Ийм мэдээлэл сонсоод сонгуульд ялагдсан МАН яахаараа УИХ-ын даргыг авах гэдэг юм бэ? гэж гайхах хүмүүс олон гарч ирнэ. Гэвч үнэхээр гайхахаар явдал болоод байна.

   Үйл явдал өнгөрсөн жилийн Үндсэн Хуулийн Цэцээс эхэлжээ. Тухайн үед иргэн Ч.Лхагважав УИХ-ын даргыг ялсан намаас томилох нь буруу, харин парламентад суудалтай нам бүхэн, бие даагч ч гэсэн өөрийгөө дэвшүүлэх эрхтэй хэмээн заргалдаж Үндсэн Хуулийн Цэцэд ханджээ.  Үндсэн Хуулийн Цэц асуудлыг авч хэлэлцээд парламентад суудалдтай нам бүхэн УИХ-ын даргад нэр дэвшүүлэх эрхтэй, бие даагч нар ч гэсэн өөрсдийгөө дэвшүүлж болно гэж иргэн Ч.Лхагважавын талд шийдвэр гаргажээ. Ч.Лхагважав нь хожим МАН-д элсэж, Хан-Уул дүүрэгт нэр дэвшиж чамгүй санал авсан.
   Энэ асуудлыг тухайн үед хэн ч сөхөөгүй, яриагүй өнгөрчээ. Харин саяханаас парламентад суудалтай нам бүр Үндсэн Хуулийн Цэцийн энэ шийдвэрийг бариад гүйж эхэлжээ. Мэдээж Үндсэн Хуулийн Цэцийн шийдвэр хамгийн эцсийнх. Тэгэхээр намууд итгэхээс өөр аргагүй.

   Хамгийн түрүүнд МАН-ынхан энэ шийдвэртэй танилцаад УИХ-ын даргад нэр дэвшүүлж болох юм гэж ярилцжээ. Тэгээд ч парламент гэдэг бол Засгийн газар биш, сонгогдсон гишүүд удирдлагаа сонгох үйл явц гэж үзжээ. Энэ шийдвэрийнхээ дагуу УИХ-ын даргад Ө.Энхтүвшинг дэвшүүлэх нь хамгийн зөв хувилбар гэсэн дүгнэлтэд хүрчээ. Гол нь түүнийг бие даагчид дэмжинэ гэж үзсэн байна.
   Үүний зэрэгцээ МАХН-МҮАН-ын “Шударга ёс” эвсэлийнхэн ч гэсэн Үндсэн Хуулийн Цэцийн энэ заалтыг барьж АН-ыг айлгах болжээ. Тэд бас бид Үндсэн Хуулийн Цэцийн шийдвэрийн дагуу УИХ-ын даргад нэр дэвшүүлэх эрхтэйг сануулжээ. Тэр ч бүү хэл манайд туршлагатай парламентач Ч.Улаан, Д.Тэрбишдагва гээд УИХ-ын дарга болчих хүн бий. Бидэнтэй хамтрахгүй бол, бас боломжийн яамдыг өгнө гэсэн тохироогоор З.Энхболдыг дэмжиж болох юм. Бидний тохироог урьдчилсан байдлаар гэрээ байгуулахгүй бол З.Энхболдын төлөө гараа өргөхгүй гэжээ.

   Байдал ингэж эргэвэл АН-д халгаатай болно. Учир нь МАХН-МҮАН-ынхан МАН-ын Ө.Энхтүвшингийн төлөө саналаа өгөхөд л асуудал дуусна. Одоогийн байдлаар УИХ-д МАН-аас 25, МАХН-МҮАН-ын 11 нийлээд 36 болно. Тангарагаа өргөсөн 72 гишүүний 50 хувь нь гэсэн үг. МАН, МАХН-МҮАН-ын 36 дээр бие даагч гуравыг нэмэхэд 39 болно. Ердийн олонхи. АН одоогийн байдлаар 31 суудалтай. Тэдэн дээр бие даагч 3, ИЗНН-ын 2-ийг нэмж байж 36 болно.
   Ийнхүү АН-ынхан УИХ-ын даргаа томилчих хангалттай олонхи болж чадахгүйн зовлонгоо амсч байна. Өрсөлдөгч улс төрийн хүчнүүд ч ийм сул байгааг нь сануулж барьцаа ахиулж эхэллээ. Нөгөө талаас АН-ынхан МАХН-МҮАН-нд сайдын суудал өгнө "хошгоруулж" байгаад УИХ-ын даргаар З.Энхболдыг томилох хувилбар байгаа юм. Харин З.Энхболдыг УИХ-ын дарга болгосны дараа МАХН-МҮАН-ынхныг баяртай гэж хэлж магадгүй гэж зарим хүн үзэж байна.