Өнгөрсөн сонгуульд олонхи болсон АН-ынхан засгаа авах гэж их яарч байна. Яарч байгаа учраас амралтын өдрүүдэд тасралтгүй уулзаж, хуралдаж урьдчилсан байдлаар тохироонд хүрлээ. Манай сайт өмнө нь АН-ынхан наадмаар амрахгүй, хэсэг бүлэгээрээ хуралдаж тохироонд хүрч Засгийн газраа албан бусаар байгуулна гэж бичиж байсан нь үнэн болж таарлаа.
    Эх сурвалжийн мэдээлж байгаагаар АН-ын удирдлага “Залуучууд” зочид буудалд наадмын өдрүүдэд байрлаж тохироогоо хийжээ. Бас хотын ойролцоох амралтын зарим газрыг бүхлээр нь түрээсэлж амрагчдыг хүнтэй хэмээн буцааж байжээ. “Баянгол” зочид буудал, “Касабланка”-д МоАХ-ныхон төвлөрч наадмаа ч хийж, найраа ч хавтгайруулж, тохироогоо ч хийж. Мөн АН-ын залуучууд Э.Бат-Үүлийн хүү Б.Чугугийн ажиллуулдаг “Брикс” хэмээх цэнгээний газар ирээдүйн төлөвлөгөө, хэн хаана томилогдохоо ч ярилцахаа мартаагүй аж.

   Намын дарга Н.Алтанхуяг хамгийн том бүлэглэл МоАХ-ны тэргүүн Х.Баттулга хоёр ч учраа олжээ. Уг нь Х.Баттулга намынхаа даргыг Ерөнхий сайд болох эрхгүй, огцоруулна гэж хэвлэлээр мэдэгдэж байсан юм. Түүний ингэж ил цагаан мэдэгдэхэд нөлөөлсөн нэг хүчин зүйл бий. Сонгуульд ялсны маргааш АН-ын том фракциуд хуралдаж МоАХ буюу Х.Баттулгыг Засгийн газарт оруулахгүй хэмээн нэгдсэн шийдэлд хүрсэн явдал юм. Үүнд нь эгдүүцсэн Х.Баттулга сэлэм эргүүлж, намын даргаа огцруулах асуудлыг хөндсөн. АН-ын энэ задрал сайн зүйлд хүргэхгүйг Н.Алтанхуяг сайн харж МоАХ-нд нэлээд том бялуу хүртээх тохироо хийснээр тэдний зөрчил түрдээ саармагжлаа. Н.Алтанхуяг МоАХ фракцид хоёр яамыг Улаанбаатар хотын захиргаатай өгөхөөр шийджээ. Х.Баттулга эргээд ЗТБХБ-ын яамандаа ирэх бололтой. Өөрөөр хэлбэл ирэх жилүүдэд Улаанбаатар хотын бүтээн байгуулалт, дэд бүтэц, барилга байгууламж АН-аас гэхээсээ илүү МоАХ-ны фракциас бүхэлдээ хамаарах болж байна. Улаанбаатарын утааг арилгана, гэр хорооллын бүх айлыг төвийн дулааны шугам сүлжээнд холбоно, хаус хороолол болгоно, баячуудын газрыг хурааж иргэн бүрт хувааж өгнө, хотын захиргааг гэр хорооллын зах руу нүүлгэнэ гэсэн айхтар амлалтаар ялалт байгуулсан. Энэ бүхнийг биелүүлэх боломжгүй учир  хотыг бүхэлд нь МоАХ-нд өгөх стратегийг Н.Алтанхуяг болон Алтангадасынхан бодож олжээ. Тэгээд ирэх сонгуулиар хотыг бид удирдаагүй, МоАХ удирдсан гэж бурууг Х.Баттулга тэргүүтэй хүмүүсээс хайх хэрэгтэй хэмээн золигт гаргах төлөвлөгөө гэж зарим нь үзэж байна. Ингээд ирэх сонгуулиар АН-ын гол амлалтаас болж Э.Бат-Үүл, Х.Баттулга хоёр буруудаад бусад нь уснаас хуурай гарах нь. Н.Алтанхуяг ингэж холыг харж байгаа бололтой.

   Харин “Шонхор” фракцид УИХ-ыг өгөхөөр ярилцжээ. Энэ тохирооны дагуу З.Энхболд УИХ-ын дарга болно. Д.Ганхуяг, Г.Баярсайхан хоёрт байнгын хорооны даргын суудал өгнө. Бас УИХ-ын тамгын газрын дарга болоод газар хэлтэсүүдийнх нь дарга нарыг ажлаас нь чөлөөлж “Шонхор” фракцийн төлөөллүүдээс нөхөн сонгохоор ярилцжээ. Ийнхүү ирэх жилүүдэд “Шонхор” УИХ-ын Тамгын газар хавиар жиргэж өгөх бололтой.

   “Нэг ардчилал” фракцид ХЗДХ-ийн яам, Хөдөлмөрийн яамыг атгуулахаар ярилцаж Х.Тэмүүжинг сайд шүү гэж сануулжээ. Мөн МҮДН, Кроун фракциудад ч гэсэн нэг яам хувиарлаад амыг нь таглах бололтой. Гэвч МҮДН-аас гаралтай “фортуна” Н.Батбаяр Сангийн яамыг авах санал гаргажээ. Тэрбээр дөрвөн жилийн өмнө энэ яамыг авах гээд чадалгүй С.Баярцогтод алдсан юм. Тэгээд дөрвөн жил С.Баярцогтыг шүүмжлэгчдийн армийг толгойлсон. Энэ бүхнээ сануулаад ч Сангийн яамыг Алтангадасаас салгаж чадаагүй гэнэ. Алтангадасынхан Ерөнхий сайд, Сангийн яам, ХХААХҮ-ийн яам, Эрдэс баялаг эрчим хүчний яамдыг өмчлөлдөө авч үлджээ.
   Баяр наадмын өдрүүдэд АН-ынхан эхийг нь эцээж, тугалыг нь тураахгүйн зарчим баримталж иймэрхүү хувиарлалт хийжээ. Гэвч эцсийн зарим шийдвэрийг ҮЗХ-ныхоо хурлаар шийдвэрлэнэ.
ҮЗХ-ных нь зарим гишүүд МАН-тай нийлэхгүйгээр хол явахгүй гэдгээрээ ярилцахаар бэлтгэж байна. Энэ талаарх суртал ухуулгыг хариуцсан хүмүүс ч ажилдаа ороод ҮЗХ-ны эргэлзээтэй гишүүдтэй уулзаж эхэлжээ. Тэднийг хэн удирдаж байгааг хэлэхэд эрт байна.