"Рио 2016" олимпийн наадмын чөлөөт бөхийн 65 кг-ийн жинд барилдсан МУГТ Г.Мандахнарангийн хувьд хүрэл медалийн төлөө өрсөлдсөн ч сүүлийн 6 секундэд өрсөлдөгчдөө боломж олголгүй зугтсан гэх үндэслэлээр хожигдсон. Г.Мандахнарангийн дасгалжуулагч Ц.Цогтбаяр, Б.Баяраа нар шүүгчдийн шийдвэрийг эсэргүүцэж дэвжээн дээр хувцсаа тайлж шидсэн нь дахин нэг онооны торгуулийг авчирсан билээ. Тэдний энэхүү үйлдэлд хариуцлага тооцох ёстой гэж Дэлхийн бөхийн холбооноос үзэн Монголын багийн тэмцээн уралдаанд орох эрхийг нь тодорхой хугацаагаар хасаад байгаа талаар МЧБХ-оос мэдэгдсэн. Мөн Монголын чөлөөт бөхийн холбоо тус хоёр дасгалжуулагчийн дотоодын болоод олон улсын тэмцээн, чөлөөт бөхтэй холбоотой ямар нэгэн үйл ажиллагаанд оролцох эрхийг нь хасаж буйгаа мэдэгдсэн юм.
Харин дасгалжуулагч Ц.Цогтбаяр, Б.Баяраа нар уг шийдвэрийг эсэргүүцэж байгаа билээ. Ингээд тэдний байр, суурийг 24VS24 буландаа онцолж байна.
Дасгалжуулагч Ц.Цогтбаяр 2013 оноос хойш эрэгтэйчүүдийн шигшээ багийн амжилт бүх тэмцээнд өссөн байдаг. Ялангуяа 2015 оны дэлхийн аварга шалгаруулах тэмцээнд найман жингийн гурван бөх нь медаль хүртэж, хоёр нь тавдугаар байранд орж байсан. Чөлөөт бөхийнхний хоорондын атаа, жөтөө тэмцэл юунаас болоод үргэлжлээд яваад байгаа юм гэдгийг би ойлгохгүй байна. Ялангуяа тэр олимпийн эрх авах тэмцээний өмнө Чөлөөт бөхийн холбооны Ерөнхийлөгч гээд байгаа Д.Дагвадорж гэдэг нөхөр шигшээ багийн дөрвөн багшийг шүүхэд өгсөн. Бид нар олимпийн эрх авах дэлхийн аварга шалгаруулах тэмцээний үеэр бид шүүх дээр өнжиж байсан. Сүүлдээ зарим нэг багш нарт хүүхдүүдээ захиж үлдээгээд “Хүүхдүүдийг маань түр хараад туслаж байгаарай, бид хурдхан шүүхээр яваад ирье” гээд гардаг байлаа. Энэ юу гэсэн үг вэ? Энэ утгаараа бид өнгөрсөн жил “Бидний амжилтанд Чөлөөт бөхийн холбоо ямар ч хамаагүй” гэж хэлж байсан. Түүнээс хойш хүн бүхэн зүрх сэтгэлээ өгсөн олимпийн наадамд Чөлөөт бөхийн холбоо яаж хандав, бидэндтэй ирж уулзаагүй, утсаар яриагүй, олимпийн бэлтгэлд бүхэл бүтэн баг нь гарчихсан байхад “Та нар яаж байна юу болж байна, бэлтгэл ямар байна” гэж юу ч асуугаагүй, Олимпийн тосгонд очоод Д.Дагвадорж гэдэг ерөнхийлөгчтэй мэндлэхэд нөгөө сүмогийнхоо ёслогоогоор муухай харчихаад яваад өгсөн. Бид нар яах юм бэ, бид айдастай байна шүү дээ. Миний ойлголтоор Г.Мандахнарангийн барилдаан луйвартай болно, Монгол улс медаль авахгүй юм байна гэдгийг Д.Дагвадорж болон Баянмөнх, шүүгч Төмөрбаатар нар эрт мэдсэн гэж бодож байна. Яагаад гэвэл Монголын эрэгтэй хоёр тамирчин барилдсаны дараа “Бүх юм зүйл дууслаа. Одоо 00-оос нь эхлэнэ ээ” гэсэн. Гэтэл цаана нь дөрвийн дөрвөн сайхан залуу барилдах гээд үлдсэн байсан шүү дээ. Баг тамирчдаа хаяад явчихсан. Баянмөнхийн хэлсэн үгийг маш ноцтой гэж үзэж байна. Узбекын бөхийг шүүгчтэй нь ялна аа гэж хэлсэн тэр үг энэ луйвар болно гэдгийг мэдэж байсан гэсэн үг. Мэдэж байсан юм бол луйвардуулж магадгүй шүү гээд бидэнд эртхэн хэлэхгүй дээ. Хоёрдугаарт Монголын чөлөөт бөхийн холбоог төлөөлж байгаа нөхдүүд Дэлхийн бөхийн холбоонд “Энэ шүүлт чинь булхайтай болох юм байна шүү” гэдгийг яагаад урьдчилж хэлээгүй юм. Би ялагдлын дараа юугаа ч мэдэхгүй, Баяраа багшийгаа надтай хамтраачдээ, хоёулаа тэмцье л даа гээд гуйгаад, үймрээд байж байхад Төмөрбаатар гэдэг тэр мундаг шүүгч нь яг өөдөөс хараад зураг аваад л зогсож байсан шүү дээ. Миний нүцгэн зураг тэр хүнд тийм хэрэгтэй байсан юм уу. Би гайхаж байна. Дараа нь УИХ-ын гишүүн А.Сүхбат өчигдөр хурал дээр “Чиний чадал чинь хүрвэл миний өмнө шалдлаадах” гэж байна. Намайг тэгж доромжилсныг нь гайхаж байна. Ийм л хариуцлагагүй хүмүүсийн дунд багш дасгалжуулагч, тамирчид бид чинь байна. Бид уучлалт гуйх учиргүй юм байгаа юм. Б.Баяраа багш бид хоёр булхайтай шүүлт гараагүй, дүрмээ зөрчөөгүй л байсан бол хувцасаа тайлахгүй байсан. Дэлхийн чөлөөт бөхийн холбоо, Монголын чөлөөт бөхийн холбооны хоорондын тохироо, хоёр багшаар нь туг тахиад, хэл амгүй өнгөрөөе гэсэн юм байж болох юм. Тэд хоёр багшийг шийтгэсэн дүртэй чөлөөт бөхийг аварч үлдье, уучлалт гуйгаад болоо гэж бодож байгаач Г.Мандахнарангийн медалийг хөөцөлдөх ямар ч эрхгүй, боломжгүй болгож байна |
Чөлөөт бөхийн холбооны удирдлагууд Дэлхийн бөхийн холбооноос хариуцлагын албан тоот хүргүүлэх тухай нууцлалын зэрэгтэй албан бичиг ирүүлсэн. Тус албан бичигт манай улсын тамирчдыг олон улсын тэмцээнд орох эрхийг тодорхой хугацаагаар хассан. Мөн тэд манай улс дотооддоо хоёр дасгалжуулагчдаа ямар хариуцлага тооцохыг ч давхар харж байгаа байх. Иймд МЧБХ-ны хурлаар чөлөөт бөхийн шигшээ багийн ахлах дасгалжуулагч Ц.Цогтбаяр, дасгалжуулагч Б.Баяраа нарыг олон улс болон дотоодын бүх тэмцээн, чөлөөт бөхийн үйл ажиллагаанд оролцох эрхийг хоёр жилээр хассан. Дэлхийн хүн төрөлхтөний эв нэгдлийн наадам болсон олимпийн наадамд Монгол улс 1962 онд элсэж орж өдгөө 13 дахь удаагаа амжилттай оролцсон байна. Энэ хугацаанд есөн медаль авсан байна. Төр засаг ард түмнээрээ спортын хорооны мөнгийг шийдэж өгсөнд баярлалаа. Манай хоёр дасгалжуулагч бөхийн дэвжээн дээр зохисгүй үйл, танхайн хэрэг үйлдсэнд харамсаж байна. Бид бүхэн ард түмнээсээ уучлал гуйж байна. Манай хоёр дасгалжуулагч бөхийн дэвжээнд танхай явдал гаргасанд их харамсаж байна. 2016 оны олимпийн наадамд төр засгаас 8 тэрбум гаруй төгрөг шийдэж өгсөн нь урьд өмнө байгаагүй их хөрөнгө. Тамирчдыг амжилт гарга гэж энэ хөрөнгийг гаргаж өгсөн. Саяхан Олон Улсын Бөхийн Нэгдсэн Төрлүүдийн Холбооноос бидэнд бичиг ирээд, есдүгээр сарын 1-нд хариу ирүүл гэсэн. Үүнээс хойш МЧБХ-ны удирдлага хоёронтаа хуралдаж, шийдвэр гаргаж байна. Энэ зохисгүй явдлыг гаргасан хоёр дасгалжуулагчтай хариуцлага тооцох ёстой. Г.Мандахнарангийн хувьд олимпийн өмнө Риод олимпийн наадмыг зохион байгуулагчид барилдааны дүрмийн тухай маш тодорхой ярьж өгсөн. Цаашдаа Монголын чөлөөт бөх хөгжих үү, эс хөгжих үү гэсэн асуудал үүсээд буй болохоор арга буюу энэ хэвлэлийн хурлыг хийлгэж байна. Г.Мандахнарангийн хувьд маш сайн барилдсан. Г.Мандахнарангийн асуудал бол тусдаа. Дэлхийн Чөлөөт Бөхийн Холбооноос албан тоот ирэхдээ Монгол дасгалжуулагчдын үйлдэл дэлхийн нэгдсэн бөхийн холбооны нэр хүндийг гутаасан. Тиймээс танай бүх тамирчныг бүх төрөлд энэ асуудлыг шийдэгдтэл бүх тэмцээнд оруулахыг түдгэлзүүлж байна гэсэн байна. |
24tsag.mn
Сэтгэгдэл (68)