Монголын зохиолчдын эвлэлийн Удирдах зөвлөл хуралдаж, зарим зохиолчийг шагнах болон шинэ гишүүд элсүүлэх тухай хэлэлцжээ. Энэ хурлаас орчуулагч Ш.Одонтөр, зохиолч О.Энхжавхлан, яруу найрагч М.Билэгсайхан нарт МЗЭ-ийн шагнал, яруу найрагч Б.Сарантуяа, О.Цэнд-Аюуш нарт Г.Сэр-Одын нэрэмжит шагнал хүртээхээр болсон юм. Харин өчигдөр Г.Сэр-Одын нэрэмжит шагналтны тоог нэгээр нэмж буй залуу яруу найрагч О.Цэнд-Аюуш энгэрийн тэмдэг, батламжаа гардлаа. Тэрээр саяхан Нийслэлийн Засаг даргын Тамгын газар, Монголын Зохиолчдын эвлэлтэй хамтран зохион явуулсан яруу найргийн наадмаар  “Миний бүтээсэн бүх юм хийгээд хэзээ ч бүтээж чадахгүй нэг юм” шүлгээрээ тэргүүн байр эзэлж байсан юм. Мөн удирдах зөвлөлийн хурлаар зохиолч Ч.Алтангэрэл, С.Баттулга, Б.Батсайхан, Т.Дарханхөвсгөл, Т.Дэрчин, М.Наранболд, Ч.Норовсүрэн, Б.Оролзод, С.Саранцэцэг, С.Бүрнээ, Б.Ганбазар нарыг МЗЭ-ийн жинхэнэ гишүүнээр бүртгэн авсан юм. Сонирхуулахад төрийн шагналт зохиолч Зундуйн Дорж баяр наадмын босгон дээр хоёр дахь удаагаар МЗЭ-ийн гишүүн болжээ. Түүнийг өмнө дорнын их яруу найрагч Б.Явуухулан батлан дааж, МЗЭ-д элсүүлсэн аж. “Тэрслүү” найрагч 1990-ээд оны дундуур МЗЭ-ээс өрх тусгаарлаж, Чөлөөт зохиолчдын холбооны гишүүн болсон ч энэ удаагийн хурлаар дахин МЗЭ-ийн гишүүн болов.