Албан бус судалгаагаар өнөөдөр манай улсын хэмжээнд нийт гэр бүлийн 50-иад хувь нь хамтын амьдралтай байна. 1999 онд батлагдсан Гэр бүлийн тухай хуулинд гэр бүлийн баталгаа хийлгээгүй ч хамт амьдарч байгаа иргэдийг хамтын амьдралтай хүмүүс хэмээн тодорхойлдог. Харин өнөө үед “хамтран амьдрагчид” хэмээн нэршиж заншаад байна. Нэгэнт ийм нөхцөл үүсч нийгэмд биелэлээ олоод байгаа учраас үүнийг зохицуулах шинэ тутам эрхзүйн орчин шаардагдаж байна. Хууль тогтоох байгууллагаас анхаарлаа хандуулж Эрхзүйн шинэчлэлийн хүрээнд гэр бүлийн хүчирхийлэлтэй тэмцэх тухай хуулийг боловсруулж УИХ-аар баталсан ч буцаан татаж шинэчлэн боловсруулаад дахин өргөн мэдүүлээд байна. Тухайн хуульд нийгэмд бий болоод байгаа хамтран амьдрагчдын харилцааг зохицуулах тодорхой заалтууд орч байгаа юм. Гэхдээ тухайн хуулийг батлагдаж мөрдөгдтөл өнөөдөр хүчин төгөлдөр мөрдөгдөж байгаа хуулиар хэрхэн эрхээ хамгаалах вэ? гэдэг асуудлаар өнөөдөр Тусгаар тогтнолын талбай буюу хуучнаар Ялалтын талбайд хуульчид, сэтгэл зүйчид үнэ төлбөргүй зөвлөгөө мэдээлэл өгөх өдөрлөг зохион байгуулах гэж байна. Өдөрлөг 13-16 цагийн хооронд болно. 

Энэхүү арга хэмжээг Монголын хуульчдын холбооны гишүүн хуульчид, Сэтгэл зүйчид, Шихихутуг Хууль зүйн дээд сургуулийн оюутнууд санаачлан хамтран зохион байгуулж байна. Улсын хэмжээнд 2016 оны эхний 8 сарын байдлаар 19068 гэмт хэрэг бүртгэгдснээс 935 нь гэр бүлийн хүчирхийллийн улмаас үйлдэгдсэн байна. Энэ нь өмнөх оны мөн үетэй харьцуулахад 31,1 хувиар буюу 222 –оор нэмэгдсэн нь бүх гэмт хэрэгт эзлэх хувийн жин 4,9 хувь буюу өмнөх жилээс 1,2 нэгжээр өссөн байна. Мөн дээр дурдагдсан гэр бүлийн хүчирхийллийн гэмт хэргийн 50-иас дээш хувь нь буюу 550 нь Улаанбаатарт үйлдэгдсэн нь анхаарал татаж байгаа юм.

Энэхүү арга хэмжээг зохион байгуулах нь гэр бүлийн хүчирхийллийг бууруулахад тодорхой хэмжээгээр нөлөөллөө үзүүлнэ хэмээн үзэж байгаа юм.