АН-тай хэн эвсэх вэ гэдэг сүүлийн үед намын дарга нарын хорхойг хүргэж бас толгойг өвтгөсөн асуудал болоод байна. Басхүү шинэ Засгийн газарт хэн хэн орох вэ гэдэг асуудал ч АН дотор багагүй зөрчил үүсгээд эхэллээ. Өчигдөр АН-ын дарга Н.Алтанхуяг шинэ Засгийн газрыг толгойлно гэдгийг албан ёсоор мэдэгдсэн. Гэлээ ч бусад яамд, сайд нарыг яах вэ гэдэг асуудал олон хүний чихийг сортолзуулж, гарын алгыг загатнуулж байгаа юм.  АН-ынхан сүүлийн хэдэн өдөр нам дотроо ширүүхэн маргаж, өгөө, аваагаа ярьсны эцэст ерөнхий сайдаар Н.Алтанхуягийг томилохоор болсон нь энэ юм. Харин ийм шийдвэр гарах хүртэл олон зүйл өрнөсөн гэдгийг нам доторх эх сурвалжууд хэлж байгаа юм.
    Ширүүн ярианы эцэст АН дотор ийм маягаар бялуу хуваажээ. АН-ын “Алтан гадас” /Н.Алтанхуяг тэргүүтэй/, “Шонхор”/З.Энхболд тэргүүтэй/, "Кроун" /голдуу увсынхан байдаг/ фракцынхан Засгийн газрыг хувааж авахаар болжээ. Тэгвэл УИХ-ын гишүүн Н.Батбаяр тэргүүтэй МҮДН-ынхан УИХ-ын даргын суудалд өөрийн хүнээ томлохоор болсон гэв. Харин үүнээс илүү сонирхолтой бөгөөд ноцтой зүйл гэвэл шинээр байгуулагдах Засгийн газарт МоАХ-ны тэргүүн Х.Баттулгыг оруулахгүй гэжээ. Учир нь Х.Баттулга ерөнхий сайдын суудалд л очно гэж амбицласан сурагтай.

    Сонгуулийн урьдчилсан дүн гарснаас хойш шинэ ерөнхий сайдад Н.Алтанхуягаас илүү Х.Баттулга болох магадлалтай гэх хүн олон байсан. Зарим нь ч өмнө нь ерөнхий сайдаар ажиллаж байсан туршлагатай Р.Амаржаргал гишүүний нэрийг дурдаж байв. Х.Баттулга гишүүний хувьд өөрөө ч энэ суудалд очих гэж их хичээж зүтгэсэн гэж ойрынх хүмүүс нь хэлж байгаа юм. Харин намын нөхөд нь өөр бодолтой байгаа аж. АН олонхи болж чадахгүй нь тодорхой болсон тул хэд дахин огцорч магадгүй тийм эмзэг Засгийн газар байгуулагдана гэж тэд тооцоолжээ. Тиймээс бусадтайгаа эв зүйгээ олж ажиллах хүн хэрэгтэй гэж үзсэн байна. Харин энэ шалгуурт Х.Баттулга тэнцээгүй аж. Учир нь МАН-ын ч, МАХН-ын ч гишүүд, дарга нартай ана мана байдаг түүнийг ерөнхий сайд болвол үүссэн нөхцлийг намжаах биш харин ч дэврээх ширүүн шийдвэр гаргах хүн гэжээ. Харин Х.Баттулга Засгийн газрын тэргүүн болно гэсэн байр сууриндаа бат зогссоор байгаа гэв. Тиймээс ийнхүү зөрүүдэлж байгаа Х.Баттулгыг АН-ын бусад фракцынхан Засгийн газарт оруулахгүй гэж шийдсэн байна.
     Өмнө нь АН хамтарсан Засгийн газраас гарах шийдвэр гаргасан ҮЗХ-ны хурлаар Х.Баттулга намын удирдлагуудаа шүүмжилж байсан. Түүнийг дараагийн АН-ын даргын жагсаалтад оруулан тооцох хүн олон байгаа юм. Гэсэн ч АН доторхи олон фракциуд түүнд тийм ч амархан дийлдэхгүй гэдэг нь энэ удаагийн шийдвэрээс харагдаж эхэллээ.