Ерөнхий сайд Ж.Эрдэнэбат хэдхэн хоногийн өмнө ипотекийн зээлээр 100 м.кв хүртэлх байрыг авах боломжтой хэмээн олон нийтэд мэдэгдсэн. Түүнийг ингэж хэлэхийг сонссон зарим иргэд "Байрны м.кв-ийн хэмжээг томруулах яах вэ?. Ядаж 80 м.кв байраа асуудалгүй найман хувийн зээлээр өгчих хэрэгтэй. Найман хувийн зээлийг үргэлжлүүлэн олгож чадахгүй зогсоочихоод байрны м.кв ярьж буй нь цагаа олоогүй хэрэг. Олон зуун айл ипотекийн зээлд хамрагдахаар хүлээж байна. Тэдний асуудлыг шийдэж чадахгүй байж байрны м.кв томруулах асуудал ярих нь утгагүй. Жижиг ч гэсэн байранд орох хүсэлтэй залуус Засгийн газрын шийдвэрийг хүлээж байна" хэмээн шүүмжилж байлаа.

Харин зарим иргэд зээлээр том талбайтай байртай болох нь хэмээн баярлаж суув. Ерөнхий сайд Ж.Эрдэнэбатын мэдэгдлийн дагуу Барилга хот байгуулалтын яамны сайд Г.Мөнхбаяраар ахлуулсан баг ипотекийн зээлийн журманд өөрчлөлт оруулж 100 м.кв хүртэлх талбайтай байрыг зээлэнд хамруулах асуудлыг хөндөөд байгаа юм.

Ерөнхий сайдынхаа санаачлагыг Барилга хот байгуулалтын яам нь даруйхан ажил хэрэг болгохоор ийнхүү шулуудсан ч тэдний саналыг Монгол банк хүлээж авахгүй гэдгээ мэдэгдлээ. Тэр бүү хэл Засгийн газраас ипотекийн зээлийн журманд 100 м.кв хүртэлх талбайн хэмжээтэй байруудыг ипотекийн зээлэнд хамруулах саналыг гаргасан нь түр зогссон найман хувийн зээлийг үргэлжлүүлэн олгоход тушаа болж байгааг тус банкнаас санууллаа. Ипотекийн зээлийг санхүүжүүлэгч гол байгууллага нь ингэж мэдэгдсэн нь Ерөнхий сайд Ж.Эрдэнэбатыг судалгаагүй, бусад салбартайгаа уялдаа холбоогүй ажилладагийг тод харуулав.

Монголбанкны Мөнгөний бодлогын газрын захирал Б.Баярдаваа “Манай байгууллага ипотекийн зээлийн эх үүсвэрийг хэрхэн зарцуулж байгаа талаар арилжааны банкуудад шалгалт явуулсан. Эх үүсвэрийн зарцуулалттай холбоотой асуудлуудыг цэгцэртэл ипотекийн зээлийг түр зогсоосон байгаа. Одоо энэ асуудал нэлээд жигдэрсэн. Монголбанкнаас ипотекийн зээлийн олголтыг эхлүүлэх гэхээр нэг асуудал үүсээд байна. Тэр нь, барилга хот байгуулалтын ипотекийн зээлийн журмыг өөрчлөх шийдвэрийн төслийг боловсруулахдаа 100 м.кв хүртэлх талбайн хэмжээтэй байруудыг ипотекийн зээлэнд хамруулах асуудлыг тусгаж өгсөн. Үүн дээр Монголбанк хуучин журам дахь 80 м.кв хүртэлх талбайгаа 100 м.кв болгож нэмэгдүүлж, зээлийнхээ журмыг сулруулах юм бол санхүүжүүлэх боломжгүй гэсэн хариулт өгсөн байгаа. Монгол Улсын эдийн засаг хүнд байна. Гол нь хүндрэл нь төсөв, гадаад төлбөрийн тэнцэл дээр байгаа. Бид  ийм үед санхүүгийн сахилга батыг эрхэмлэх хэрэгтэй байна. Барилгын салбар ДНБ-ийн 4 хувь, ажиллах хүчний 9 хувийг бүрдүүлдэг. Өнгөрсөн хугацаанд мөнгө хэвлэх замаар Монголбанк засгийн газрын алдагдлыг нөхөж ирсэн. Ийм байдал цаашид удаан үргэлжилж болохгүй. Ипотекийн зээлэнд хамрагдах байрны талбайн хэмжээг 100 м.кв болгон ихэсгэх асуудлын хүрээнд  өмнө нь  байр авсан гурван мянга орчим өрхийн л асуудал байгаа. Эдгээр өрхүүдийг  найман хувь руу шилжүүлэхэд 500 тэрбум төгрөг шаардлагатай. Ийм асуудал дээр бид зах зээлээ бүхлээр нь хөдөлгөх асуудлыг сөхөж болохгүй” гэж хэлэв.

Засгийн газрын тэргүүн нь чухал асуудлаар төв банктайгаа зөвшилцөлгүй дураараа мэдэгдэл хийж тэр нь байранд амьдрах хүсэлтэй иргэдийн асуудлыг шийдэхэд төвөг, чирэгдэл учруулж нь дэндүү хариуцлагагүйн шинж.

Засгийн газрын өчигдрийн хуралдаанаар уг асуудлаарх Монголбанкны ерөнхийлөгчийн албан ёсны хариуг хэлэлцээд ипотекийн зээлд хамрагдах байранд талбайн хэмжээг 100 ам.метр кв болгож нэмэх шийдвэрийг гаргалаа. Түүнчлэн 100 ам.метр кв-аас илүү талбайтай орон сууцыг  ипотекийн зээлд хамруулах боломжтой. Зээлдэгч 100 ам.метр кв-аас илүү талбай бүхий орон сууц худалдан авбал урьдчилгаа 30 хувь дээрээ тогтоосон хязгаараас давсан талбайнхаа төлбөрийг бүрэн төлж ипотекийн зээлд хамрагдах боломжтой болгов.

Харин Монгол банкнаас өмнөх шигээ ийм хэмжээтэй байрыг санхүүжүүлэх боломж байхгүй гэх хариуг өгөх нь мэдээж. Засгийн газар дур мэдэн ийм шийдвэр гаргасан нь ипотекийн зээлийг санхүүжүүлэх ажилд хүндрэлд учруулж ч мэдэх юм. Эсвэл Төв банк буруу харж уйлж, зөв харж инээгээд ч болов Засгийн газрынхаа дээрх шийдвэрээр ипотекийн зээлийг үргэлжлүүлж магадгүй.  Хамгийн чухал нь эдийн засаг хүндрэлтэй 80 м.кв байраа ч санхүүжүүлэх боломжгүй энэ үед нэмэлт санхүүжүүлэлтийг хаанаас, хэрхэн гаргах нь анхаарал татаж байгаа юм.

24tsag.mn