МАН-ын ерөнхий нарийн бичгийн дарга У.Хүрэлсүх “сонгуульд ялагдвал хариуцлагыг нь би хүлээнэ” гэж амласан. Сонгуульд МАН ялагдаж цөөнх болсон. Тиймээс У.Хүрэлсүх ерөнхий нарийн бичгийн даргын ажлаасаа хүсэлтээрээ саяхан чөлөөлөгдсөн. Ард түмэн ч тэгэх ёстой гэж үзэж байсан. У.Хүрэлсүхийг өөрийн хүсэлтээрээ ажлаасаа чөлөөлөгдөхөд олон нийт “хэлсэндээ хүрдэг”, “амласанаасаа гажсангүй” гэх мэтээр ярьж бичээд удаагүй байна.
 
  Гэтэл тэрээр хариуцлага хүлээж биш албан тушаал ахих гэж ажлаасаа чөлөөлөгдөсөн тухай мэдээлэл Тусгаар тогтнолын ордноор яригдаж эхэлжээ. Өөрөөр хэлбэл У.Хүрэлсүхийг МАН-ын дарга болохын тулд ажлаа өгсөн гэж удирдах түвшнийхээ хүрээнд ярьж байна. МАН-ын дарга С.Батболд сонгуулийн саанл хураалтын маргааш нь “Сонгуулийн дүнг хүлээн зөвшөөрцгөөе, би хамгийн түрүүнд хариуцлага хүлээнэ. Та нар дараагийн даргаа бодож байгаад сонгоорой” гэсэн утгатай үг хэлсэн гэдэг. С.Батболд ийнхүү албан тушаалтайгаа зууралдалгүй явна гэдэгээ ил тод илэрхийлжээ. Тэгээд л МАН-ын даргын төлөөх марафон эхэлж.
  Олон нийт, саарал ордныхон МАН-ын дараагийн даргаар бүлгийн ахлагч Ө.Энхтүвшин, УИХ-ын дэд дарга Н.Энхболд хоёрын нэгийг болно гэж таамаглаж байгаа. Харин энэхүү таамаглал худлаа болж саяхан хүсэлтээрээ ажлаа өгсөн У.Хүрэлсүх дарга болоод эргэн ирэх бололтой. Хамгийн гол нь ажлаа өглөө гээд явсан У.Хүрэлсүх МАН-ын дарга болоод ирэхэд олон түмэн, намын гишүүд дэмжигчид нь яаж хүлээж авахыг урьдчилан хэлэхэд хэцүү юм.

  Ямартай ч гэсэн У.Хүрэлсүх МАН-ын дарга болох хамгийн магадлалтай хүнээр тодорчээ. Учир нь түүнийг одоогийн дарга С.Батболдын бүлэглэл дэмжинэ. Бас өөрийнх нь тэргүүлдэг зүүний хүчний холбоо, үүсгэн байгуулсан НАМЗХ-ынхон нь дэмжинэ. Бас УИХ-ын гишүүн Д.Оюунхоролын тэргүүлдэг НАМЭХ ч татгалзахгүй. Тэрээр бас УИХ-ын 25 гишүүнийхээ хамгийн олонхийн дэмжлэгийг авах магадлалтай. Ийнхүү У.Хүрэлсүхэд шинэ шанс гарч иржээ.
  Түүнтэй хамгийн бодитойгоор өрсөлдөх хүн бол МАН-ын бүлгийн дарга Ө.Энхтүвшин. Н.Энхболд бол У.Хүрэлсүхтэй өрсөлдөхгүй, өрсөлдлөө ч дэмжлэг авах магадлал тааруу. Харин Ө.Энхтүвшин бол У.Хүрэлсүхийг айлгах магадлалтай хүн. Тэрбээр өмнө нь С.Батболдтой өрсөлдөөд 30 орчим хувийн санал авч байсан. Заалнаас дэвшээд ийм санал авна гэдэг бол МАН-ын гишүүд дундаа ихээхэн итгэл найдвар төрүүлж байгаагийн илрэл. Энэ удаа ч гэсэн Ө.Энхтүвшин заалнаас бодлого сөрж дэвшинэ. Бодлого сөрж гэдэг нь намынх нь удирдлагууд түүнийг дэмжихгүй. Харин С.Батболд намын бодлого гэж У.Хүрэлсүхийг дэмжихийг тулгана. Тиймээс МАН-ын их хурлын төлөөлөгчид энэ хоёр дээр хуваагдаж санал өгөх болно.
   Ө.Энхтүвшин бол нам дотроо хат сууж халуун чулуу долоосон хүн. Нэг хэсэг намаа шинэчлэх хөдөлгөөн байгуулж бужигнуулсан. Ер нь Ө.Энхтүвшин нам дотроо өрөвдүүлэх тактик барьж ч мэдэх юм. Тэрбээр уг нь Н.Энхбаярт, М.Энхболдод, С.Баярт хамгийн сүүлд С.Батболдод ялагдсан. Анх түүнийг МАХН-ын гурван Э-гийн нэг гэж бичиж байсан. Тухайн үед МАХН дотор Н.Энхбаяр, Ө.Энхтүвшин, Л.Энэбиш гэсэн гурван лидер хоорондоо өрсөлддөг байсан. Түүнээс хойш Ө.Энхтүвшин л санасандаа хүрээгүй. Урдуураа М.Энхболд, С.Баяр, С.Батболд гээд гурван ч эрхэмийг дайруулсан. “Одоо миний ээлж” гэхэд намынхан нь ч хүлээн зөвшөөрч мэднэ. У.Хүрэлсүхэд энэ удаа ялагдвал түүнд дахин боломж тохиохгүй. Учир нь шинэ үеийнхэн түрэн гарч ирнэ.
Ийнхүү МАН-ын даргад У.Хүрэлсүх бодлогоор дэвшиж, Ө.Энхтүвшин өрөвдүүлэх аргаар өрсөлдөж мэдэхээр боллоо. МАН-ын их хурал 9 сард болно. Тэр хүртэл хор найрагдаж, лобби их хийгдэнэ дээ.