Сонгуульд олонхи болсон АН-ынхан өчигдөр хуралдаад МАХН-МҮАН-ын “Шударга ёс” эвсэлтэй нэгдэж Засгийн газраа байгуулахаа зарласан. Уг нь АН-ын энэ шийдлийг Ерөнхийлөгч Ц.Элбэгдорж дэмжихгүй байгаа гэж удирдах түвшинээсээ мэдээлсэн. Гэвч цагаа тулаад ирэхээрээ Ц.Элбэгдорж намынхаа гишүүдийн шахалтаар хүлээн зөвшөөрчээ. Хүлээн зөвшөөрөөд зогсохгүй нэгэн сонирхолтой санал гаргаж түүнийгээ ч АН-ынханаар дэмжүүлжээ.

  Ерөнхийлөгч Ц.Элбэгдорж МАХН-МҮАН-ынхантай эвсэх гэж байгаа бол ИЗНН, бие даагч нарыг ч гэсэн татаж тоглолт хийхийг зөвлөжээ. Ингэснээр нөгөө талд ганцхан МАН л үлдэнэ. Хэрэв ИЗНН, бие даагч нарыг Засгийн газарт оруулахгүй бол тэд МАН-тай нэгдээд байдлыг тогтворгүй болгоно. Тиймээс МАН-аас бусадтай нь эвсэхээр тооцоолжээ.
Энэ тохироо наадмын өмнөөс хийгдсэн байна. Зарим мэдээллийн хэрэгслээр бие даагч Ц.Даваасүрэн, Х.Болорчулуун хоёрыг өөрсдийн унаган МАН-даа биш АН-д орох гэж буй талаарх мэдээлэл гарч байсан. Энэ нь ч үнэн байна. АН-ын удирдлага гурван бие даагчийг дуудаж нэг яам амлажээ. Гэхдээ АН-д элсэх болзолтойгоор. Бие даагч гурав ч зөвшөөрч. Гэвч Ц.Даваасүрэн, С.Ганбаатар хоёрын хэн нь сайд болох вэ гэдэг дээр тохироогүй байна. Ц.Даваасүрэн төрийн ажлын туршлагатайгаараа би болно гэсэн бол С.Ганбаатар би илүү олонд танигдсан гээд хөдөлж өгөөгүй аж. Хэрэв энэ хоёр тохирч чадахгүй бол хоёр, хоёр жилээр сайд хийж болно гэсэн алтан дундаж хувилбарыг Н.Алтанхуяг гаргаад ирсэн байна.

  Харин өчигдөр АН-ын ҮЗХ-ны хурлын үеэр ИЗНН гэнэт л Засгийн газарт нь хамтарч ажиллъя гэсэн бичиг илгээсэн нь бас л учиртай, эртнээс дэглэсэн жүжиг байжээ. Ц.Элбэгдоржийн зөвлөгөөний дагуу АН-ын удирдлага парламентад 2 суудалтай ИЗНН-д нэг яам өгөхөөр болжээ. Тэр ганц сайдыг нь дотроос томилбол С.Оюун, гаднаас гэвэл С.Энхбат болж таарна. Ийнхүү АН парламент дахь сөрөг хүчнүүдээ өөртөө нэг, нэг яамаар татаж чадлаа.

  Гол хүчин болох МАХН-МҮАН-ын “Шударга ёс” эвсэлдээ 4 яам өгөхөөр бэлтгэж байгаа гэнэ. Харин “Шударга ёс” 5 болгох талаар хэлэлцээрээ үргэлжүүлж байна. Тэдний болзлыг ч хүлээн авч магадгүй. Учир нь энэ Засгийн газар маш олон яамыг шинээр байгуулж, орон тоог нэмэх гэж байгаа. Тухайлбал, ХЗДХЯ, ЗТБХБЯ, НХХЯ гуравыг хоёр хуваахаар ярилцаж эхэлсэн. Хууль зүйн яам, Дотоод хэргийн яам, Барилгын яам, Зам тээврийн яам, Хөдөлмөрийн яам, Нийгмийн хамгааллын яам гэж задарна. Энэ задаргааны хэрээр сайд нарын тоо нэмэгдэнэ.
Ийнхүү АН-ынхан урьд шөнө хуралдаж МАН-аас бусдыг Засгийн газартаа оруулахаар үндсэн тохироонд хүрэв. Тэдэндээ хэдэн яам өгөхөө ч бараг шийдэж. Харин ямар яамыг аль намд нь өгөх вэ гэдэгээ өнөөдрөөс үргэлжлүүлэн хэлэлцэхээр болжээ.