Учир нь энэ уулзалтаар хэлэлцэх асуудлыг урьдчилж төлөвлөдөггүй бөгөөд тухайн үед тулгамдаж буй асуудлуудын талаар хэлэлцдэг. Энэ удаагийн АСЕМ-ын дээд хэмжээний уулзалт бүс нутгийн болоод олон улсын тулгамдсан асуудал тэр дундаа цэргийн заналхийлэл, Умард Солонгосын цөмийн зэвсгийн аюул заналын эсрэг хэрхэн хамтрах тухай далайцтай асуудлыг хэлэлцэх талбар болно хэмээн судлаачид үзэж буй. Мөн уг уулзалтаар Их Британи Европын холбооноос гарахтай холбоотой шийдвэрээс улбаалсан дэлхийн эдийн засгийн тогтворгүй байдлыг арилгах тал дээр илүү ач холбогдол өгч хэлэлцэх байх гэж ажиглагч, шинжээчид таамаг дэвшүүлсэн байна. Мөн Францад болсон террорист халдлагатай холбоотойгоор терроризмын асуудлыг хэлэлцэх нь тодорхой болоод байгаа юм.

Үүнээс гадна АСЕМ-ын уулзалтын үеэр Өмнөд Хятадын тэнгисийн газар нутгийн маргааныг хэлэлцэж магадгүй гэсэн таамаг яригдаж байсан. Харин Хятадын гадаад хэргийн дэд сайд “БНХАУ-ын Засгийн газар Өмнөд Хятадын тэнгисийн газар нутгийн маргааныг АСЕМ-ын уулзалтын хэлэлцэх асуудалд оруулаагүй, иймд үүнийг дээд хэмжээний уулзалтын үеэр хэлэлцэх асуудалд оруулах ёсгүй. АСЕМ бол газар нутгийн маргаан хэлэлцдэг талбар биш, тиймээс АСЕМ-ын үеэр Өмнөд Хятадын тэнгистэй холбоотой юу ч ярихгүй” хэмээн мэдэгджээ. Түүнчлэн БНХАУ-ын санаачилсан “Торгоны зам” эдийн засгийн бүс болоод Монголын талын санаачилсан “Талын зам” хөтөлбөрийг илүү уялдаатай болгох талаар хэлэлцэнэ гэж Хятадын хэвлэл мэдээллийн хэрэгслүүдээр мэдээлжээ.

АСЕМ нь Ази, Европ хоёр тивийн уялдаа холбоо, хамтын ажиллагаанд ихээхэн ач холбогдолтой юм. Мөн уг хурлыг өөрийн эх орондоо зохион байгуулахын ач холбогдолыг мэргэжилтүүд ийнхүү тайлбарлаж байна.

Тухайлбал,

1. Монгол Улсыг дэлхийд таниулах. /АСЕМ-ын дээд түвшний уулзалт манай улсад зохион байгуулагдаж буйтай холбогдуулан сүүлийн саруудад  дэлхий дахинд хэвлэл мэдээллийн хэрэгсэл болон интернэт орчинд Монгол орны талаарх мэдээлэл ихэд давамгайлах болжээ. Тухайлбал, интернэт орчинд Монголын талаарх мэдээлэл сүүлийн хоёр долоо хоногийн дотор гурав дахин нэмэгдсэн байна. Өөрөөр хэлбэл Монголын талаарх мэдээлэл долоо хоногийн дотор нэг тэрбум 500 сая хүнд харагдсан гэсэн статистикийг судалгааны байгууллагаас гаргажээ./

2. Монгол Улс чөлөөт худалдааны хэлэлцээр эсвэл эдийн засгийн хамтын ажиллагаанд нэгдэх.

3. Монголын аялал жуулчлалыг хөгжүүлэх.

4. АСЕМ-аар дамжуулан хөрөнгө оруулалт татах аж.

24tsag.mn