Намрын ээлжит чуулган өнөөдөр нээлтээ хийнэ. Энэ удаагийн чуулганаар хэлэлцэх асуудлын жагсаалтад  20 гаруй хууль тогтоолын төсөл багтсан. Эдгээрээс хамгийн чухал нь 2017 оны улсын төсөв, нийгэм, эдийн засгийн үндсэн чиглэл, мөнгөний бодлогын тухай хуулийн төсөл болон Гэр бүлийн хүчирхийлэлтэй тэмцэх хуулийн төслүүд байгаа юм. Эдийн засгийн хүндрэлээс гарах бодлого боловсруулах гээд энэ намрын чуулганаас хүлээх зүйл олон байна. Олонхийн бүлгийн 65 гишүүн парламентаар хэлэлцэгдэх хуулийн төслүүдийг гацаж, түгжилгүй хэлэлцэх давуу талтай. Нөгөөтэйгүүр сөрөг хүчин гэгдэх АН болон бие даагчид нийлсэн 10 гишүүн байр сууриа хамгаалах хүч дутаж,  нэг намын бодлого давамгайлах сөрөг талтай. Тиймээс ард түмэн бид эрх баригчдын гаргаж буй шийдвэрт хяналт тавьж бурууд нь хаалт болж өгөх ёстой юм.

2017 оны төсвийг боловсруулахдаа татвар нэмэх асуудлыг оруулж ирэхгүй нь Сангийн сайдын мэдээллээс тодорхой болсон. Сангийн яамны боловсруулснаар ирэх оны улс төсвийг батлах нь тодорхой. Харин төсвийн асуудлын дараа эдийн засгийн хүндрэлийг давах туулах “Тусгай хөтөлбөр”-ийг УИХ-д өргөн барьж хэлэлцүүлэхээр болжээ. Уг асуудлыг үндэсний аюулгүй байдлын зөвлөлөөр хэлэлцүүлсэний дараа УИХ-д өргөн барих юм байна. Мэргэжлийн Засгийн газар байгуулагдаад 100 хоногтойгоо золгох гэж буй ч олигтой хийсэн ажилгүй ойгоо угтах гэж байгаа. Томилгооноос өөрөөр ажил хийгээгүй Засгийн газар энэ удаа Тусгай хөтөлбөрийг боловсруулж хэрэгжүүлж байж эдийн засгийн хүндрэлээс гэтлэхээр төлөвлөж буй бололтой. Сангийн яам эдийн засгийг ирэх онд гурван хувиар өсөх тооцооллыг гаргажээ. Гэхдээ Тавантолгой, Гацууртын ордыг эдийн засгийн эргэлтэд оруулсан тохиолдолд ингэж өсөх боломжтой гэж Сангийн сайд мэдэгдсэн юм. Тиймээс тус хоёр ордыг гацаанаас гаргаж эдийн засгийн эргэлтэд оруулахад УИХ улс төржилгүй хандаж асуудлыг шийдвэрлэх шаардлагатай байгаа аж.

Төсвийн асуудлын дараа эдийн засгийн хүндрэлийг давах туулах “Тусгай хөтөлбөр”-ийг УИХ-д өргөн барьж хэлэлцүүлэхээр болжээ.

Цаашлаад  Эрүүгийн хэрэг хянан шийдвэрлэх тухай,   Хууль сахиулах ажиллагааны тухай, Прокурорын байгууллагын тухай, Шүүхийн шийдвэр гүйцэтгэх тухай Гэр бүлийн хүчирхийлэлтэй тэмцэх тухай, Эрүүгийн хуульд нэмэлт өөрчлөлт оруулах тухай,   Зөрчлийн хуульд нэмэлт өөрчлөлт оруулах тухай зэрэг хуулийн төслүүд зайлшгүй хэлэлцэх асуудлын жагсаалтад багтсан.  

Засгийн газраас өнгөрөгч парламентын үед хэлэлцэн баталсан ч мөрдөгдөж эхлээгүй байсан  зарим хуулийг эргүүлэн татаж, дахин өргөн барьсан.  Тухайлбал, өмнө нь Гэр бүлийн хүчирхийлэлтэй тэмцэх тухай хуулийг Засгийн газар буцаан татсан нь олон нийтийг бухимдуулж байлаа.  2016 оны эхний хагас жилийн байдлаар гэр бүлийн хүчирхийллийн улмаас үйлдэгдсэн 764 гэмт хэрэг бүртгэгдсэн нь өмнөх оны мөн үеэс 178 хэрэг буюу 30.4 хувиар өссөн  байна. Өмнөх парламентаар ёсчлогдоогүй процессын таван хуулийн нэг нь Гэр бүлийн хүчирхийлэлтэй тэмцэх тухай хууль. Засгийн газраас энэ хуулийн төслийг татах авч, дахин оруулж ирсэн. Ингэхдээ гэр бүлээ хүчирхийлэгч этгээдийг Зөрчлийн хуулиар шийтгэдэг байсныг өөрчлөн ял оноохоор тусгаж, Эрүүгийн хуульд өөрчлөлт оруулахаар болсон байна. Ээлжит бус чуулганаар уг хуулийн төслийг хэлэлцэхийг дэмжсэн юм. Тиймээс намрын чуулганы хэлэлцэх асуудлын жагсаалтад багтсан, олны анхаарал татсан хуулийн нэг билээ.

Мөн Хамтын тэтгэврийн тухай хуулийн төслийг Засгийн газар буцаан татаад байсан. Харин Засгийн газраас уг хуулийн төслийг боловсруулан дахин хэлэлцээд УИХ-д өргөн барихаа мэдэгдээд байгаа. Засгийн газар Ахмад настны тухай хуулийн үзэл баримтлалын төслийг баталж хуулийн төслийг боловсруулжээ.  Төслийн үзэл баримтлалд “сум, тосгон, хороо, багт Ахмадын өргөө ажиллуулж, холбогдох зардлыг орон нутгийн төсвөөс санхүүжүүлэх, “Ахмадын зориулалттай нийтийн орон сууц”, “Монгол гэр” хөтөлбөр хэрэгжүүлэх, “Насны хишиг”-ийг 70-аас дээш настай ахмадад хагас жил тутамд, цаашдаа эдийн засаг сэргэх үед улирал тутам олгох зэргийг тусгажээ. Нэг ахмад настанд олгох “Насны хишиг”-ийн хэмжээг 100-300 мянган төгрөг байхаар тооцсон байна.  Тиймээс Засгийн газар уг хуулийн төслөө өргөн барьсан тохиолдолд намрын чуулганаар хэлэлцэгдэх юм.

24tsag.mn