Сонгуульд цөөнх болсон МАН-ынхан ойрдоо бужигнаантай байна. “Сонгуульд ялагдвал хариуцлагыг нь хүлээнэ” гэж ам гарсан У.Хүрэлсүх хэлсэндээ хүрч ажлаа өглөө. Гэхдээ өөрийн байнга дэмжиж явдаг Н.Оюун-Эрдэнэд түр халаагаа өгөв. УИХ-ын гишүүн Х.Тэмүүжиний тодорхойлсноор У.Хүрэлсүхийн лифтэнд суусан Н.Оюун-Эрдэнэ энэ удаа ч гэсэн ахынхаа хишгийг хүртлээ.  У.Хүрэлсүх халагдахдаа хүртэл залуусаа түр ч гэсэн дэмжив.
    Энэ үйл явдлаас өмнө МАН дотор ихээхэн өөрчлөлт орж эхэлсэн байжээ. Бүр тодруулбал сонгуулийн маргааш МАН-ын дарга С.Батболд намын нарийн бичгийн дарга нар, Удирдах зөвлөлийнхөө гишүүдийг цуглуулж байгаад “Манай нам сонгуульд цөөнх боллоо. Хариуцлагыг мэдээж удирдлагууд хүлээх ёстой. Удирдлагууд гэдэгт та бүхэн ч гэсэн багтана. Хамгийн түрүүнд намын даргын хувьд ажлаа өгөхөө илэрхийлье. Миний оронд хэнийг даргаараа тавьж болохыг бүгдээрээ ярилцаад шийдвэрлэе. Би энэ намын дарга байсан хүний хувьд цаашид намынхаа шинэчлэлийг, залуучуудаа дэмжиж ажиллана. Ялангуяа жирийн ард иргэдийн хүүхдүүдийг олноор нь дэмжих ёстой. Манай намын дарга хийчих лидер бидний дунд олон байна. Тэднийгээ дэмжиж ажиллъя” гэж байр сууриа илэрхийлж байжээ.
 
   Түүний энэ үгэнд тухайн үед намынх нь нарийн бичгийн дарга нар тоймтой хариу хэлэлгүй “биднээс болж ялагдаагүй шүү дээ дарга аа, машинаас л боллоо” гэсэн утгатай үгийг хэлэхэд С.Батболд дарга ихэд уурлаж “бурууг бусдаас хайгаад яахав. Өөрсдөөсөө хайя. Техникт буруу өгөөд яахав. Сонгуулийн дүнг хүлээн зөвшөөрөх хэрэгтэй” гэж хэлж байсныг намын байр хавиар ярилцаж байна.
   С.Батболд даргын энэ тодорхой хариуны дараа МАН-ын их, бага хурлыг хэзээ товлох талаар ярилцсан ч гэсэн нэгдсэн шийдэлд хүрээгүй гэнэ. Учир нь намын дарга шууд өргөдлөө өгснөөр асуудлыг нь шийдвэрлэчихдэггүй байна. Заавал их хурал хуралдуулж байж асуудлыг шийдвэрлэх гэнэ. Мөн дараагийн даргаа ч гэсэн их хурлаараа сонгох дүрэмтэй аж. Одоогийн байдлаар МАН-ын их хурлын товыг хоёр янзаар ярьж эхлээд байна. Нэг нь наадмын дараа найм дугаар сарын эхээр хийх, эсвэл орон нутгийн сонгуулийн дараа 11-р сард гэж тогтжээ. Гэхдээ хамгийн магадлалтай нь найман сард хийж, орон нутгийн сонгуульд шинэ удирдлагатай орох талаар ерөнхийдөө тохирчээ. 

   МАН-ын дарга С.Батболд ингэж ажлаа өгөхөө өөрөө илэрхийлжээ. Түүний ажлаа өгнө гэсэн үгнээс гадна намын гол аппаратынхан бүгдээрээ хариуцлага хүлээх ёстой гэж хэлсэн үг нь ихээхэн анхаарал татаж байна. Учир нь МАН-ын дарга С.Батболд намын нарийн бичгийн дарга, газар хэлтэсийн дарга нарыг ч гэсэн ажлаа өгч шинэ хүмүүсийг гаргаж ирэх ёстой гэж хэлсэн тухай шуугиж байна. Үнэн худлаа эсэхийг одоогоор батлах хүн гарахгүй байна. Энэ талаар МАН-ын хоёр ч хэлтэсийн даргаас тодруулга авахад “Би тийм юм сонсоогүй. Бид яалаа гэж хариуцлага хүлээх юм. Намын дарга л хүлээх байлгүй” гэсэн утгатай хариулт хэлэв.

   МАН-ын даргын хэлсний дагуу ерөнхий нарийн бичгийн дарга У.Хүрэлсүх ажлаасаа чөлөөлөгдөв. Түүний араас бусад нарийн бичгийн дарга нар нь өргөдлөө өгөх бололтой. Харин удахгүй томилогдох дарга нь нарийн бичгийн дарга болоод, газар хэлтэсүүдийнхээ даргыг шинээр томилох сурагтай.
Ийнхүү МАН өөрчлөлтийг түргэн мэдэрч хурдан хугацаанд шинэчлэлт хийхээр эрмэлзэж, удирдлагууд нь ухамсараараа ажлаасаа чөлөөлөгдөж эхэллээ. Монголын хамгийн нөлөө бүхий энэ намын дараагийн дарга, ерөнхий нарийн бичгийн дарга, нарийн бичгийн дарга нар, газар хэлтэсийн даргаар хэн хэн томилогдох бол гэсэн таамаг эхэллээ. МАН доторх бүлэглэлүүд өөрсдийн хүмүүсээ томилох гэж хэсэг бүлгээрээ хуралдаж эхэлсэн мэдээлэл түгж байна. Удахгүй хэн гэдэг лидер нэр дэвших нь тодорхой болж эхэлнэ. Эхний байдлаар МАН-ын дарга шадар сайд М.Энхболд, бүлгийн дарга Ө.Энхтүвшин, УИХ-ын гишүүн Н.Энхболд гэсэн гурван хүнийг дэвшүүлэхээр ярилцаж эхэллээ. Энэ гурван эрхэм дээр нэмж нэр дэвшүүлэх эрх ч их хуралд нээлттэй байдаг гэнэ.