Өнгөрсөн долоо хоногт Нийслэлийн прокурорын газраас УИХ-ын зургаан гишүүнд эрүү үүсгэснээ мэдэгдсэн. Эрүү үүсгэн шалгагдаж байгаа эрхмүүд бүгд МАН-ынх. Тодруулбал, МАН-аас Өвөрхангай аймагт нэр дэвшсэн Н.Төмөрхүү, С.Чинзориг, Увс аймагт нэр дэвшсэн Ч.Хүрэлбаатар, Б.Чойжилсүрэн, Орхонд нэр дэвшсэн О.Содбилэг, Дархан-Уулд нэр дэвшсэн Д.Хаянхярваа нар юм. Тэд Сонгуулийн тухай хууль зөрчсөн, сонгууль будлиантуулсан, сурталчилгааны явцад иргэдэд бэлэн мөнгө тараасан зэрэг хэрэгт буруутгагдан шалгагдсанаараа УИХ-ын гишүүн болмогцоо эрүүгийн хэрэгт татагдсан анхны гишүүд болсон гэхэд хилсдэхгүй. Сангийн сайд Д.Хаянхярваагийн хувьд тойргийнхоо өндөр настай болон хөгжлийн бэрхшээлтэй иргэдэд “Хүний хөгжил сан”-гийн мөнгө болох 330 мянган төгрөгийг албан тушаалаа урвуулан ашиглаж, 670 мянган төгрөг болгон тараасан гэсэн үндэслэлээр АТГ-т шалгагдаж байна.
Харин Б.Чойжилсүрэн, Ч.Хүрэлбаатар нар иргэдийн саналыг худалдаж авах зорилгоор иргэн бүрт 100 мянган төгрөг тарааснаараа Төрийн эрхийг хууль бусаар авахыг завдсан хэмээн ТЕГ, АТГ-т шалгагдаж байгаа билээ.
С.Чинзориг, Н.Төмөрхүү нарын хувьд нутгийн иргэдийг саналыг худалдах зорилгоор архи тараасан хэмээн буруутгагдаж байгаа. Тэднийг хууль зөрчсөн болохыг Хан-Уул дүүргийн шүүхээс нотолсон. Гэвч тэд гомдолтой хэмээн Нийслэлийн шүүхэд гомдол гаргаад байгаа юм.
Харин О.Содбилэг сонгуулийн сурталчилгаа албан ёсоор эхлээгүй байхад бэлэг сэлт тараасан, нэгж илгээсэн хэмээн буруутгагдан шалгагдаж эхлээд байгаа билээ.
Гэвч С.Чинзориг, Н.Төмөрхүү нараас бусад нь УИХ-ын гишүүний тангаргаа өргөөд байгаа. Ингэснээр тэд “УИХ-ын гишүүний халдашгүй дархан эрхтэй” болов. Дархан эрхтэй болсноор тэдний хэргийг түдгэлзүүлэх магадлал өндөр. Өмнө ч тэр хуулийнхан УИХ-ын гишүүн О.Чулуунбат, Д.Дондог нарын хэргийг халдашгүй дархан эрхтэй хэмээн түдгэлзүүлж байсан удаатай. Тэгэхээр энэ удаа ч нэгэнт тангараг өргөсөн эрүүгийн хэрэгт шалгагдаж буй эрхмүүдийн хэргийг түдгэлзүүлэх асуудал яригдах буй за. Учир нь гэм буруутайг нь шүүхээр тогтоолоо гэхэд УИХ-аас тэдний УИХ-ын гишүүний бүрэн эрхийг түдгэлзүүлж өгдөггүй. Өмнө нь хэд хэдэн гишүүний бүрэн эрхийг түдгэлзүүлээч гэхэд түдгэлзүүлэлгүй явсаар хэрэг нь хаагдах, замхрах асуудал гарч байсан билээ.
Б.Чимэг
