МАН сонгуульд ялагдсаныг зарим гишүүд нь том боломж гэж тайлбарлаж байна. Учир нь энэ нам ялагдаж байж цэвэрших олон асуудал хуралдаад байсан гэнэ. Үүнийг нэг нь МАН дотор байдаг хотын мафи гэгдэх хотын бүлэглэлийн асуудал юм. Энэ бүлэглэлийн талаар хэвлэлүүд байсхийгээд л бичдэг. Гэсэн ч нам нь ч, өөрсдөө ч ач холбогдол өгч тоодоггүй.
   МАН доторх хотын фракци нь олон жилийн турш бүрэлдсэн, хотын захиргаа, дүүргээс угшилтай хүмүүсээс бүрддэг. Тэд хотын хамгийн ашигтай газрыг худалдаж хөлжсөн, тэр мөнгөөрөө бүх асуудлыг шийддэг гэж хардагддаг байсан юм. Сүхбаатарын талбайн өмнөх цэцэрлэгт хүрээлэн, одоогийн “Эм Си Эс”-ийн “Сemtral tower” барьсан газраас эхлээд хүүхдийн паркийн газар хүртэл эрх мэдэлтнүүдийн гарт очсон юм. Тэдэнд зөвшөөрлийг өгсөн хүмүүс нь хотын бүлэглэлийнхэн.

   Ард түмэн хүүхдийн паркийн газрыг хэсэгчилэн өгсөнд л хамгийн их эмзэглэж бухимдсан. Үр дүнд нь хүүхдүүд очоод тоглох газар үгүй үлдсэн. Сургууль цэцэрлэгийн хашааны газарууд ч дууссан. Тиймээс замын бөглөрөл түгжирэлд бухимдаж яваа иргэд хотын захиргааныхныг буруутгадаг юм.
Ийм ажил хийсэн хотын бүлэглэлийг МАН-ынхан яаж ч чадахгүй байсаар ирсэн. Учир нь тэд мөнгөтэй, эрх мэдэлтэй хамгийн гол нь олуулаа. Тийм ч учраас нам дотроо нэр нөлөөтэй байдаг. Харин ард түмний дунд нэр, нөлөөгөө аажим аажмаар алдсаар ирсэн юм. Тэднийг эрх мэдлээс нь салгаж, нөлөөллийг бууруулах эрх мэдэл зөвхөн ард түмэнд байж гэдэг нь одоо харагдаж байна. Ард түмний энэ удаагийн сонгуулиар хотын бүлэглэлийг бараг үгүй хийж чадлаа. Ардчилсан нам ялсан учраас хотын бүх эрх мэдлийг гартаа авч, хурган дарга нарыг нь ээлж дараалан чөлөөлөх болно. Тэгж байж бид сайхан хотод тайван амьдрах цаг ирэх нь.

   Уг нь ард түмэн хотын удирдлагуудыг, хот дахь МАН-ын бодлогыг буруу байгааг эртнээс сануулсаар ирсэн. Даанч тэр сануулгыг юман чинээ тоохгүй байж байгаад “үсгүй хусуулна” гэдэг болов.
   Улаанбаатар хот дахь УИХ-ын болон орон нутгийн сонгуулийг эргэн санацгаая. 2004 оны УИХ-ын сонгуулиар МАН хотын 20 мандатын 12-ийг, 2008 онд 16 нь алдсан. Харин энэ удаа бараг бүгдийг нь тавиад туулаа. Орон нутгийн сонгуульд АН хэдэн жилийн өмнө суудал ч үгүй байсан.  Дараа нь ганц суудал авах замаар нэмэгдүүлсээр байгаад энэ удаа эрх барих хэмжээнд хүрч үнэмлэхүй олонхи боллоо. Ерөнхийлөгчийн сонгуулиар ч гэсэн МАН хотод л ялагдал хүлээдэг. Энэ бүхэн хотын бүлэглэлийн үйл ажиллагаа буруу явж ирснийг нотолж байх шиг. Дархлагдсан мэт аашилсан өнгөрсөн жилүүдэд газрын наймаа, замын түгжирэл, агаарын болоод хөрсний бохирдрол ард түмний бухимдлыг барж эцэстээ АН-ын хэн ч танихгүй шахам хүмүүст саналаа өгөхөд хүргэлээ. Уг нь сүүлийн дөрвөн жилд Г.Мөнхбаяр тун дажгүй ажилласан. Гэхдээ л түүнийг сайн байлаа гээд ард түмэн саналаа өгсөнгүй. Хотын бүлэглэлийн нэр хүнд ч шалдаа уналаа.

   МАН-ын шүдний өвчин болсон байсан хотын бүлэглэлээс ард түмэн ингэж салгаж өглөө. Шүдний өвчин ч гэж дээ өөрсдөө тэгж боддоггүй байсан байх. Ард түмэн л тэднийг илүү үздэг байсан байж мэднэ.
Ийнхүү МАН доторх хамгийн нөлөөтэй гэгддэг хотын бүлэглэлийг ард түмэн албан тушаалаас нь чөлөөлж өглөө. Харин МАН-ынхан энэ боломжийг ашиглаад тэднээсээ салж чадах болов уу гэдэг нь эргэлзээтэй юм. Чадвал өөрсдийнх нь хэлээд байгаагаар цэвэрших сайхан боломж. Чадахгүй бол дахиад л ялагдаад байж дээ.